అధికారులను ప్రశ్నించిన ఎమ్మెల్యే అనిల్ జాధవ్

గిరిజనుల సమస్యలు పరిష్కరించాలి.. ప్రభుత్వ పాఠశాలల్లో సీట్లు పెంచాలి: అనిల్ జాదవ్

ఉట్నూర్, మన భారత్ ఆగస్టు 22: గిరిజనులు, దివ్యాంగులు, సాంఘిక సంక్షేమానికి సంబంధించిన సమస్యలను తక్షణమే పరిష్కరించాలని బోథ్ ఎమ్మెల్యే అనిల్ జాదవ్ అధికారులను కోరారు. ఉట్నూర్ మండల కేంద్రంలోని కేబీ కాంప్లెక్స్‌లో రాష్ట్ర సాంఘిక సంక్షేమ శాఖ మంత్రి అడ్లూరి లక్ష్మణ్ అధ్యక్షతన నిర్వహించిన ఆదిలాబాద్ జిల్లా అధికారుల సమీక్షా సమావేశంలో ఎమ్మెల్యే పాల్గొన్నారు.

ఈ సందర్భంగా వివిధ శాఖల అధికారుల పనితీరుపై ఎమ్మెల్యే అనిల్ జాదవ్ తీవ్ర అసంతృప్తి వ్యక్తం చేశారు. ప్రజలు ఎన్నుకున్న ప్రజాప్రతినిధులకు ప్రభుత్వ కార్యక్రమాలపై కనీస సమాచారం ఇవ్వకపోవడం సరైన విధానం కాదని అన్నారు.

ఎమ్మెల్యేలకు సమాచారం లేకుండా కార్యక్రమాలా?

రాష్ట్ర మంత్రి స్వయంగా వచ్చి దివ్యాంగులకు సహాయ ఉపకరణాలు, సైకిళ్లు అందజేసే కార్యక్రమం నిర్వహించినప్పటికీ స్థానిక ఎమ్మెల్యేలకు కనీస సమాచారం ఇవ్వకపోవడంపై అనిల్ జాదవ్ ఆగ్రహం వ్యక్తం చేశారు. ప్రజా ప్రతినిధులను అధికారులు సమన్వయం చేసుకుని పనిచేయాలని సూచించారు.

గిరిజనులను ఇబ్బంది పెట్టొద్దు

తరతరాలుగా మారుమూల ప్రాంతాల్లో నివసిస్తున్న గిరిజనులు కొత్తగా అమల్లోకి వచ్చిన నిబంధనలు, చట్టాల కారణంగా ఇబ్బందులు ఎదుర్కొంటున్నారని ఎమ్మెల్యే పేర్కొన్నారు. అటవీ అధికారులు అమాయక గిరిజనులను వేధించడం మానుకోవాలని, పోడు భూములకు సంబంధించిన పట్టాలు పొందిన రైతులను కూడా ఇబ్బందులకు గురిచేయవద్దని కోరారు.

గిరిజనుల జీవన విధానం, వారి హక్కులు, ఉపాధి అవకాశాలను దృష్టిలో ఉంచుకుని అధికారులు మానవీయ దృక్పథంతో వ్యవహరించాలని సూచించారు.

ప్రభుత్వ పాఠశాలల్లో సీట్లు పెంచాలి

ప్రభుత్వ పాఠశాలల్లో చదివేందుకు విద్యార్థులు ఆసక్తి చూపుతున్న సమయంలో వారికి తగిన అవకాశాలు కల్పించాల్సిన బాధ్యత ప్రభుత్వంపై ఉందని ఎమ్మెల్యే అన్నారు. ప్రభుత్వ పాఠశాలల్లో సీట్ల సంఖ్యను పెంచి విద్యార్థులకు మెరుగైన విద్య అందించాలని డిమాండ్ చేశారు.

“పిల్లలకు నాణ్యమైన విద్య అందించడం అత్యంత ముఖ్యం. చదువే వారి భవిష్యత్తును నిర్మిస్తుంది” అని అనిల్ జాదవ్ పేర్కొన్నారు.

ఐటీడీఏలకు పూర్వ వైభవం తీసుకురావాలి

గతంలో గిరిజన ప్రజలతో సందడిగా కనిపించిన ఐటీడీఏ కార్యాలయాలు ప్రస్తుతం ప్రజలు కనీసం గేటు వరకు కూడా రాని పరిస్థితికి చేరుకున్నాయని ఎమ్మెల్యే వ్యాఖ్యానించారు. ఐటీడీఏలకు తగిన నిధులు కేటాయించడంతో పాటు అవసరమైన అధికారాలను కల్పించి వాటిని మరింత బలోపేతం చేయాలని మంత్రి దృష్టికి తీసుకెళ్లారు.

మంత్రి దృష్టికి కీలక సమస్యలు

సమీక్ష సమావేశంలో బోథ్ నియోజకవర్గానికి సంబంధించిన పలు సమస్యలను మంత్రి అడ్లూరి లక్ష్మణ్ దృష్టికి ఎమ్మెల్యే అనిల్ జాదవ్ తీసుకెళ్లారు.

1. అటవీ అధికారులు అమాయక గిరిజనులను ఇబ్బందులకు గురిచేయకుండా చర్యలు తీసుకోవాలి.
2. ప్రభుత్వ పాఠశాలల్లో సీట్లను పెంచి విద్యార్థుల భవిష్యత్తుకు సహకరించాలి.
3. ఐటీడీఏను అభివృద్ధి చేసి మరింత అధికారాలు, నిధులు కల్పించాలి.
4. ఎస్సీ కార్పొరేషన్ ద్వారా నియోజకవర్గంలోని బోర్లు, మోటార్ల సమస్యలను పరిష్కరించాలి.
5. జాతీయ రహదారి 44పై ఉన్న నేరడిగొండ మండల కేంద్రంలోని ప్రభుత్వ జూనియర్ కళాశాలకు అటవీశాఖ భూమి పేరుతో ఇబ్బందులు కల్పించవద్దు.
6. పోడు భూములకు పట్టాలు పొందిన రైతులను ఇబ్బందులకు గురిచేయకుండా చూడాలి.
7. జంతువుల కోసం ఫ్లైఓవర్లు నిర్మిస్తున్నప్పటికీ గిరిజనుల సమస్యలపై కూడా అదే స్థాయిలో దృష్టి పెట్టాలని ఎమ్మెల్యే కోరారు.

గిరిజన ప్రాంతాల అభివృద్ధికి శాఖల మధ్య సమన్వయం పెంచి, ప్రజలకు ప్రభుత్వ సేవలు సులభంగా అందేలా చర్యలు తీసుకోవాలని ఎమ్మెల్యే అనిల్ జాదవ్ కోరారు.

మీ గొంటిముక్కుల ప్రసాద్ మన భారత్ జిల్లా ఆర్సీ ఇన్చార్జి

ఆదిలాబాద్ జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.