ఆదిలాబాద్ జిల్లాకు వర్ష హెచ్చరిక

పలు మండలాల్లో ఈ సాయంత్రం నుంచి రాత్రి వరకు భారీ వర్షాలు కురిసే అవకాశం

మన భారత్, ఆదిలాబాద్: ఆదిలాబాద్ జిల్లాలోని పలు మండలాల్లో బుధవారం సాయంత్రం నుంచి రాత్రి వరకు మోస్తరు నుంచి భారీ వర్షాలు కురిసే అవకాశం ఉన్నట్లు వాతావరణ సూచనలు వెల్లడిస్తున్నాయి. ప్రజలు అప్రమత్తంగా ఉండాలని, రైతులు మరియు ప్రయాణికులు తగిన జాగ్రత్తలు తీసుకోవాలని అధికారులు సూచిస్తున్నారు.

వాతావరణ అంచనాల ప్రకారం ఇచ్చోడ, నేరడిగొండ, సోనాల, బజరత్నూర్, బోథ్ మండలాల్లో సాయంత్రం 5 గంటల నుంచి రాత్రి 10 గంటల వరకు వర్షం కురిసే అవకాశం ఉంది. ఈ ప్రాంతాల్లో ఉరుములు, మెరుపులతో కూడిన వర్షాలు పడే అవకాశముందని సమాచారం.

అలాగే సిరికొండ, గుడిహత్నూర్ మండలాలు మరియు ఉట్నూర్ ప్రాంతంలో సాయంత్రం 6 గంటల నుంచి రాత్రి 9:30 గంటల వరకు వర్ష సూచన ఉన్నట్లు అంచనా వేస్తున్నారు.

మరోవైపు ఆదిలాబాద్, బేల, బోరజ్, జైనథ్, ఇంద్రవెల్లి, నార్నూర్, గాదిగూడ మండలాల్లో రాత్రి 8 గంటల నుంచి 9:40 గంటల మధ్య భారీ వర్షాలు కురిసే అవకాశం ఉందని వాతావరణ నిపుణులు పేర్కొంటున్నారు.

తాంసి, తలమడుగు మండలాల్లో రెండు విడతలుగా వర్షాలు కురిసే అవకాశం ఉంది. మొదటి విడతలో రాత్రి 7 గంటల నుంచి 7:40 గంటల వరకు, రెండో విడతలో రాత్రి 9 గంటల నుంచి 9:30 గంటల వరకు భారీ వర్షాలు కురిసే అవకాశం ఉందని అంచనా వేస్తున్నారు.

వర్షాల నేపథ్యంలో లోతట్టు ప్రాంతాల ప్రజలు అప్రమత్తంగా ఉండాలని, రైతులు కోతకు సిద్ధంగా ఉన్న పంటలను భద్రపరచుకోవాలని సూచిస్తున్నారు. ఉరుములు, మెరుపుల సమయంలో చెట్ల కింద నిలబడకూడదని, అవసరమైతే మాత్రమే బయటకు రావాలని అధికారులు హెచ్చరిస్తున్నారు.

📲 మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్‌పై క్లిక్ చేయండి.

– గొంటి ముక్కుల ప్రసాద్, రిపోర్టర్, మన భారత్.