12,706 గ్రామాలకు స్పెషల్ డెవలప్‌మెంట్ ఫండ్

– నూతన సంవత్సరంలో అదనపు నిధులు

మన భారత్, హైదరాబాద్: తెలంగాణ రాష్ట్రంలోని 12,706 గ్రామ పంచాయతీలకు ముఖ్యమంత్రి శ్రీ ఎ. రేవంత్ రెడ్డి శుభవార్త అందించారు. గ్రామాల సమగ్ర అభివృద్ధే లక్ష్యంగా ముఖ్యమంత్రి ప్రత్యేక నిధి నుంచి **స్పెషల్ డెవలప్‌మెంట్ ఫండ్** కింద అదనపు నిధులు అందిస్తామని ప్రకటించారు. మేజర్ గ్రామ పంచాయతీలకు రూ.10 లక్షలు, చిన్న గ్రామ పంచాయతీలకు రూ.5 లక్షల చొప్పున నిధులు మంజూరు చేయనున్నట్లు తెలిపారు.

ఈ నిధులు కేంద్ర, రాష్ట్ర ప్రభుత్వాల నుంచి గ్రామ పంచాయతీలకు ఇప్పటికే వస్తున్న నిధులకు అదనమని సీఎం స్పష్టం చేశారు. నూతన సంవత్సరంలోనే ఈ ప్రత్యేక నిధులను విడుదల చేస్తామని వెల్లడించారు. గ్రామాభివృద్ధి కార్యక్రమాలు చేపట్టడం ద్వారా సర్పంచులకు ప్రజల్లో గౌరవం, విశ్వాసం పెరుగుతుందని పేర్కొన్నారు. గ్రామ సభలు నిర్వహించి అవసరమైన ప్రణాళికలు రూపొందించుకోవాలని, దీర్ఘకాలంగా పెండింగ్‌లో ఉన్న సమస్యలను పరిష్కరించుకోవాలని సూచించారు.

కొడంగల్ శాసనసభ నియోజకవర్గంలోని కోస్గీ కేంద్రంలో కొత్తగా ఎన్నికైన సర్పంచులు, ఉపసర్పంచులు, వార్డు సభ్యుల కోసం ఏర్పాటు చేసిన ఆత్మీయ సమావేశంలో ముఖ్యమంత్రి పాల్గొన్నారు. ఈ సందర్భంగా నూతన గ్రామ పంచాయతీ ప్రజాప్రతినిధులను సత్కరించి అభినందనలు తెలిపారు.

“ప్రభుత్వం సర్పంచులకు అండగా నిలుస్తుంది. మార్చి 31 లోపు గ్రామ పంచాయతీలకు రావాల్సిన రూ.3 వేల కోట్లను తెప్పించే బాధ్యత తీసుకుంటా” అని సీఎం హామీ ఇచ్చారు.

ఎన్నికలు ముగిసిన తర్వాత పార్టీ భేదాలు పక్కన పెట్టాలని, ప్రతి పౌరుడిని కుటుంబ సభ్యుడిగా భావించి ఎలాంటి వివక్ష చూపరాదని సూచించారు. చిన్న అభిప్రాయ భేదాలను వదిలేసి గ్రామాభివృద్ధి కోసం కలిసి పనిచేయాలని కోరారు.

రాష్ట్రంలో నిలిచిపోయిన ప్రాజెక్టులను ఒక్కొక్కటిగా ప్రారంభిస్తున్నామని, అనుమతులు సాధిస్తున్నామని తెలిపారు. గత ప్రభుత్వ కాలంలో పూర్తి కాని బీమా, నెట్టెంపాడు, కోయిల్‌సాగర్‌, ఎస్‌ఎల్‌బీసీ, పాలమూరు–రంగారెడ్డి, మక్తల్–నారాయణపేట వంటి ప్రాజెక్టులను పూర్తి చేసి సాగునీరు అందిస్తామని స్పష్టం చేశారు.

చదువే నిరుపేదల జీవితాలను మార్చగలదని పేర్కొంటూ, వచ్చే విద్యా సంవత్సరం నుంచి రాష్ట్రవ్యాప్తంగా ప్రభుత్వ పాఠశాలల్లో ఉదయం టిఫిన్‌, మధ్యాహ్నం భోజనం అందించే కార్యక్రమాన్ని ప్రారంభించనున్నట్లు సీఎం ప్రకటించారు. అలాగే కొత్త రేషన్ కార్డులు, సన్నబియ్యం పంపిణీ, ఉచిత విద్యుత్, రైతు భరోసా, మహిళలకు ఉచిత బస్సు ప్రయాణం, ఇందిరమ్మ చీరల పంపిణీ వంటి సంక్షేమ పథకాలు అర్హులందరికీ అందేలా సర్పంచులు పర్యవేక్షించాలని సూచించారు.

కొడంగల్‌ను పారిశ్రామికవాడగా, ఎడ్యుకేషన్ హబ్‌గా తీర్చిదిద్దుతామని తెలిపారు. జూనియర్, డిగ్రీ, అగ్రికల్చర్, మెడికల్ కాలేజీలతో పాటు సైనిక్ స్కూల్ ఏర్పాటు చేయనున్నట్లు ప్రకటించారు.

“కొడంగల్ ప్రజల ఆశీర్వాదంతోనే ఈ స్థాయికి వచ్చాను. కొడంగల్‌ను తెలంగాణకు ఆదర్శ నియోజకవర్గంగా తీర్చిదిద్దుతాం” అని ముఖ్యమంత్రి అన్నారు.

ఈ ఆత్మీయ సమ్మేళనంలో మంత్రి వాకిటి శ్రీహరి, జిల్లా ప్రజాప్రతినిధులు, కొత్తగా ఎన్నికైన గ్రామ సర్పంచులు, ఉపసర్పంచులు, వార్డు సభ్యులు తదితరులు పాల్గొన్నారు.