ఘనంగా ఆవిష్కరించిన ‘నా పేరు తెలంగాణ’ ఆడియో, వీడియో పాట
మంత్రి వాకిటి శ్రీహరి, కలెక్టర్ ప్రియాంక ఐఏఎస్ చేతుల మీదుగా విడుదల
పాట రూపకర్త వెంకటయ్య గౌడ్, సంగీత దర్శకుడు నరసింహచారిని అభినందించిన ప్రముఖులు
మన భారత్, నారాయణపేట:
తెలంగాణ రాష్ట్ర ఆవిర్భావ దినోత్సవ వేడుకల సందర్భంగా తెలంగాణ సంస్కృతి, చరిత్ర, ఆత్మగౌరవాన్ని ప్రతిబింబించే ‘నా పేరు తెలంగాణ’ ఆడియో, వీడియో పాటను ఘనంగా ఆవిష్కరించారు. ఈ కార్యక్రమంలో రాష్ట్ర పశుసంవర్ధక, పాడి పరిశ్రమ, మత్స్య, క్రీడలు, యువజన సర్వీసుల శాఖ మంత్రి వాకిటి శ్రీహరి ముఖ్య అతిథిగా పాల్గొని పాటను విడుదల చేశారు.
అలాగే నారాయణపేట జిల్లా కలెక్టర్ & మెజిస్ట్రేట్ సీహెచ్. ప్రియాంక ఐఏఎస్ కార్యక్రమంలో పాల్గొని పాట ఆవిష్కరణను అభినందించారు. తెలంగాణ ఆవిర్భావ దినోత్సవం సందర్భంగా రూపొందించిన ఈ పాట రాష్ట్ర చరిత్ర, సంస్కృతి, సంప్రదాయాలు, ప్రజల భావోద్వేగాలను ప్రతిబింబించేలా ఉందని ప్రశంసించారు.
ఈ పాటను రూపొందించిన ప్రధానోపాధ్యాయులు వెంకటయ్య గౌడ్ తెలంగాణపై తనకున్న అభిమానాన్ని సృజనాత్మక రూపంలో ఆవిష్కరించారని మంత్రి పేర్కొన్నారు. పాటకు సంగీతం అందించిన ఉపాధ్యాయుడు నరసింహచారి ప్రతిభను కొనియాడుతూ, తెలంగాణ స్ఫూర్తిని సంగీత రూపంలో ప్రజలకు చేరవేసినందుకు అభినందనలు తెలిపారు.
ఈ సందర్భంగా మాట్లాడిన అతిథులు తెలంగాణ రాష్ట్ర సాధన కోసం జరిగిన ఉద్యమం, అమరవీరుల త్యాగాలు, రాష్ట్ర అభివృద్ధి ప్రస్థానాన్ని గుర్తు చేశారు. తెలంగాణ సంస్కృతి, భాష, సాహిత్యాన్ని భావితరాలకు పరిచయం చేసే ఇటువంటి సృజనాత్మక కార్యక్రమాలు మరింత పెరగాలని ఆకాంక్షించారు.
పాట ఆవిష్కరణ కార్యక్రమంలో విద్యాశాఖ అధికారులు, ఉపాధ్యాయులు, ప్రజాప్రతినిధులు, సాంస్కృతిక రంగ ప్రముఖులు తదితరులు పాల్గొన్నారు. ‘నా పేరు తెలంగాణ’ పాటకు విశేష స్పందన లభిస్తోందని నిర్వాహకులు తెలిపారు.
