భూ సర్వేను పరిశీలించిన అదనపు కలెక్టర్..

రైతులకు ఖచ్చితమైన భూ సర్వే రికార్డులు అందాలి: జాయింట్ కలెక్టర్ సేధు మాధవన్

మన భారత్ | విజయనగరం జిల్లా: విజయనగరం జిల్లా బొండపల్లి మండలం గొట్లాం గ్రామంలో జరుగుతున్న భూ రీసర్వే విధానాన్ని జాయింట్ కలెక్టర్ సేధు మాధవన్ శనివారం క్షేత్రస్థాయిలో పరిశీలించారు. రీసర్వే ప్రక్రియ పారదర్శకంగా, రైతులకు ఎటువంటి ఇబ్బందులు లేకుండా నిర్వహించాలన్న ఉద్దేశంతో అధికారులు చేపడుతున్న పనులను ఆయన నేరుగా పరిశీలించి పలు కీలక సూచనలు చేశారు.

ఈ సందర్భంగా జాయింట్ కలెక్టర్ మాట్లాడుతూ, గ్రౌండ్ ట్రూథింగ్ ప్రక్రియ జరుగుతున్న సమయంలో సంబంధిత రైతుకు ప్రతి అంశాన్ని స్పష్టంగా తెలియజేయాలని అధికారులను ఆదేశించారు. భూ సర్వే ప్రక్రియలో ఎటువంటి అపోహలు, సందేహాలు తలెత్తకుండా రైతులకు సమాచారం అందించడమే కాకుండా, తెలియజేసినట్లు రైతు ద్వారా ఈ-కేవైసీ (e-KYC) తీసుకోవాలని సూచించారు. దీనివల్ల భవిష్యత్తులో ఎలాంటి వివాదాలకు తావు లేకుండా భూ సర్వే ప్రక్రియ మరింత పారదర్శకంగా ఉంటుందని తెలిపారు.

రైతులకు అందజేసే భూ సర్వే రికార్డులు ఖచ్చితమైన కొలతలతో, ఎటువంటి అరమరికలు లేకుండా ఉండాలని జాయింట్ కలెక్టర్ స్పష్టం చేశారు. భూమి సరిహద్దులు, విస్తీర్ణం వంటి వివరాలు సక్రమంగా నమోదై రైతులకు అందేలా అధికారులు ప్రత్యేక శ్రద్ధ తీసుకోవాలని ఆదేశించారు. భూ రికార్డుల్లో పొరపాట్లు లేకుండా ఖచ్చితత్వం పాటించడం రైతుల భవిష్యత్తుకు ఎంతో కీలకమని పేర్కొన్నారు.

అదే విధంగా పట్టాదారు పాస్ పుస్తకాల పంపిణీ విషయంలో కూడా జాయింట్ కలెక్టర్ ప్రత్యేకంగా దృష్టి సారించారు. అర్హులైన ప్రతి రైతుకూ ఎటువంటి తప్పులు లేకుండా పట్టాదారు పాస్ పుస్తకాలు అందేలా చూడాలని అధికారులకు స్పష్టమైన ఆదేశాలు జారీ చేశారు. రైతులకు ప్రభుత్వ సేవలు సకాలంలో, పారదర్శకంగా అందేలా అధికారులు బాధ్యతతో వ్యవహరించాలని సూచించారు.

రాష్ట్ర ప్రభుత్వం చేపడుతున్న రీసర్వే ప్రక్రియ ద్వారా భూ రికార్డుల్లో స్పష్టత రావడంతో పాటు రైతులకు భూములపై పూర్తి హక్కుల భద్రత కలుగుతుందని అధికారులు అభిప్రాయపడుతున్నారు. ఈ ప్రక్రియలో అధికారులు జాగ్రత్తగా వ్యవహరించి రైతులకు ఎటువంటి ఇబ్బందులు కలగకుండా చర్యలు తీసుకోవాలని జాయింట్ కలెక్టర్ సూచించారు.

ఈ కార్యక్రమంలో తహశీల్దార్ డి. రాజేశ్వరరావు, సంబంధిత శాఖల అధికారులు, సిబ్బంది పాల్గొన్నారు.

మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి..