మన భారత్, ఆదిలాబాద్
నకిలీ పత్రాలతో స్థలం కబ్జా.. బ్యాంకుకు రూ.49 లక్షల మోసం: తండ్రి–కొడుకులపై కేసు, ఒకరు అరెస్ట్
ఆదిలాబాద్, జూలై 16: ఆదిలాబాద్ పట్టణంలో నకిలీ పత్రాలు సృష్టించి స్థలాన్ని అక్రమంగా కబ్జా చేయడంతో పాటు అదే పత్రాల ఆధారంగా బ్యాంకు నుంచి రూ.49 లక్షల రుణం పొందిన ఘటన వెలుగులోకి వచ్చింది. ఈ కేసులో తండ్రి–కొడుకులపై పోలీసులు కేసు నమోదు చేయగా, కొడుకును అరెస్ట్ చేసి న్యాయస్థానం ముందు హాజరుపరిచారు. తండ్రి ప్రస్తుతం పరారీలో ఉన్నట్లు ఆదిలాబాద్ వన్ టౌన్ సీఐ బి. సునీల్ కుమార్ తెలిపారు.
పోలీసుల వివరాల ప్రకారం, రంగినేని శ్రీనివాస్ (40), రంగినేని సూర్యప్రకాశ్ అనే ఇద్దరిపై మోసం, నకిలీ పత్రాల తయారీ, భూమి ఆక్రమణ తదితర అభియోగాల కింద కేసు నమోదు చేశారు. ఈ కేసులో మరికొందరి పాత్రపై కూడా దర్యాప్తు కొనసాగుతోంది.
1979లో కొనుగోలు చేసిన స్థలంపై వివాదం
1979లో ఆదిలాబాద్ పట్టణానికి చెందిన సుష్మ బేల్ అనే మహిళ శాంతినగర్లోని బొక్కల్గూడ నం.1 పరిధిలో ఉన్న ప్లాట్ నంబర్–4ను చట్టబద్ధంగా కొనుగోలు చేశారు. అనంతరం మున్సిపాలిటీ ద్వారా మ్యుటేషన్, ప్రొసీడింగ్స్, డోర్ నంబర్ తదితర అధికారిక ప్రక్రియలు పూర్తయ్యాయి.
2016లో అదే స్థలాన్ని మూడు సంవత్సరాల లీజు ఒప్పందంపై రంగినేని సూర్యప్రకాశ్కు అప్పగించారు. ఒప్పందం ప్రకారం లీజు గడువు ముగిసిన తర్వాత స్థలాన్ని యజమానికి తిరిగి అప్పగించాల్సి ఉండగా, తాత్కాలిక నిర్మాణం మాత్రమే చేసుకునే అనుమతి ఉన్నప్పటికీ, శాశ్వత నిర్మాణాలు చేపట్టినట్లు ఆరోపణలు ఉన్నాయి.
నకిలీ పత్రాలతో యాజమాన్య హక్కుల సృష్టి
స్థలాన్ని పూర్తిగా స్వాధీనం చేసుకోవాలనే ఉద్దేశంతో నిందితులు 1983 నాటి మున్సిపల్ రికార్డుల పేరుతో నకిలీ ప్రొసీడింగ్స్, నకిలీ సంతకాలు, నకిలీ స్టాంపులు ఉపయోగించి తప్పుడు పత్రాలను తయారు చేసినట్లు పోలీసులు గుర్తించారు. అదేవిధంగా నకిలీ పట్టా సర్టిఫికెట్, 2009 నాటి మున్సిపల్ భవన అనుమతి పత్రాలు కూడా సృష్టించినట్లు విచారణలో వెల్లడైంది.
ఆ పత్రాల ఆధారంగా భూమిని గిఫ్ట్ డీడ్ ద్వారా 2023లో రంగినేని శ్రీనివాస్ పేరుకు బదిలీ చేసినట్లు పోలీసులు తెలిపారు.
నకిలీ పత్రాలతో బ్యాంకు నుంచి రూ.49 లక్షల రుణం
నకిలీ డాక్యుమెంట్లను ఆధారంగా చేసుకుని స్టేట్ బ్యాంక్ ఆఫ్ ఇండియా (ఎస్బీఐ) సీసీఐ బ్రాంచ్లో సోలార్ వ్యాపారం పేరుతో రూ.49 లక్షల రుణం తీసుకున్నట్లు పోలీసులు వెల్లడించారు. రుణ కిస్తీలు చెల్లించకపోవడంతో బ్యాంకు ఇటీవల రుణ ఖాతాను ఎన్పీఏగా ప్రకటించే ప్రక్రియ ప్రారంభించింది. దీనికి సంబంధించిన పబ్లిక్ నోటీసు వెలువడిన తర్వాత అసలు భూ యజమానులు జిల్లా ఎస్పీ అఖిల్ మహాజన్ను ఆశ్రయించి ఫిర్యాదు చేశారు.
కొడుకు అరెస్ట్.. తండ్రి కోసం గాలింపు
ఫిర్యాదు ఆధారంగా విచారణ చేపట్టిన ఆదిలాబాద్ వన్ టౌన్ పోలీసులు నిందితుడు రంగినేని శ్రీనివాస్ను అరెస్ట్ చేసి కోర్టులో హాజరుపరిచారు. మరో నిందితుడు రంగినేని సూర్యప్రకాశ్ పరారీలో ఉండగా, అతని కోసం గాలింపు కొనసాగుతోంది.
నకిలీ పత్రాల తయారీలో సహకరించిన వారిపైనా విచారణ
ఈ కేసులో నకిలీ పత్రాల తయారీకి సహకరించిన వ్యక్తులు, మధ్యవర్తులు లేదా ఇతరుల ప్రమేయం ఉన్నట్లయితే వారిపైనా చట్టపరమైన చర్యలు తప్పవని సీఐ బి. సునీల్ కుమార్ హెచ్చరించారు. కేసుకు సంబంధించిన అన్ని కోణాల్లో దర్యాప్తు కొనసాగుతున్నట్లు తెలిపారు.
