ప్రతి గ్రామ పంచాయతీకి రూ.20 లక్షల మంజూరు

పీఎం-అజయ్ పథకం కింద ఆదిలాబాద్ జిల్లాలో ఆరు గ్రామాల ఎంపిక

ప్రధాని మోడీ, ఎంపీ గోడం నగేష్‌కు గ్రామస్తుల కృతజ్ఞతలు

మన భారత్ | ఆదిలాబాద్:
కేంద్ర ప్రభుత్వం అమలు చేస్తున్న ‘పీఎం-అజయ్’ (ప్రధాన మంత్రి అనుసూచిత్ జాతి అభ్యుదయ యోజన) పథకం కింద ఆదిలాబాద్ జిల్లాలో ఆరు గ్రామాలు ఎంపిక కావడంతో ఆయా గ్రామాల్లో ఆనంద వాతావరణం నెలకొంది. ఈ సందర్భంగా గ్రామస్తులు ప్రధాని నరేంద్ర మోడీతో పాటు ఆదిలాబాద్ ఎంపీ గోడం నగేష్‌కు ప్రత్యేక కృతజ్ఞతలు తెలిపారు. గ్రామీణాభివృద్ధి, ఎస్సీ వర్గాల సంక్షేమానికి కేంద్ర ప్రభుత్వం తీసుకుంటున్న చర్యలు అభినందనీయమని పేర్కొన్నారు.

ఈ సందర్భంగా ఎంపీ గోడం నగేష్ మాట్లాడుతూ.. షెడ్యూల్డ్ కులాల సమగ్ర అభివృద్ధే పీఎం-అజయ్ పథకం ప్రధాన ఉద్దేశమని తెలిపారు. ముఖ్యంగా ఎస్సీ విద్యార్థుల్లో అక్షరాస్యత పెంపు, ఉన్నత విద్యా అవకాశాల విస్తరణ, గ్రామీణ ప్రాంతాల్లో మౌలిక వసతుల అభివృద్ధికి ఈ పథకం ఎంతో దోహదపడుతుందని చెప్పారు. సామాజికంగా వెనుకబడిన వర్గాలను ఆర్థికంగా, విద్యాపరంగా బలోపేతం చేయాలనే సంకల్పంతో కేంద్ర ప్రభుత్వం ఈ పథకాన్ని అమలు చేస్తోందన్నారు.

ఆదిలాబాద్ జిల్లాలో ఎంపికైన ఆరు గ్రామాల అభివృద్ధి కోసం మొత్తం రూ.1 కోటి 20 లక్షలు మంజూరు కాగా, ప్రతి గ్రామ పంచాయతీకి రూ.20 లక్షల చొప్పున ప్రత్యేక నిధులు కేటాయించినట్లు వెల్లడించారు. ఈ నిధులను గ్రామాల్లో అంతర్గత రహదారుల నిర్మాణం, పారిశుధ్య సదుపాయాల మెరుగుదల, తాగునీటి సమస్యల పరిష్కారం, విద్యా సదుపాయాల అభివృద్ధి, సామాజిక మౌలిక వసతుల కల్పనకు వినియోగించనున్నట్లు తెలిపారు.

గ్రామీణ ప్రాంతాల్లో విద్య, ఉపాధి, మౌలిక వసతులను అభివృద్ధి చేయడం ద్వారా ప్రజల జీవన ప్రమాణాలు మెరుగుపడతాయని ఎంపీ పేర్కొన్నారు. అభివృద్ధి పనులు పారదర్శకంగా, నాణ్యతతో పూర్తి చేయాలని అధికారులకు సూచించారు. ప్రజాప్రతినిధులు, గ్రామస్థాయి అధికారులు, స్థానిక ప్రజల సమన్వయంతో పథకం అమలు విజయవంతం అవుతుందని చెప్పారు.

గ్రామాల అభివృద్ధికి ప్రభుత్వం అందిస్తున్న అవకాశాలను ప్రజలు సద్వినియోగం చేసుకుని ముందుకు సాగాలని ఎంపీ గోడం నగేష్ పిలుపునిచ్చారు. పీఎం-అజయ్ పథకం ద్వారా గ్రామీణ ప్రాంతాల్లో సామాజిక, విద్యా, ఆర్థిక పరిస్థితుల్లో గణనీయమైన మార్పు తీసుకురావడమే కేంద్ర ప్రభుత్వ లక్ష్యమని స్పష్టం చేశారు.

మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి..