సర్వీస్ వైరు, మోటారు దగ్ధం..
గుర్తు తెలియని వ్యక్తులపై రైతు ఆవేదన
మన భారత్, తాంసి :
ఆదిలాబాద్ జిల్లా తాంసి మండలం పొన్నారి గ్రామంలో రైతు పొలంలో గుర్తు తెలియని వ్యక్తులు నిప్పుపెట్టిన ఘటన కలకలం రేపింది. వేసవి పంటగా కూరగాయల సాగు చేస్తున్న రైతుకు ఈ ఘటనతో ఆర్థిక నష్టం వాటిల్లింది.
పొన్నారి గ్రామానికి చెందిన దర్శనల పొచ్చన్న తన వ్యవసాయ భూమిలో వేసవి సీజన్లో కూరగాయల పంటను సాగు చేస్తున్నాడు. పంటకు నీటి సరఫరా కోసం పొలంలో మోటారు, సర్వీస్ వైర్లు ఏర్పాటు చేసుకుని సాగు పనులు కొనసాగిస్తున్నాడు. అయితే గురువారం సాయంత్రం గుర్తు తెలియని వ్యక్తులు పొలం గట్టుకు నిప్పు పెట్టడంతో మంటలు వ్యాపించి సర్వీస్ వైరు, మోటారు పూర్తిగా కాలిపోయినట్లు బాధిత రైతు శుక్రవారం వాపోయాడు.
ఈ ఘటనతో సాగునీటి సౌకర్యం దెబ్బతినడంతో పాటు పంటకు నీరు అందించడంలో ఇబ్బందులు ఏర్పడ్డాయని రైతు ఆందోళన వ్యక్తం చేశాడు. ఇప్పటికే వేసవి కాలంలో కూరగాయల సాగుకు అధిక పెట్టుబడులు పెట్టిన తాను, ఇప్పుడు మోటారు, వైర్లు కాలిపోవడంతో అదనపు భారం పడిందని ఆవేదన వ్యక్తం చేశాడు.
గుర్తు తెలియని వ్యక్తులు కావాలనే ఈ ఘటనకు పాల్పడి ఉండొచ్చని రైతు అనుమానం వ్యక్తం చేస్తున్నాడు. వ్యవసాయ భూముల్లో ఇలాంటి ఘటనలు జరగడం రైతుల్లో ఆందోళన కలిగిస్తోందని గ్రామస్థులు పేర్కొన్నారు.
ఈ ఘటనపై సంబంధిత అధికారులు స్పందించి విచారణ జరిపి, నష్టం కలిగించిన వారిపై చర్యలు తీసుకోవాలని రైతు దర్శనల పొచ్చన్న కోరుతున్నాడు. అలాగే పంట నష్టాన్ని దృష్టిలో ఉంచుకుని ప్రభుత్వ పరంగా తగిన సహాయం అందించాలని విజ్ఞప్తి చేశాడు.
వ్యవసాయ రంగంలో ఇప్పటికే ఎన్నో ఇబ్బందులు ఎదుర్కొంటున్న రైతులకు ఇలాంటి ఘటనలు మరింత ఆర్థిక భారంగా మారుతున్నాయని స్థానికులు అభిప్రాయపడుతున్నారు. రైతుల పంటలు, సాగు పరికరాల భద్రతపై అధికారులు దృష్టి సారించాలని గ్రామ ప్రజలు కోరుతున్నారు.
మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి..
