“ఐబొమ్మ రవి దమ్మున్నోడు… సజ్జనార్పై ప్రశ్నలు ఎవరి వశం?” – తీన్మార్ మల్లన్న పేలుడు వ్యాఖ్యలు
మన భారత్, తెలంగాణ: ఐబొమ్మ రవి అరెస్ట్ కేసు రాజకీయ ఆవేశాన్ని రగిలిస్తోంది. ఎమ్మెల్సీ తీన్మార్ మల్లన్న తాజా వీడియో సోషల్ మీడియాలో దుమారం రేపుతోంది. హైదరాబాద్ సీపీ సజ్జనార్ను బహిరంగంగా ప్రశ్నిస్తూ, ఐబొమ్మ రవికి మద్దతుగా ఆయన చేసిన వ్యాఖ్యలు ఇప్పుడు వైరల్ అయ్యాయి.
“సినిమా వాళ్లేమైనా సంసారులా? దోపిడీ దొంగలు పక్కన కూర్చోబెట్టుకుని, అత్యాచార బాధితులతో అలా మాట్లాడతావా సజ్జనార్? థియేటర్లలో పాప్కార్న్ రూ.300కి, వాటర్ బాటిల్ రూ.100కి అమ్ముతున్నారంటే అది దోపిడీ కాదా?” అని మల్లన్న తీవ్రంగా వ్యాఖ్యానించారు.
మరింత ముందుకెళ్లిన ఆయన, “సజ్జనార్… నీ జీవితమంతా ఫేక్ ఎన్కౌంటర్ కథ. ఐబొమ్మ రవి దమ్మున్నోడు, అందుకే ఇంత హడావుడి చేస్తున్నావు” అని అన్నారు.
తీన్మార్ మల్లన్న ఈ వీడియో ఇప్పటికే వేల సంఖ్యలో షేర్లు పొందింది. ఐబొమ్మ రవి కేసు చుట్టూ పెరుగుతున్న వివాదం, పోలీసుల చర్యలు, రాజకీయ వ్యాఖ్యలు—అన్నీ కలసి ఈ అంశాన్ని రాష్ట్రవ్యాప్తంగా చర్చనీయాంశంగా మార్చాయి.