కేంద్ర, రాష్ట్ర ప్రభుత్వ పథకాల అమలుపై సమగ్ర సమీక్ష

మన భారత్, ఆదిలాబాద్:

ఆదిలాబాద్ పార్లమెంట్ సభ్యుడు గోడం నగేష్ మంగళవారం పంజాబ్ రాష్ట్రంలోని అమృత్‌సర్‌లో నిర్వహించిన పార్లమెంట్ సోషల్ జస్టిస్ అండ్ ఎంపవర్‌మెంట్ కమిటీ సమీక్షా సమావేశంలో పాల్గొన్నారు. ఈ సమావేశంలో పంజాబ్ రాష్ట్రంలో కేంద్ర ప్రభుత్వం, రాష్ట్ర ప్రభుత్వం, బ్యాంకింగ్ సంస్థలు అమలు చేస్తున్న సంక్షేమ, అభివృద్ధి కార్యక్రమాల పురోగతిని సమీక్షించారు.

ప్రత్యేకంగా పంజాబ్ నేషనల్ బ్యాంక్ ఆధ్వర్యంలో అమలు అవుతున్న పథకాలతో పాటు PM-AJAY (Pradhan Mantri Anusuchit Jaati Abhyuday Yojana) కార్యక్రమం అమలుపై అధికారులు వివరాలు అందించారు. షెడ్యూల్డ్ కులాల సామాజిక, ఆర్థిక అభివృద్ధి కోసం కేంద్ర ప్రభుత్వం చేపడుతున్న కార్యక్రమాల ప్రభావం, లబ్ధిదారులకు అందుతున్న ప్రయోజనాలపై కమిటీ సభ్యులు చర్చించారు.

సమావేశంలో బ్యాంకింగ్ సేవలు, ఆర్థిక సహాయ పథకాలు, ఉపాధి అవకాశాల కల్పన, సామాజిక న్యాయానికి సంబంధించిన పలు అంశాలపై సమగ్ర సమీక్ష నిర్వహించారు. కేంద్ర ప్రభుత్వ సంక్షేమ పథకాలు క్షేత్రస్థాయిలో సమర్థవంతంగా అమలు కావడానికి తీసుకోవాల్సిన చర్యలపై అధికారులు, ప్రజాప్రతినిధులతో చర్చించారు.

ఈ సందర్భంగా ఎంపీ గోడం నగేష్ మాట్లాడుతూ, కేంద్ర ప్రభుత్వం చేపడుతున్న సామాజిక న్యాయ, సంక్షేమ కార్యక్రమాలు అర్హులైన ప్రతి లబ్ధిదారునికి చేరేలా అధికారులు కృషి చేయాలని సూచించారు. ప్రజల జీవన ప్రమాణాలు మెరుగుపడేలా ప్రభుత్వ పథకాల అమలులో పారదర్శకత, సమర్థత ఉండాలని ఆయన అభిప్రాయపడ్డారు.

సామాజికంగా వెనుకబడిన వర్గాల అభ్యున్నతి కోసం కేంద్ర ప్రభుత్వం అమలు చేస్తున్న పథకాలు దేశాభివృద్ధిలో కీలక పాత్ర పోషిస్తున్నాయని ఎంపీ గోడం నగేష్ పేర్కొన్నారు.

📲 మీ చుట్టుపక్కల వార్తలు, సమస్యలు, విశేషాలు పంపేందుకు క్రింద ఉన్న వాట్సాప్ నెంబర్‌పై క్లిక్ చేయండి.