పోలీస్ స్టేషన్‌ను ఆకస్మికంగా తనిఖీ చేసిన జిల్లా ఎస్పీ

విలేజ్ పోలీస్ ఆఫీసర్ వ్యవస్థను పటిష్టం చేయాలి: ఎస్పీ అఖిల్ మహాజన్

గ్రామాల్లో అసాంఘిక కార్యకలాపాలపై నిరంతర నిఘా.. గంజాయి నిర్మూలనకు కఠిన చర్యలు

ప్రతి గ్రామాన్ని బ్లూ కోర్టు, డయల్-100 సిబ్బంది సందర్శించాలి

తలమడుగు పోలీస్ స్టేషన్‌ను ఆకస్మికంగా తనిఖీ చేసిన జిల్లా ఎస్పీ

మన భారత్, తలమడుగు: అక్టోబర్ 14:
గ్రామీణ ప్రాంతాల్లో శాంతిభద్రతలను మరింత పటిష్టం చేయడంతో పాటు ప్రజలకు పోలీసు సేవలు వేగంగా అందేలా విలేజ్ పోలీస్ ఆఫీసర్ (VPO) విధానాన్ని సమర్థవంతంగా అమలు చేయాలని ఆదిలాబాద్ జిల్లా ఎస్పీ అఖిల్ మహాజన్ ఐపీఎస్ పోలీసు సిబ్బందికి సూచించారు. ప్రతి పోలీసు సిబ్బందికి గ్రామాలను కేటాయించి, ఆయా గ్రామాల్లో జరుగుతున్న పరిణామాలపై నిరంతరం సమాచారం సేకరించాలని ఆదేశించారు.

బుధవారం తలమడుగు పోలీస్ స్టేషన్‌ను ఎస్పీ అఖిల్ మహాజన్ ఆకస్మికంగా తనిఖీ చేశారు. ఈ సందర్భంగా పోలీస్ స్టేషన్‌లోని వాహనాలు, రికార్డులు, సిబ్బంది విధుల నిర్వహణ తదితర అంశాలను పరిశీలించారు. స్టేషన్ ఎస్సై డి. రాధికతో స్టేషన్ పరిధిలోని శాంతిభద్రతలు, కేసుల దర్యాప్తు, పెండింగ్ కేసులు, గ్రామాల్లో పోలీసుల పర్యవేక్షణ తదితర అంశాలపై వివరాలు తెలుసుకున్నారు.

గ్రామాలపై నిరంతర నిఘా

విలేజ్ పోలీస్ ఆఫీసర్ వ్యవస్థలో భాగంగా ప్రతి సిబ్బందికి కేటాయించిన గ్రామాలను క్రమం తప్పకుండా సందర్శించాలని ఎస్పీ సూచించారు. గ్రామాల్లో ప్రజలతో సత్సంబంధాలు ఏర్పరచుకుని, స్థానిక సమస్యలు, వివాదాలు, అనుమానాస్పద కార్యకలాపాలు, నేరాలకు సంబంధించిన సమాచారాన్ని ఎప్పటికప్పుడు తెలుసుకునేలా సమాచార వ్యవస్థను బలోపేతం చేయాలని తెలిపారు.

గ్రామాల్లో ఎలాంటి అసాంఘిక కార్యకలాపాలకు అవకాశం లేకుండా ముందస్తు చర్యలు చేపట్టాలని, ప్రజలకు పోలీసులపై నమ్మకం పెరిగేలా సిబ్బంది బాధ్యతాయుతంగా వ్యవహరించాలని సూచించారు. గ్రామ స్థాయిలో పోలీసు వ్యవస్థకు VPOలు కీలకంగా పనిచేయాలని ఎస్పీ పేర్కొన్నారు.

గంజాయి నిర్మూలనకు ప్రత్యేక చర్యలు

మారుమూల గ్రామాలు, అటవీ ప్రాంతాల్లో గంజాయి సాగు, అక్రమ రవాణా, విక్రయం, వినియోగం జరగకుండా పటిష్టమైన నిఘా ఏర్పాటు చేయాలని ఎస్పీ ఆదేశించారు. గంజాయి సంబంధిత సమాచారాన్ని సేకరించి, నిందితులపై చట్టపరమైన చర్యలు తీసుకోవాలని సూచించారు.

గంజాయి అక్రమ కార్యకలాపాలకు సంబంధించిన సమాచారాన్ని పోలీసులకు అందించే సిబ్బంది, ప్రజలకు నగదు రివార్డులు అందించే అవకాశం ఉందని ఎస్పీ తెలిపారు. యువత మాదకద్రవ్యాలకు దూరంగా ఉండేలా అవగాహన కార్యక్రమాలను కూడా నిర్వహించాలని సూచించారు.

రౌడీషీట్లపై నిరంతర పర్యవేక్షణ

మండల పరిధిలో బెదిరింపులు, దౌర్జన్యాలు, ఇతర నేర కార్యకలాపాలకు ఎలాంటి అవకాశం లేకుండా రౌడీషీట్‌లను ప్రతి నెలా పరిశీలించాలని ఎస్పీ ఆదేశించారు. పాత నేరస్తుల కదలికలపై నిఘా ఉంచడంతో పాటు నేరాల పునరావృతాన్ని అరికట్టేందుకు ముందస్తు చర్యలు తీసుకోవాలని సూచించారు.

ఫిర్యాదుదారులకు సత్వర న్యాయం

పోలీస్ స్టేషన్‌కు వచ్చే ఫిర్యాదుల విషయంలో రిసెప్షన్ సిబ్బంది కీలక పాత్ర పోషిస్తారని ఎస్పీ పేర్కొన్నారు. బాధితులు పోలీస్ స్టేషన్‌కు వచ్చినప్పుడు వారి సమస్యలను శ్రద్ధగా విని, ఫిర్యాదులను సక్రమంగా నమోదు చేసి, సమస్య పరిష్కారానికి తగిన చర్యలు చేపట్టాలని సూచించారు. బాధితులకు సత్వర న్యాయం అందేలా సిబ్బంది సమన్వయంతో పనిచేయాలని తెలిపారు.

డ్రంక్ అండ్ డ్రైవ్‌తో ప్రమాదాల నివారణ

రోడ్డు ప్రమాదాలను తగ్గించేందుకు ముఖ్యంగా సాయంత్రం వేళల్లో డ్రంక్ అండ్ డ్రైవ్ తనిఖీలను క్రమం తప్పకుండా నిర్వహించాలని ఎస్పీ సూచించారు. మద్యం సేవించి వాహనాలు నడిపే వారిపై నిబంధనల ప్రకారం చర్యలు తీసుకోవాలని, ప్రజల భద్రతకు ప్రాధాన్యం ఇవ్వాలని ఆదేశించారు.

రికార్డులు ఎప్పటికప్పుడు నవీకరించాలి

పోలీస్ స్టేషన్‌లోని అన్ని రికార్డులను ఎప్పటికప్పుడు నవీకరించుకోవాలని ఎస్పీ సూచించారు. కేసుల దర్యాప్తులో ఎలాంటి జాప్యం లేకుండా పెండింగ్‌ను తగ్గించాలని, దర్యాప్తు పూర్తయిన కేసుల్లో సకాలంలో చార్జిషీట్లు దాఖలు చేసి బాధితులకు న్యాయం జరిగేలా చూడాలని ఆదేశించారు.

ప్రతి పోలీసు సిబ్బంది విధులను నీతి, నిజాయితీ, బాధ్యతతో నిర్వర్తించాలని ఎస్పీ అఖిల్ మహాజన్ సూచించారు. ప్రజలకు అందుబాటులో ఉంటూ శాంతిభద్రతల పరిరక్షణలో సమర్థవంతంగా పనిచేయాలని తెలిపారు.

అదేవిధంగా బ్లూ కోర్టు, డయల్-100 సిబ్బంది మండల పరిధిలోని ప్రతి గ్రామాన్ని క్రమం తప్పకుండా సందర్శించి ప్రజలకు పోలీసు సేవలు అందుబాటులో ఉండేలా చూడాలని సూచించారు.

ఈ తనిఖీ కార్యక్రమంలో ఆదిలాబాద్ డీఎస్పీ ఎల్. జీవన్ రెడ్డి, రూరల్ సీఐ రహీం పాషా, తలమడుగు ఎస్సై డి. రాధికతో పాటు పోలీసు సిబ్బంది తదితరులు పాల్గొన్నారు.

Cell Number : cell_number : 9573391945

User Name : user_name : Gontimukkula prasad