మన భారత్, ఆదిలాబాద్ జిల్లా:
ఆదిలాబాద్ జిల్లా కేంద్రంలోని ప్రభుత్వ వైద్య సేవలకు ప్రధాన కేంద్రంగా ఉన్న రిమ్స్ ఆస్పత్రిలో మౌలిక వసతుల సమస్యలు రోగులను తీవ్ర ఇబ్బందులకు గురిచేస్తున్నాయి. ముఖ్యంగా ఆస్పత్రిలోని లిఫ్టులు పనిచేయకపోవడంతో వృద్ధులు, వికలాంగులు, తీవ్ర అనారోగ్యంతో బాధపడుతున్న రోగులు నానా అవస్థలు పడుతున్నారు. నాలుగో అంతస్తు వరకు వెళ్లాల్సిన పరిస్థితుల్లో రోగులు, వారి బంధువులు తీవ్ర ఇబ్బందులు ఎదుర్కొంటున్నామని ఆవేదన వ్యక్తం చేస్తున్నారు.
గ్రామీణ ప్రాంతాల నుంచి పెద్ద సంఖ్యలో రోగులు రిమ్స్ ఆస్పత్రికి చికిత్స కోసం వస్తుంటారు. వివిధ రకాల వైద్య పరీక్షలు, స్కానింగ్లు, స్పెషలిస్టు డాక్టర్ల సేవల కోసం పై అంతస్తులకు వెళ్లాల్సి వస్తోందని, అయితే లిఫ్టులు పనిచేయకపోవడంతో మెట్ల ద్వారానే వెళ్లాల్సి వస్తోందని రోగులు చెబుతున్నారు. ముఖ్యంగా శ్వాస సంబంధిత సమస్యలు, గుండె జబ్బులు, కాళ్ల నొప్పులు, వృద్ధాప్య సమస్యలతో బాధపడుతున్నవారికి ఇది మరింత కష్టంగా మారిందని తెలిపారు.
అంతేకాకుండా ఆస్పత్రిలోని టాయిలెట్ల పరిశుభ్రత కూడా దారుణంగా ఉందని రోగులు ఆరోపిస్తున్నారు. టాయిలెట్లు శుభ్రంగా లేకపోవడంతో దుర్వాసన వస్తోందని, దీనివల్ల రోగులకు మరింత అసౌకర్యం కలుగుతోందని పేర్కొన్నారు. వైద్య సేవల కోసం ప్రభుత్వ ఆస్పత్రిని ఆశ్రయిస్తున్న ప్రజలకు కనీస సౌకర్యాలు కూడా అందడం లేదని ఆవేదన వ్యక్తం చేస్తున్నారు.
ఇదే పరిస్థితి ఆదిలాబాద్లోని ఆటో సూపర్ స్పెషాలిటీ ఆస్పత్రిలో కూడా కొనసాగుతోందని స్థానికులు తెలిపారు. అక్కడ కూడా లిఫ్టులు సక్రమంగా పనిచేయకపోవడంతో రోగులు తీవ్ర ఇబ్బందులు ఎదుర్కొంటున్నారని చెప్పారు. అంతేకాకుండా డాక్టర్ల వద్ద సీరియల్ నెంబర్ ప్రకారం రోగులను లోపలికి పంపకుండా, కొంతమంది సిబ్బంది తమకు తెలిసిన వారిని నేరుగా తీసుకెళ్తున్నారని ఆరోపణలు వినిపిస్తున్నాయి.
లైన్లో గంటల తరబడి ఎదురుచూస్తున్న సాధారణ రోగులు తీవ్ర అసంతృప్తి వ్యక్తం చేస్తున్నారు. దూర ప్రాంతాల నుంచి వచ్చిన రోగులు ఉదయం నుంచే ఆస్పత్రిలో కూర్చొని ఉన్నప్పటికీ, కొంతమందికి ప్రాధాన్యం ఇస్తూ ముందుగా లోపలికి పంపుతున్నారని వారు ఆరోపించారు. దీనిపై ఉన్నతాధికారులు దృష్టి సారించి పారదర్శక విధానం అమలు చేయాలని ప్రజలు కోరుతున్నారు.
ప్రభుత్వం కోట్ల రూపాయలు ఖర్చు చేసి వైద్య సేవలను మెరుగుపర్చాలని ప్రయత్నిస్తున్నప్పటికీ, ఆస్పత్రుల్లో కనీస సౌకర్యాలు సరిగా లేకపోవడం బాధాకరమని స్థానికులు అంటున్నారు. వెంటనే సంబంధిత అధికారులు స్పందించి లిఫ్టుల మరమ్మతులు చేపట్టడంతో పాటు, టాయిలెట్ల పరిశుభ్రతపై ప్రత్యేక చర్యలు తీసుకోవాలని రోగులు, ప్రజలు డిమాండ్ చేస్తున్నారు.
మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి..
