మన భారత్, తెలంగాణ:
తెలంగాణలో పదో తరగతి పబ్లిక్ పరీక్షలకు సిద్ధమవుతున్న విద్యార్థులకు ముఖ్యమైన సమాచారం. Board of Secondary Education Telangana (BSE) టెన్త్ క్లాస్ పబ్లిక్ పరీక్షల హాల్ టికెట్లను విడుదల చేసింది. విద్యార్థులు అధికారిక వెబ్సైట్ ద్వారా తమ హాల్ టికెట్లను సులభంగా డౌన్లోడ్ చేసుకునేలా ఏర్పాట్లు చేశారు.
విద్యార్థులు bse.telangana.gov.in వెబ్సైట్లోకి వెళ్లి జిల్లా పేరు, పాఠశాల వివరాలు, విద్యార్థి పేరు, పుట్టిన తేదీ వంటి వివరాలను నమోదు చేసి హాల్ టికెట్ను డౌన్లోడ్ చేసుకోవచ్చు. అలాగే విద్యార్థులకు మరింత సౌలభ్యం కల్పించేందుకు వాట్సాప్ ద్వారా కూడా హాల్ టికెట్ పొందే అవకాశం కల్పించారు.
వాట్సాప్ నంబర్ 8096958096 కు “Hi” అని మెసేజ్ పంపితే విద్యార్థులు తమ హాల్ టికెట్ను పొందవచ్చు. దీంతో గ్రామీణ ప్రాంతాల్లో ఉన్న విద్యార్థులకు కూడా సులభంగా హాల్ టికెట్ పొందే అవకాశం లభిస్తుంది.
ఈ సంవత్సరం తెలంగాణలో పదో తరగతి పబ్లిక్ పరీక్షలు మార్చి 14 నుంచి ప్రారంభం కానున్నాయి. పరీక్షలకు హాజరయ్యే విద్యార్థులు ముందుగానే తమ హాల్ టికెట్ను డౌన్లోడ్ చేసుకుని వివరాలు సరిచూసుకోవాలని అధికారులు సూచిస్తున్నారు. హాల్ టికెట్లో ఏవైనా తప్పులు ఉంటే సంబంధిత పాఠశాల ప్రధానోపాధ్యాయులను సంప్రదించాలని విద్యాశాఖ పేర్కొంది.
పరీక్షల సమయంలో విద్యార్థులు హాల్ టికెట్ తప్పనిసరిగా తీసుకెళ్లాలని, అలాగే పరీక్షా కేంద్రానికి సమయానికి ముందుగానే చేరుకోవాలని అధికారులు సూచిస్తున్నారు.