మన భారత్, హైదరాబాద్:
తెలంగాణ రాష్ట్ర సమగ్ర అభివృద్ధికి కేంద్ర ప్రభుత్వం పూర్తి స్థాయిలో సహకరించాలని తెలంగాణ ముఖ్యమంత్రి రేవంత్ రెడ్డి ప్రధాని నరేంద్ర మోదీ ను కోరారు. ఆదివారం హైదరాబాద్‌లోని Hyderabad International Convention Centre (హెచ్‌ఐసీసీ)లో జరిగిన అభివృద్ధి కార్యక్రమాల్లో ప్రధాని మోదీతో కలిసి పాల్గొన్న సీఎం రేవంత్ రెడ్డి ఈ సందర్భంగా రాష్ట్ర భవిష్యత్ అభివృద్ధి లక్ష్యాలను వివరించారు.

తెలంగాణ ప్రభుత్వం ఇప్పటికే “2047 పాలసీ డాక్యుమెంట్” సిద్ధం చేసిందని సీఎం వెల్లడించారు. రాష్ట్రాన్ని అన్ని రంగాల్లో దేశంలోనే అగ్రగామిగా నిలపాలనే లక్ష్యంతో ఈ ప్రణాళిక రూపొందించామని తెలిపారు. తెలంగాణ అభివృద్ధికి సంబంధించిన పలు ప్రతిపాదనలు సిద్ధం చేశామని, వాటిపై ప్రత్యేకంగా రెండు గంటల సమయం కేటాయించి సమీక్ష నిర్వహించాలని ప్రధాని మోదీని విజ్ఞప్తి చేశారు.

రాష్ట్ర అభివృద్ధికి సంబంధించిన ప్రాజెక్టులకు కేంద్రం సహకారం అందిస్తే తెలంగాణ దేశ ఆర్థిక ప్రగతిలో కీలక పాత్ర పోషిస్తుందని సీఎం పేర్కొన్నారు. తెలంగాణ నుంచి దేశ జీడీపీకి 10 శాతం వాటా అందించే బాధ్యతను తాము తీసుకుంటామని స్పష్టం చేశారు.

మూసీ నది ప్రక్షాళన, రీజనల్ రింగ్ రోడ్, రేడియల్ రోడ్ల నిర్మాణం వంటి కీలక మౌలిక సదుపాయాల ప్రాజెక్టులకు కేంద్రం మద్దతు అవసరమని సీఎం రేవంత్ రెడ్డి తెలిపారు. ఈ ప్రాజెక్టులు రాష్ట్ర అభివృద్ధిని మరింత వేగవంతం చేస్తాయని అన్నారు.

రాజకీయ విభేదాలను పక్కనపెట్టి అభివృద్ధిపై దృష్టి సారించాల్సిన సమయం వచ్చిందని సీఎం వ్యాఖ్యానించారు. ఐదు రాష్ట్రాల ఎన్నికలు పూర్తయ్యాయని, ఇక ప్రజల సంక్షేమం, రాష్ట్ర పురోగతే ముఖ్యమని అన్నారు. దేశ అభివృద్ధి విషయంలో తాము రాజకీయాలు చేయబోమని స్పష్టం చేశారు.

తెలంగాణ ప్రజలు ప్రధాని మోదీపై ఎన్నో ఆశలు పెట్టుకున్నారని, కేంద్ర ప్రభుత్వం రాష్ట్రానికి అవసరమైన సహకారం అందిస్తుందని విశ్వసిస్తున్నామని పేర్కొన్నారు. తెలంగాణను దేశంలో నెంబర్‌వన్ రాష్ట్రంగా తీర్చిదిద్దడమే తమ ప్రభుత్వ లక్ష్యమని ఉద్ఘాటించారు.

“వికసిత్ భారత్” లక్ష్య సాధనలో తెలంగాణ కీలక పాత్ర పోషిస్తుందని సీఎం రేవంత్ రెడ్డి పేర్కొన్నారు. కేంద్ర-రాష్ట్ర ప్రభుత్వాల సమన్వయంతో తెలంగాణ అభివృద్ధి మరింత వేగంగా జరుగుతుందని ఆశాభావం వ్యక్తం చేశారు.

మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి..