మన భారత్, తలమడుగు:
తాంసి, తలమడుగు మండలాల పరిధిలోని అంతర్రాష్ట్ర రహదారిపై జరుగుతున్న రోడ్డు ప్రమాదాలను తగ్గించేందుకు పోలీసులు కీలక చర్యలు చేపట్టారు. ముఖ్యంగా పొన్నారి గ్రామ శివారులో ప్రమాదాలకు గురయ్యే ప్రాంతాలను గుర్తించి అక్కడ హెచ్చరిక బోర్డులను ఏర్పాటు చేశారు.
ఈ సందర్భంగా సిఐ పనిధర్, ఎస్సైలు రాధిక, జీవన్ రెడ్డి లతో కలిసి ప్రమాదప్రవణ ప్రాంతాల్లో బోర్డులను ఏర్పాటు చేశారు. వాహనదారులు జాగ్రత్తగా ప్రయాణించాలని, వేగ నియంత్రణ పాటించాలని, ట్రాఫిక్ నియమాలను ఖచ్చితంగా అనుసరించాలని పోలీసులు సూచించారు.
ప్రమాదాల నివారణలో భాగంగా ముందస్తు జాగ్రత్త చర్యలుగా ఈ బోర్డుల ఏర్పాటు చేపట్టినట్లు అధికారులు తెలిపారు. రహదారిపై భద్రతను మరింత బలోపేతం చేసేందుకు భవిష్యత్తులో మరిన్ని చర్యలు తీసుకుంటామని వెల్లడించారు.
ఈ కార్యక్రమంలో తలమడుగు , తాంసీ పోలీస్ సిబ్బంది పాల్గొన్నారు. స్థానికులు పోలీసుల ఈ చర్యలను అభినందిస్తూ, ప్రమాదాలను తగ్గించడంలో ఇది ఉపయోగపడుతుందని ఆశాభావం వ్యక్తం చేశారు.
