అంతర్జాతీయ–అంతర్రాష్ట్ర దొంగల ముఠా అరెస్ట్

మావలలో ఇంటి చోరీ కేసును ఛేదించిన ఆదిలాబాద్ పోలీసులు

ఇద్దరు బంగ్లాదేశ్ వాసులు, ఒక భారతీయుడు అరెస్ట్.. రూ.8 లక్షల విలువైన బంగారం, వెండి, మొబైల్స్ స్వాధీనం

9 ఏళ్లుగా పలు రాష్ట్రాల్లో చోరీలకు పాల్పడినట్లు పోలీసుల వెల్లడి

ఆదిలాబాద్, ఆగస్టు 03 (మన భారత్): ఆదిలాబాద్ జిల్లా మావల పోలీస్ స్టేషన్ పరిధిలోని కైలాష్ నగర్‌లో ప్రముఖ రాజకీయ నాయకుడి ఇంట్లో జరిగిన చోరీ కేసును పోలీసులు ఛేదించారు. అంతర్జాతీయ, అంతర్రాష్ట్ర స్థాయిలో చోరీలకు పాల్పడుతున్నట్లు ఆరోపణలు ఎదుర్కొంటున్న ముగ్గురు నిందితులను అరెస్ట్ చేసినట్లు జిల్లా ఎస్పీ అఖిల్ మహాజన్, ఐపీఎస్ తెలిపారు. అరెస్ట్ అయిన వారిలో ఇద్దరు బంగ్లాదేశ్‌కు చెందినవారు కాగా, మరొకరు భారతీయుడని వెల్లడించారు.

సోమవారం ఆదిలాబాద్ పోలీస్ హెడ్‌క్వార్టర్స్ సమావేశ మందిరంలో నిర్వహించిన మీడియా సమావేశంలో జిల్లా ఎస్పీ కేసు వివరాలను వెల్లడించారు. పోలీసుల దర్యాప్తులో నిందితుల నుంచి బంగారం, వెండి, నగదు, మొబైల్ ఫోన్లు, ఐప్యాడ్‌తో పాటు నేరాలకు ఉపయోగించిన ద్విచక్ర వాహనాన్ని స్వాధీనం చేసుకున్నట్లు తెలిపారు.

ముగ్గురు నిందితుల అరెస్ట్

పోలీసుల వివరాల ప్రకారం అరెస్ట్ అయిన నిందితులను మొహమ్మద్ జౌనీ అలీ @ జానీ అలీ (30), మొహమ్మద్ రుమాన్ అలీ (33), తరుణ్ సింగ్ (29)గా గుర్తించారు. మొదటి ఇద్దరు బంగ్లాదేశ్‌లోని దినాజ్‌పూర్ జిల్లా పర్బతిపూర్ ప్రాంతానికి చెందినవారని, ప్రస్తుతం రాజస్థాన్‌లోని జైపూర్‌లో నివసిస్తున్నట్లు పోలీసులు తెలిపారు. మూడో నిందితుడు మధ్యప్రదేశ్‌లోని భోపాల్ ప్రాంతానికి చెందినవాడని వెల్లడించారు.

పోలీసుల విచారణలో ప్రధాన నిందితుడిగా పేర్కొన్న మొహమ్మద్ జౌనీ అలీ 2015 నుంచి సుమారు తొమ్మిదేళ్లుగా రాజస్థాన్, ఒడిశా, కర్ణాటక, ఛత్తీస్‌గఢ్, మధ్యప్రదేశ్, మహారాష్ట్ర, తెలంగాణ తదితర రాష్ట్రాల్లో సంచరిస్తూ ఇళ్లలో చోరీలు, ద్విచక్ర వాహనాల చోరీలకు పాల్పడినట్లు వెల్లడైనట్లు ఎస్పీ తెలిపారు.

పగటిపూట రెక్కీ.. రాత్రివేళల్లో చోరీ

నిందితులు పగటి సమయంలో కుక్కర్లు, గ్రైండర్లు విక్రయించే వ్యక్తులుగా నటిస్తూ కాలనీల్లో తిరుగుతూ ఇళ్లను పరిశీలించేవారని, ముందుగా రెక్కీ నిర్వహించి తాళాలు వేసి ఉన్న ఇళ్లను గుర్తించేవారని పోలీసులు తెలిపారు. అనంతరం రాత్రి వేళల్లో తాళాలు పగులగొట్టి ఇళ్లలోకి ప్రవేశించి చోరీలకు పాల్పడినట్లు విచారణలో వెల్లడైందని చెప్పారు.

ఇటీవల జూలై 11న బంగ్లాదేశ్ నుంచి భారతదేశంలోకి ప్రవేశించిన అనంతరం మధ్యప్రదేశ్, మహారాష్ట్ర మీదుగా ఆదిలాబాద్ చేరుకుని మావల పోలీస్ స్టేషన్ పరిధిలోని కైలాష్ నగర్‌లో చోరీకి పాల్పడినట్లు దర్యాప్తులో గుర్తించినట్లు ఎస్పీ తెలిపారు.

రూ.8 లక్షల విలువైన ఆస్తి స్వాధీనం

నిందితుల నుంచి పోలీసులు భారీగా చోరీ సొత్తును స్వాధీనం చేసుకున్నారు. స్వాధీనం చేసుకున్న వాటిలో

* 73.05 గ్రాముల బంగారం

* 151.30 గ్రాముల వెండి

* రూ.4,270 నగదు

* 5 ఐఫోన్లు

* 2 శాంసంగ్ మొబైల్ ఫోన్లు

* ఒక ఆపిల్ ఐప్యాడ్

* నేరాలకు ఉపయోగించిన ఒక ద్విచక్ర వాహనం

ఉన్నట్లు పోలీసులు తెలిపారు. స్వాధీనం చేసుకున్న బంగారం, వెండి, ఎలక్ట్రానిక్ వస్తువులు తదితర ఆస్తుల విలువ సుమారు రూ.8 లక్షలు ఉంటుందని ఎస్పీ అఖిల్ మహాజన్ వెల్లడించారు.

స్వాధీనం చేసుకున్న 73.05 గ్రాముల బంగారంలో 50.75 గ్రాములు ఆదిలాబాద్ కేసుకు, 22.30 గ్రాములు నాగ్‌పూర్ కేసుకు సంబంధించినవిగా పోలీసులు గుర్తించినట్లు తెలిపారు.

పలు రాష్ట్రాల్లో నేర చరిత్ర

ప్రధాన నిందితుడిగా పేర్కొన్న మొహమ్మద్ జౌనీ అలీపై దేశంలోని పలు రాష్ట్రాల్లో ఎనిమిదికి పైగా కేసులు నమోదై ఉన్నట్లు పోలీసులు తెలిపారు. మరో నిందితుడు తరుణ్ సింగ్‌పై కూడా ఆరు కేసులకు పైగా నమోదై ఉన్నట్లు వెల్లడించారు. ముఠాలోని ఇతర సభ్యులపై కూడా వివిధ రాష్ట్రాల్లో కేసులు ఉన్నట్లు ఎస్పీ తెలిపారు.

పోలీసుల ప్రకారం ప్రధాన నిందితుడు గత కొన్నేళ్లలో పలుమార్లు బంగ్లాదేశ్ నుంచి అక్రమంగా భారత్‌లోకి ప్రవేశించి, వివిధ రాష్ట్రాల్లో చోరీలకు పాల్పడి తిరిగి వెళ్లినట్లు దర్యాప్తులో వెల్లడైంది. ఇదే తరహాలో పనిచేస్తున్నట్లు అనుమానిస్తున్న 12 నుంచి 15 మంది బంగ్లాదేశ్ వాసులతో సంబంధాలు ఉన్నట్లు గుర్తించామని, మిగిలిన సభ్యుల ఆచూకీ కోసం దర్యాప్తు కొనసాగుతోందని ఎస్పీ తెలిపారు.

నకిలీ పత్రాలపై దర్యాప్తు

ప్రధాన నిందితుడు అక్రమంగా భారతదేశంలోకి ప్రవేశించి నకిలీ ఆధార్ కార్డు పొందినట్లు విచారణలో వెల్లడైనట్లు పోలీసులు తెలిపారు. అక్రమంగా దేశంలో నివసించేందుకు సహకరించిన వ్యక్తులు, నకిలీ పత్రాలు సమకూర్చిన వారి పాత్రపై కూడా దర్యాప్తు కొనసాగుతున్నట్లు ఎస్పీ స్పష్టం చేశారు.

ఈ కేసులో నిందితుల అంతర్రాష్ట్ర నేర సంబంధాలు, ఇతర సహచరులు, గతంలో చేసినట్లు ఆరోపణలు ఎదుర్కొంటున్న చోరీలు తదితర అంశాలపై సంబంధిత రాష్ట్రాల పోలీసులతో సమన్వయం చేస్తూ దర్యాప్తు చేస్తున్నట్లు తెలిపారు.

సాంకేతిక ఆధారాలతో కేసు ఛేదింపు

మావల చోరీ కేసు దర్యాప్తులో జిల్లా పోలీసులు సాంకేతిక ఆధారాలు, సీసీటీవీ ఫుటేజీలు, నిఘా సమాచారాన్ని ఉపయోగించినట్లు ఎస్పీ తెలిపారు. ఇతర రాష్ట్రాల పోలీసులతో సమన్వయం చేసుకుంటూ దర్యాప్తును వేగవంతం చేసి నిందితులను గుర్తించి అరెస్ట్ చేసినట్లు వెల్లడించారు.

ముఠాకు చెందిన ఇతర సభ్యులు, సహచరుల పాత్రపై మరింత లోతైన దర్యాప్తు కొనసాగుతోందని తెలిపారు. దేశ భద్రతకు ముప్పుగా మారే అక్రమ విదేశీయులు, అంతర్జాతీయ మరియు అంతర్రాష్ట్ర నేర ముఠాలపై ప్రత్యేక నిఘా కొనసాగిస్తూ చట్ట ప్రకారం కఠిన చర్యలు తీసుకుంటామని ఎస్పీ అఖిల్ మహాజన్ స్పష్టం చేశారు.

నిందితుడి నేర చరిత్రపై పోలీసుల వెల్లడి

పోలీసులు వెల్లడించిన వివరాల ప్రకారం ప్రధాన నిందితుడిగా పేర్కొన్న మొహమ్మద్ జౌనీ అలీపై గతంలోనూ పలు రాష్ట్రాల్లో చోరీ కేసులు నమోదయ్యాయి.

2017 – ఒడిశా: జువెల్ షేక్, సబూర్ అలీతో కలిసి ద్విచక్ర వాహన చోరీ, రాత్రివేళ గృహభేదన కేసుల్లో పాల్గొన్నట్లు పోలీసులు తెలిపారు. ఈ కేసులో అరెస్టై జైలుకు వెళ్లినట్లు వెల్లడించారు.

2019 – ఛత్తీస్‌గఢ్: పలువురు సహచరులతో కలిసి నాలుగు రాత్రి గృహభేదన కేసుల్లో పాల్గొన్నట్లు పోలీసులు తెలిపారు.

2020 – మధ్యప్రదేశ్: మొబైల్ చోరీ కేసులో అరెస్టై జైలు శిక్ష అనుభవించినట్లు వెల్లడించారు.

2021 – ఛత్తీస్‌గఢ్: ద్విచక్ర వాహనాల చోరీ, రాత్రివేళ గృహభేదన కేసుల్లో పాల్గొని అరెస్టైనట్లు పోలీసులు తెలిపారు.

2022 – మధ్యప్రదేశ్: మోటార్‌సైకిల్ చోరీ, గృహభేదన కేసుల్లో అరెస్టై జైలుకు వెళ్లినట్లు వెల్లడించారు.

2023 – మధ్యప్రదేశ్: గృహభేదన కేసులో మరోసారి అరెస్టైనట్లు పోలీసులు తెలిపారు.

2026 – మధ్యప్రదేశ్, మహారాష్ట్ర, తెలంగాణ: బంగ్లాదేశ్ నుంచి భారత్‌లోకి ప్రవేశించిన అనంతరం భోపాల్‌లో ద్విచక్ర వాహన చోరీ, నాగ్‌పూర్‌లో చోరీ, అనంతరం ఆదిలాబాద్ జిల్లా మావల పోలీస్ స్టేషన్ పరిధిలోని కైలాష్ నగర్‌లో ఇంటి చోరీకి పాల్పడినట్లు దర్యాప్తులో తేలిందని పోలీసులు తెలిపారు.

పోలీసు సిబ్బందికి ఎస్పీ అభినందనలు

కేసును ఛేదించడంలో కీలక పాత్ర పోషించిన మావల సీఐ బీడీ ప్రేమ్ కుమార్, సైబర్ క్రైమ్ ఎస్‌ఐ గోపికృష్ణ, క్రైమ్ సిబ్బంది శ్రీనివాస్, త్రిశూల్ క్రైమ్ సిబ్బంది తదితరులను జిల్లా ఎస్పీ అఖిల్ మహాజన్ ప్రత్యేకంగా అభినందించారు.

మీడియా సమావేశంలో ఆదిలాబాద్ డీఎస్పీ ఎల్. జీవన్ రెడ్డి, మావల సీఐ బీడీ ప్రేమ్ కుమార్, సీసీఎస్ ఇన్‌స్పెక్టర్ చంద్రశేఖర్, సైబర్ క్రైమ్ ఎస్‌ఐ గోపికృష్ణ తో పాటు పోలీసు సిబ్బంది పాల్గొన్నారు.

మీ గొంటిముక్కుల ప్రసాద్ మన భారత్ జిల్లా ఆర్సీ ఇన్చార్జి.

జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.