ఫీజుల పేరిట విద్యార్థుల వేధింపులకు చెక్.. ప్రైవేట్ జూనియర్ కళాశాలలకు DIEO గట్టి హెచ్చరిక

మన భారత్, ఆదిలాబాద్:

ఫీజుల పేరుతో విద్యార్థులను, వారి తల్లిదండ్రులను ఇబ్బందులకు గురిచేసే ప్రైవేట్ జూనియర్ కళాశాలలపై కఠిన చర్యలు తప్పవని జిల్లా ఇంటర్మీడియట్ విద్యాధికారి (DIEO) జాధవ్ గణేశ్ కుమార్ స్పష్టం చేశారు. ప్రభుత్వ నిబంధనలకు విరుద్ధంగా అదనపు ఫీజులు వసూలు చేయడం, ధ్రువీకరణ పత్రాలను నిలిపివేయడం, విద్యార్థులపై ఒత్తిడి తీసుకురావడం వంటి చర్యలను ఏమాత్రం సహించబోమని హెచ్చరించారు.

ఇంటర్మీడియట్ విద్యను అభ్యసిస్తున్న విద్యార్థులకు ఎలాంటి ఇబ్బందులు కలగకుండా కళాశాలల యాజమాన్యాలు బాధ్యతాయుతంగా వ్యవహరించాలని ఆయన సూచించారు. ముఖ్యంగా ట్యూషన్ ఫీజులు, బోర్డు పరీక్షల ఫీజులు, ధ్రువీకరణ పత్రాల జారీ పేరుతో అదనపు వసూళ్లు చేయకూడదని ఆదేశించారు. ప్రభుత్వం నిర్దేశించిన ఫీజులు మాత్రమే వసూలు చేయాలని, అనవసరంగా విద్యార్థులపై ఆర్థిక భారం మోపడం చట్టవిరుద్ధమని పేర్కొన్నారు.

విద్యార్థుల విద్యాభ్యాసానికి ఎలాంటి ఆటంకం కలగకుండా కళాశాలలు చర్యలు తీసుకోవాలని, ఫీజుల కారణంగా తరగతులకు అనుమతించకపోవడం, హాల్‌టికెట్లు లేదా సర్టిఫికెట్లు నిలిపివేయడం వంటి చర్యలు తీసుకుంటే సంబంధిత యాజమాన్యాలపై కఠిన చర్యలు తీసుకుంటామని హెచ్చరించారు.

విద్యార్థులు లేదా తల్లిదండ్రులు ఎవరైనా అధిక ఫీజుల వసూళ్లు, వేధింపులు లేదా ఇతర అక్రమాలపై ఫిర్యాదులు చేయవచ్చని DIEO తెలిపారు. అందిన ప్రతి ఫిర్యాదును వెంటనే పరిశీలించి, వాస్తవాలు నిర్ధారితమైతే సంబంధిత కళాశాలలపై నిబంధనల ప్రకారం చర్యలు తీసుకుంటామని చెప్పారు.

జిల్లాలోని అన్ని ప్రైవేట్ జూనియర్ కళాశాలలు ప్రభుత్వ మార్గదర్శకాలను తప్పనిసరిగా పాటించాలని, విద్యార్థుల హక్కులను కాపాడే విధంగా పారదర్శకంగా వ్యవహరించాలని ఆయన పిలుపునిచ్చారు. విద్య అనేది సేవాభావంతో అందించాల్సిన రంగమని, విద్యార్థుల భవిష్యత్తుతో రాజీ పడే చర్యలను ఎట్టి పరిస్థితుల్లోనూ సహించబోమని స్పష్టం చేశారు.

మీ గొంటి ముక్కుల ప్రసాద్ రిపోర్టర్ మన భారత్

ఆదిలాబాద్ జిల్లాలోని మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి..