మన భారత్, చెన్నై:
తమిళనాడు రాజకీయాల్లో కీలక పరిణామాలు చోటుచేసుకుంటున్నాయి. తమిళ వెట్రి కళగం (టీవీకే) అధినేత విజయ్ ప్రభుత్వ ఏర్పాటుకు దాదాపు మార్గం సుగమమైనట్లు రాజకీయ వర్గాల్లో చర్చ జరుగుతోంది. అవసరమైన మెజారిటీకి చేరువ కావడంతో ప్రభుత్వం ఏర్పాటు దిశగా విజయ్ వేగంగా అడుగులు వేస్తున్నారు.
తాజా రాజకీయ పరిణామాల్లో సీపీఎం, సీపీఐ, వీసీకే పార్టీలు విజయ్కు మద్దతు ప్రకటించినట్లు సమాచారం. ఇప్పటికే కాంగ్రెస్ పార్టీ కూడా మద్దతు తెలిపిన నేపథ్యంలో టీవీకేకు అవసరమైన 118 మంది సభ్యుల బలం సమీకృతమైనట్లు తెలుస్తోంది.
సభ్యుల బలాబలాల ప్రకారం టీవీకేకు 107 మంది సభ్యులు ఉండగా, కాంగ్రెస్కు చెందిన 5 మంది సభ్యులు, సీపీఎంకు 2 మంది, సీపీఐకి 2 మంది, వీసీకేకు చెందిన మరో 2 మంది సభ్యులు మద్దతు ఇవ్వడంతో మొత్తం సంఖ్య 118కు చేరినట్లు రాజకీయ విశ్లేషకులు చెబుతున్నారు. దీంతో విజయ్ ప్రభుత్వ ఏర్పాటు దిశగా ముందడుగు వేస్తున్నట్లు స్పష్టమవుతోంది.
ఈ నేపథ్యంలో విజయ్ తమిళనాడు గవర్నర్ను కలిసేందుకు అపాయింట్మెంట్ కోరినట్లు సమాచారం. ఇవాళ సాయంత్రం 4.30 గంటలకు గవర్నర్ను కలిసి తనకు మద్దతు ఇస్తున్న ఎమ్మెల్యేల జాబితాను సమర్పించనున్నట్లు తెలుస్తోంది. అనంతరం ప్రభుత్వం ఏర్పాటు చేయాలని అధికారికంగా విజ్ఞప్తి చేయనున్నారని రాజకీయ వర్గాలు పేర్కొంటున్నాయి.
గవర్నర్ను కలిసిన తర్వాత ఏ క్షణమైనా విజయ్ను ప్రభుత్వ ఏర్పాటుకు ఆహ్వానించే అవకాశం ఉందని రాజకీయ వర్గాల్లో ఉత్కంఠ నెలకొంది. తమిళనాడు రాజకీయాల్లో సినీ రంగం నుంచి రాజకీయాల్లోకి వచ్చిన విజయ్ ఎదుగుదలపై దేశవ్యాప్తంగా చర్చ జరుగుతోంది.
విజయ్కు మద్దతుగా వామపక్ష పార్టీలు, ప్రాంతీయ పార్టీలు ముందుకు రావడం తమిళనాడు రాజకీయ సమీకరణాల్లో కీలక మలుపుగా భావిస్తున్నారు. యువత, అభిమానుల్లో విజయ్కు ఉన్న ప్రజాదరణ రాజకీయంగా కూడా ప్రభావం చూపుతోందని విశ్లేషకులు అభిప్రాయపడుతున్నారు.
ప్రభుత్వ ఏర్పాటుకు సంబంధించిన తదుపరి పరిణామాలపై తమిళనాడు ప్రజల్లో ఆసక్తి నెలకొంది. గవర్నర్ నిర్ణయం అనంతరం రాష్ట్ర రాజకీయాల్లో మరిన్ని కీలక మార్పులు చోటుచేసుకునే అవకాశముందని రాజకీయ పరిశీలకులు భావిస్తున్నారు.
మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి..
