ఉపాధి హామీ పనులను వేగవంతం చేయాలి: కలెక్టర్ రాజర్షి షా

మారుమూల ఆవాసాలు, గుట్ట ప్రాంతాల్లో నీటి ఎద్దడి నివారణకు ప్రత్యేక చర్యలు

మన భారత్, ఆదిలాబాద్: జిల్లాలో మహాత్మా గాంధీ జాతీయ గ్రామీణ ఉపాధి హామీ పథకం పనులను వేగవంతం చేయాలని జిల్లా కలెక్టర్ రాజర్షి షా అధికారులను ఆదేశించారు. గ్రామీణ ప్రాంతాల్లో కూలీలకు నిరంతరం ఉపాధి కల్పించడంతో పాటు, ప్రజలకు అవసరమైన మౌలిక వసతుల అభివృద్ధికి ఉపాధి హామీ పనులను సమర్థవంతంగా వినియోగించాలని సూచించారు.

మారుమూల ఆవాసాలు, గుట్ట ప్రాంతాల్లో వేసవికాలంలో నీటి ఎద్దడి తలెత్తకుండా ముందస్తు చర్యలు చేపట్టాలని కలెక్టర్ సూచించారు. ఆయా ప్రాంతాల్లో నీటి లభ్యత, అవసరాలను గుర్తించి తగిన పనులను ప్రణాళికాబద్ధంగా చేపట్టాలని అధికారులకు సూచించారు. నీటి సంరక్షణ, నీటి వనరుల అభివృద్ధికి సంబంధించిన పనులకు ప్రాధాన్యత ఇవ్వాలని పేర్కొన్నారు.

ప్రతి గ్రామంలో కనీసం 60 నుంచి 70 మంది కూలీలతో ఉపాధి హామీ పనులు కొనసాగించేలా చర్యలు తీసుకోవాలని కలెక్టర్ ఆదేశించారు. కూలీలకు పని కల్పించడంలో ఎలాంటి జాప్యం లేకుండా గ్రామస్థాయిలోనే పనులను గుర్తించి అమలు చేయాలని సూచించారు.

అదేవిధంగా ఫీల్డ్ అసిస్టెంట్లు లేని ప్రాంతాల్లో పనుల నిర్వహణకు ఇబ్బందులు తలెత్తకుండా సీనియర్ మేట్లను నియమించాలని అధికారులను ఆదేశించారు. పనుల పురోగతిని క్షేత్రస్థాయిలో నిరంతరం పర్యవేక్షిస్తూ, కూలీల హాజరు, పనుల నాణ్యత, రోజువారీ పురోగతిపై దృష్టి సారించాలని సూచించారు.

ఉపాధి హామీ పనులకు సంబంధించిన ఎంబీ రికార్డులు, ఈసీ (ఎస్టిమేట్ కాస్ట్) ప్రక్రియలను ఎప్పటికప్పుడు పూర్తి చేయాలని కలెక్టర్ స్పష్టం చేశారు. పనులు పూర్తయిన తర్వాత రికార్డుల నిర్వహణలో జాప్యం లేకుండా సంబంధిత అధికారులు సమన్వయంతో పనిచేయాలని సూచించారు.

గ్రామీణ ప్రాంతాల్లో ఉపాధి అవకాశాలను పెంచడంతో పాటు, నీటి సంరక్షణకు ఉపయోగపడే పనులను గుర్తించి అమలు చేయడం ద్వారా ప్రజలకు దీర్ఘకాలిక ప్రయోజనం కలిగేలా చర్యలు తీసుకోవాలని కలెక్టర్ రాజర్షి షా అధికారులకు సూచించారు. ఉపాధి హామీ పథకం అమలులో క్షేత్రస్థాయి సిబ్బంది బాధ్యతాయుతంగా వ్యవహరించాలని ఆదేశించారు.

Cell Number : cell_number : 9573391945

User Name : user_name : Gontimukkula prasad