చెడు అలవాట్లకు దూరంగా ఉండాలి..

– మొగుళ్లపల్లి మండల వైద్యాధికారిణి డాక్టర్ నవత

మన భారత్, మొగుళ్లపల్లి :
మన శరీరంలోని అత్యంత కీలకమైన అవయవాలలో కాలేయం (లివర్) ఒకటని, ఇది శరీర ఆరోగ్యాన్ని సమతుల్యంగా ఉంచడంలో ప్రధాన పాత్ర పోషిస్తుందని మొగుళ్లపల్లి మండల వైద్యాధికారిణి డాక్టర్ నవత తెలిపారు. గురువారం మొగుళ్లపల్లి మండల ప్రాథమిక ఆరోగ్య కేంద్రంలో నిర్వహించిన విలేకరుల సమావేశంలో ఆమె మాట్లాడారు.

మన శరీరంలోకి ప్రవేశించే ఆహారం, నీరు, మందులు వంటి పదార్థాలను శుద్ధి చేయడంలో కాలేయం అత్యంత కీలకంగా పనిచేస్తుందని ఆమె పేర్కొన్నారు. శరీరంలో 500కు పైగా జీవక్రియలకు కాలేయం కేంద్రబిందువుగా వ్యవహరిస్తుందని, శరీర శక్తి నిల్వ, జీర్ణక్రియ, విషపదార్థాల నిర్మూలన, రక్త శుద్ధి వంటి అనేక ముఖ్యమైన పనులను నిర్వర్తిస్తుందని వివరించారు.

కాలేయానికి ప్రత్యేకమైన పునరుత్పత్తి సామర్థ్యం ఉన్నప్పటికీ నిర్లక్ష్యం చేస్తే తీవ్ర నష్టం కలగవచ్చని హెచ్చరించారు. ముఖ్యంగా కాలేయం దెబ్బతిన్న ప్రారంభ దశలో ఎటువంటి స్పష్టమైన లక్షణాలు కనిపించకపోవడం వల్ల దీనిని “నిశ్శబ్ద హంతకుడు”గా కూడా పిలుస్తారని తెలిపారు. ప్రస్తుతం ప్రపంచవ్యాప్తంగా కాలేయ సంబంధిత వ్యాధులు వేగంగా పెరుగుతున్నాయని ఆందోళన వ్యక్తం చేశారు.

మద్యపానం మాత్రమే కాకుండా ఆధునిక జీవనశైలిలో భాగమైన అధిక కొవ్వు పదార్థాలు, జంక్ ఫుడ్, చక్కెర పానీయాలు, వ్యాయామం లేకపోవడం వంటి కారణాలతో “నాన్ ఆల్కహాలిక్ ఫ్యాటీ లివర్” కేసులు గణనీయంగా పెరుగుతున్నాయని చెప్పారు. ముఖ్యంగా యువత ఆరోగ్యంపై మరింత శ్రద్ధ చూపాల్సిన అవసరం ఉందన్నారు.

ప్రతి వ్యక్తి రోజూ కనీసం 30 నుండి 45 నిమిషాల పాటు వ్యాయామం చేయాలని సూచించారు. సమతుల్య ఆహారం తీసుకోవడం, ఆకుకూరలు, పండ్లు, పోషకాహార పదార్థాలను ఎక్కువగా వినియోగించడం మంచిదన్నారు. జంక్ ఫుడ్, అధిక కొవ్వు పదార్థాలు, ఫాస్ట్ ఫుడ్, కార్బొనేటెడ్ డ్రింక్స్‌ను తగ్గించాలని సూచించారు.

మద్యపానం పూర్తిగా నివారించాలని, రోజుకు తగినంత నీరు తాగాలని, సంవత్సరానికి కనీసం ఒక్కసారైనా కాలేయ పనితీరు పరీక్షలు చేయించుకోవాలని డాక్టర్ నవత సూచించారు. హెపటైటిస్-బి వంటి వ్యాధులపై ప్రజల్లో అవగాహన పెరగాల్సిన అవసరం ఉందన్నారు.

“మంచి అలవాట్లు – పటిష్టమైన కాలేయం” అనే నినాదంతో ప్రతి ఒక్కరూ ఆరోగ్యకరమైన జీవనశైలిని అలవాటు చేసుకోవాలని పిలుపునిచ్చారు. ఆరోగ్యవంతమైన దేశ నిర్మాణంలో ప్రజల ఆరోగ్యమే అసలైన బలం అని పేర్కొన్నారు. కాలేయం మన శరీరంలోని నిశ్శబ్ద ఇంజిన్‌లాంటిదని, అది సక్రమంగా పనిచేస్తే మన జీవితం కూడా ఆరోగ్యవంతంగా సాగుతుందని తెలిపారు.

చెడుఅలవాట్లకు దూరంగా ఉండి కాలేయాన్ని కాపాడుకోవాలని, “కాలేయ రక్షణే జీవన రక్ష” అనే సందేశాన్ని ప్రతి ఒక్కరూ గుర్తుంచుకోవాలని డాక్టర్ నవత సూచించారు.

మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి..