మన భారత్, తెలంగాణ:
తెలంగాణ రాష్ట్రంలో భూముల ధరల పెంపునకు ప్రభుత్వం రంగం సిద్ధం చేస్తున్నట్లు సంకేతాలు కనిపిస్తున్నాయి. భూముల మార్కెట్ విలువలను సవరించడంపై సమగ్ర అధ్యయనం చేయాలని రిజిస్ట్రేషన్, స్టాంపుల శాఖ నిర్ణయించింది. ఈ క్రమంలో త్వరలోనే రాష్ట్రవ్యాప్తంగా భూముల విలువలు పెరిగే అవకాశం ఉందని అధికారులు సూచిస్తున్నారు.
గత ఏడాది హైదరాబాద్ నగరంలోని ఔటర్ రింగ్ రోడ్డు (ORR) పరిధిలో భూముల విలువలను సవరించేందుకు ప్రతిపాదనలు సిద్ధం చేసినప్పటికీ, పలు కారణాలతో ప్రభుత్వం ఆ నిర్ణయాన్ని పెండింగ్లో పెట్టింది. అయితే ప్రస్తుతం రాష్ట్రవ్యాప్తంగా భూముల ధరల సవరణపై మళ్లీ చర్చ మొదలుకావడంతో ఈ అంశం ప్రాధాన్యం సంతరించుకుంది.
జీహెచ్ఎంసీ పరిధిలో భూముల విలువల సవరణ జరిగిన తరహాలోనే, రాష్ట్రంలోని అన్ని జిల్లాలు, పట్టణాలు, గ్రామీణ ప్రాంతాల్లోనూ మార్కెట్ విలువలను సవరించాలని డిమాండ్లు వినిపిస్తున్నాయి. ముఖ్యంగా వేగంగా అభివృద్ధి చెందుతున్న ప్రాంతాలు, హైవేలు, ఔటర్ రింగ్ రోడ్ల పరిసరాల్లో భూముల ధరలు ప్రస్తుతం ఉన్న విలువలకు అనుగుణంగా లేవన్న అభిప్రాయం వ్యక్తమవుతోంది.
భూముల విలువలు పెరిగితే రిజిస్ట్రేషన్ ఛార్జీలు, స్టాంప్ డ్యూటీ పెరగనుండటంతో ప్రభుత్వ ఆదాయానికి లాభం చేకూరనుంది. అయితే మరోవైపు రియల్ ఎస్టేట్ రంగంపై దీని ప్రభావం పడే అవకాశం ఉందని వ్యాపార వర్గాలు ఆందోళన వ్యక్తం చేస్తున్నాయి. ముఖ్యంగా సామాన్య ప్రజలు, మధ్యతరగతి వర్గాలకు భూములు, ప్లాట్లు కొనుగోలు చేయడం మరింత భారమయ్యే పరిస్థితి ఏర్పడవచ్చని అభిప్రాయపడుతున్నారు.
భూముల ధరల సవరణపై ప్రభుత్వం ఎలాంటి నిర్ణయం తీసుకుంటుందన్నది రియల్ ఎస్టేట్ రంగంతో పాటు సామాన్య ప్రజల్లోనూ ఆసక్తికరంగా మారింది. సమగ్ర అధ్యయనం అనంతరం తుది నిర్ణయం తీసుకునే అవకాశముందని అధికారులు వెల్లడిస్తున్నారు.