Jio.. 52 కోట్లకు పైగా వినియోగదారులు

ఒక్కో యూజర్ నెలకు సగటున 42.3GB డేటా వినియోగం

5G సేవల్లో జియో ఆధిపత్యం కొనసాగుతోందన్న రిలయన్స్

మన భారత్ | ఇంటర్నేషనల్

దేశంలోని టెలికాం రంగంలో జియో మరోసారి తన ఆధిపత్యాన్ని చాటుకుంది. భారతదేశంలో జియో సబ్‌స్క్రైబర్ల సంఖ్య 524 మిలియన్లు (52.40 కోట్లకు పైగా) చేరిందని రిలయన్స్ ఇండస్ట్రీస్ వెల్లడించింది. 2026 ఆర్థిక సంవత్సరానికి సంబంధించిన నాల్గవ త్రైమాసిక (Q4) ఫలితాలను విడుదల చేసిన సందర్భంగా ఈ వివరాలను ప్రకటించింది.

రిలయన్స్ నివేదిక ప్రకారం ప్రస్తుతం జియోకు 26.8 కోట్ల మంది 5G వినియోగదారులు ఉన్నారు. వేగవంతమైన ఇంటర్నెట్ సేవలతో పాటు డిజిటల్ రంగంలో విస్తరణ కొనసాగిస్తున్న జియో, ఫిక్స్డ్ బ్రాడ్‌బ్యాండ్ సేవల ద్వారా దేశవ్యాప్తంగా 2.71 కోట్ల ఇళ్లకు చేరువైనట్లు తెలిపింది. గ్రామీణ ప్రాంతాల నుంచి నగరాల వరకు జియో నెట్‌వర్క్ విస్తరణ వేగంగా కొనసాగుతోందని కంపెనీ పేర్కొంది.

అలాగే ప్రతి వినియోగదారుని నుంచి సగటున నెలకు రూ.214 ఆదాయం వస్తోందని కంపెనీ వెల్లడించింది. మరోవైపు ఒక్కో యూజర్ నెలకు సగటున 42.3 జీబీ డేటా వినియోగిస్తున్నట్లు పేర్కొంది. పెరుగుతున్న డిజిటల్ వినియోగం, వీడియో స్ట్రీమింగ్, సోషల్ మీడియా, ఆన్‌లైన్ విద్య, వర్క్ ఫ్రం హోమ్ వంటి కారణాలతో డేటా వినియోగం భారీగా పెరిగినట్లు నిపుణులు అభిప్రాయపడుతున్నారు.

5G సేవల విస్తరణలో జియో ముందంజలో ఉందని, రాబోయే రోజుల్లో మరింత వేగంగా నెట్‌వర్క్ విస్తరణ చేపట్టనున్నట్లు కంపెనీ సంకేతాలు ఇచ్చింది. టెలికాం రంగంలో జియో వృద్ధి ఇతర కంపెనీలకు గట్టి పోటీగా మారుతోందని మార్కెట్ విశ్లేషకులు చెబుతున్నారు.

మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి..