ఓటర్ల జాబితా సవరణ ఈసీ సిద్ధం
హైదరాబాద్: దేశవ్యాప్తంగా ఓటర్ల జాబితాలను శుద్ధి చేయడానికి కేంద్ర ఎన్నికల సంఘం (ECI) మరో కీలక అడుగు వేసింది. రెండో విడత ప్రత్యేక సమగ్ర ఓటర్ల జాబితా సవరణ (Special Integrated Revision – SIR) ప్రక్రియను మంగళవారం నుండి 12 రాష్ట్రాలు, కేంద్ర పాలిత ప్రాంతాల్లో ప్రారంభించనున్నట్లు ప్రధాన ఎన్నికల కమిషనర్ జ్ఞానేశ్ కుమార్ ప్రకటించారు. బీహార్లో ఇటీవల విజయవంతంగా పూర్తైన ఎస్ఐఆర్ ప్రక్రియను ఆదర్శంగా తీసుకుని, ఇప్పుడు మరికొన్ని రాష్ట్రాల్లో కూడా ఇదే విధానాన్ని అమలు చేయబోతున్నట్లు ఆయన వెల్లడించారు. “1951 నుండి 2004 వరకు ఎనిమిదిసార్లు ఎస్ఐఆర్ నిర్వహించాం. ఇప్పుడు 21 ఏళ్ల తర్వాత దేశవ్యాప్తంగా ఈ ప్రక్రియను పునఃప్రారంభిస్తున్నాం,” అని జ్ఞానేశ్ కుమార్ తెలిపారు. ఓటర్ల జాబితా సవరణ ఎన్నికల నిష్పక్షపాతతకు మూలస్థంభమని ఆయన చెప్పారు. “ఈ సవరణ ద్వారా నకిలీ ఓటర్లు, మరణించిన వ్యక్తుల పేర్లు, ఇతర రాష్ట్రాలకు బదిలీ అయిన ఓటర్ల వివరాలను తొలగిస్తాం. అలాగే అక్రమ వలసదారుల పేర్లు కూడా జాబితా నుంచి తొలగించబడతాయి,” అని వివరించారు. బీహార్లో 7.5 కోట్ల మంది ఓటర్లు ఉన్నప్పటికీ, ఎటువంటి అభ్యంతరాలు లేకుండా ఎస్ఐఆర్ విజయవంతమైందని ఆయన గర్వంగా పేర్కొన్నారు. రెండో దశలో ప్రతి ఓటర్ ఇంటికి కనీసం మూడుసార్లు వెళ్లి వివరాలు ధృవీకరించనున్నట్లు తెలిపారు. ఈ దశలో అండమాన్ నికోబార్, ఛత్తీస్గఢ్, గోవా, గుజరాత్, కేరళ, లక్షద్వీప్, మధ్యప్రదేశ్, పుదుచ్చేరి, రాజస్థాన్, తమిళనాడు, ఉత్తరప్రదేశ్, పశ్చిమ బెంగాల్ రాష్ట్రాలు, కేంద్ర పాలిత ప్రాంతాలు ఉంటాయని వెల్లడించారు. ఈ ప్రాంతాల్లో కలిపి 51 కోట్లకు పైగా ఓటర్లు ఉన్నట్లు ఆయన తెలిపారు. నవంబర్ 4వ తేదీ నుండి ఈ సవరణ కార్యక్రమం ప్రారంభమవుతుందని ఎన్నికల సంఘం ప్రకటించింది. కాగా, అస్సాంలో ఇప్పటికే ఎన్ఆర్సీ (NRC) అమలులో ఉన్నందున అక్కడ ఎస్ఐఆర్ జరగదని స్పష్టం చేశారు. “ఓటర్ల జాబితా ఖచ్చితత్వం ప్రజాస్వామ్య నాణ్యతను నిర్ణయిస్తుంది. ప్రతి ఓటరు వివరాలు సరిచూడడం, తప్పులు సవరించడం ప్రజల బాధ్యతగా భావించాలి,” అని ప్రధాన ఎన్నికల కమిషనర్ పిలుపునిచ్చారు.
మన భారత్, స్టేట్ బ్యూరో
