అంతర్జాతీయ మాదకద్రవ్యాల వ్యతిరేక దినోత్సవం సందర్భంగా జిల్లా పోలీసుల ఆధ్వర్యంలో ఘనంగా 5K రన్ – 2 వేల మందికి పైగా యువత, విద్యార్థుల భాగస్వామ్యం

మన భారత్, ఆదిలాబాద్:

మాదకద్రవ్యాల నిర్మూలనకు సమాజంలోని ప్రతి ఒక్కరూ భాగస్వాములు కావాలని, ముఖ్యంగా యువత డ్రగ్స్, గంజాయి వంటి మత్తు పదార్థాలకు పూర్తిగా దూరంగా ఉండాలని ఆదిలాబాద్ ఎమ్మెల్యే పాయల్ శంకర్, జిల్లా ఎస్పీ అఖిల్ మహాజన్ ఐపీఎస్ పిలుపునిచ్చారు. అంతర్జాతీయ మాదకద్రవ్యాల వ్యతిరేక దినోత్సవాన్ని పురస్కరించుకుని ఆదిలాబాద్ జిల్లా పోలీస్ శాఖ ఆధ్వర్యంలో గురువారం నిర్వహించిన 5 కిలోమీటర్ల అవగాహన పరుగులో వేలాది మంది యువత ఉత్సాహంగా పాల్గొన్నారు.

స్థానిక ఇందిరా ప్రియదర్శిని స్టేడియంలో నిర్వహించిన కార్యక్రమంలో ముఖ్య అతిథులుగా పాల్గొన్న ఎమ్మెల్యే పాయల్ శంకర్, జిల్లా ఎస్పీ అఖిల్ మహాజన్ మాదకద్రవ్యాల వ్యతిరేక ప్రచార పోస్టర్లను ఆవిష్కరించారు. అనంతరం జెండా ఊపి 5K రన్‌ను ప్రారంభించారు. పట్టణంలోని ప్రధాన రహదారుల గుండా కొనసాగిన ఈ రన్‌లో ఉమ్మడి ఆదిలాబాద్ జిల్లాతో పాటు కరీంనగర్, హైదరాబాద్, నిజామాబాద్ జిల్లాల నుంచి వచ్చిన సుమారు రెండు వేల మంది యువత, విద్యార్థులు, క్రీడాకారులు, స్వచ్ఛంద సంస్థల ప్రతినిధులు పాల్గొని డ్రగ్స్ వ్యతిరేక సందేశాన్ని ప్రజల్లోకి తీసుకెళ్లారు.

ఈ సందర్భంగా ఎమ్మెల్యే పాయల్ శంకర్ మాట్లాడుతూ యువత దేశ భవిష్యత్తు అని, మాదకద్రవ్యాల వ్యసనానికి బానిసైతే వ్యక్తిగత జీవితం మాత్రమే కాకుండా కుటుంబం, సమాజం కూడా తీవ్రంగా నష్టపోతుందని అన్నారు. గంజాయి, డ్రగ్స్ వంటి మత్తు పదార్థాల బారిన పడకుండా యువత అప్రమత్తంగా ఉండాలని సూచించారు. తల్లిదండ్రులు తమ పిల్లల స్నేహితులు, వారి అలవాట్లు, రోజువారీ కదలికలపై దృష్టి పెట్టి అవసరమైన సమయంలో సరైన మార్గనిర్దేశం చేయాలని కోరారు. వ్యసనాలకు గురైన వారికి ప్రభుత్వం ఏర్పాటు చేసిన డీ-అడిక్షన్ కేంద్రాల ద్వారా చికిత్స అందుబాటులో ఉందని గుర్తు చేశారు.

జిల్లా ఎస్పీ అఖిల్ మహాజన్ మాట్లాడుతూ డ్రగ్స్ రహిత ఆదిలాబాద్ జిల్లా నిర్మాణమే పోలీస్ శాఖ లక్ష్యమని స్పష్టం చేశారు. మాదకద్రవ్యాల వినియోగం, విక్రయాలు, అక్రమ రవాణాకు సంబంధించిన సమాచారం తెలిసిన వెంటనే ప్రజలు పోలీసులకు అందించాలని కోరారు. సమాచారం ఇచ్చిన వారి వివరాలను గోప్యంగా ఉంచుతామని హామీ ఇచ్చారు. యువత క్రీడలు, విద్య, సృజనాత్మక కార్యక్రమాల వైపు మక్కువ పెంచుకుంటే వ్యసనాలకు దూరంగా ఉండగలరని తెలిపారు.

ప్రత్యేక ఆకర్షణగా జిల్లా ఎస్పీ స్వయంగా యువతతో కలిసి 5 కిలోమీటర్ల పరుగులో పాల్గొని పూర్తి చేయడం అందరినీ ఆకట్టుకుంది. అధికారులు కూడా ప్రజలతో కలిసి నడిస్తే అవగాహన కార్యక్రమాలకు మరింత ప్రాధాన్యత లభిస్తుందనే సందేశాన్ని ఆయన తన చర్య ద్వారా చాటిచెప్పారు.

అనంతరం పురుషులు, మహిళల విభాగాల్లో ప్రతిభ కనబరిచిన విజేతలకు సైకిళ్లు, ప్రశంసాపత్రాలు అందజేశారు. కార్యక్రమంలో పాల్గొన్న ప్రతి ఒక్కరికీ ప్రశంసా పత్రాలు అందించి అభినందించారు.

కార్యక్రమంలో భాగంగా ఏర్పాటు చేసిన “వాల్ ఆఫ్ ప్రామిస్” వద్ద అధికారులు, ప్రజాప్రతినిధులు, విద్యార్థులు, యువత సంతకాలు చేసి మాదకద్రవ్యాలకు వ్యతిరేకంగా పోరాడతామని ప్రతిజ్ఞ చేశారు. అలాగే “యాంటీ డ్రగ్ సోల్జర్” కార్యక్రమం ద్వారా యువతలో సామాజిక బాధ్యత, మాదకద్రవ్యాల నిర్మూలనపై మరింత చైతన్యం కల్పించారు.

ఈ కార్యక్రమంలో అదనపు ఎస్పీలు పి. మౌనిక, బి. సురేందర్ రావు, ఉట్నూర్ ఏఎస్పీ రుత్విక్ సాయి కొట్టే, మున్సిపల్ చైర్మన్ బండారి అనూష, మార్కెట్ కమిటీ అధ్యక్షుడు బి. శ్రీకాంత్ రెడ్డి, డీసీసీ అధ్యక్షుడు నరేష్ జాదవ్, వివిధ శాఖల అధికారులు, పోలీసు సిబ్బంది, విద్యార్థులు, క్రీడాకారులు, యువత, ప్రజలు పెద్ద సంఖ్యలో పాల్గొన్నారు.