మన భారత్, వరంగల్ (నర్సంపేట):
వరంగల్ జిల్లా నర్సంపేటలో ఆర్టీసీ డ్రైవర్ శంకర్ గౌడ్ మృతి నేపథ్యంలో రాష్ట్ర రాజకీయాల్లో ఉద్రిక్తత నెలకొంది. ఈ ఘటనపై బీఆర్ఎస్ నాయకులు తీవ్రంగా స్పందిస్తూ, ప్రభుత్వంపై విమర్శలు గుప్పించారు.
బీఆర్ఎస్ వర్గాలు శంకర్ గౌడ్ మృతిని సాధారణ ఆత్మహత్యగా కాకుండా, ప్రభుత్వ నిర్లక్ష్యం కారణంగా జరిగిన సంఘటనగా అభివర్ణించాయి. రెండున్నరేళ్లుగా ఆర్టీసీ కార్మికుల సమస్యలు పరిష్కారం కాకపోవడం, ఇచ్చిన హామీలు అమలు చేయకపోవడం వల్లే కార్మికులు తీవ్ర నిరాశకు గురయ్యారని పేర్కొన్నారు.
శంకర్ గౌడ్ పార్థివదేహాన్ని నర్సంపేట డిపో వద్దకు తీసుకెళ్లి నివాళులు అర్పించేందుకు అనుమతి ఇవ్వకపోవడంపై ఆగ్రహం వ్యక్తం చేశారు. అలాగే బీఆర్ఎస్ మాజీ ఎమ్మెల్యే పెద్ది సుదర్శన్ రెడ్డి సహా పార్టీ నాయకులు, కార్మిక సంఘాల ప్రతినిధులను పోలీసులు అరెస్టు చేయడాన్ని ఖండించారు. రాష్ట్రంలోని పలు ప్రాంతాల్లో అరెస్టు చేసిన వారిని బేషరతుగా విడుదల చేయాలని డిమాండ్ చేశారు.
మృతుని కుటుంబానికి రూ.1 కోటి పరిహారం చెల్లించడంతో పాటు కుటుంబ సభ్యుల్లో ఒకరికి ప్రభుత్వ ఉద్యోగం కల్పించాలని బీఆర్ఎస్ డిమాండ్ చేసింది. ఆర్టీసీ కార్మికుల న్యాయమైన డిమాండ్లను వెంటనే పరిష్కరించాలని, ప్రభుత్వంతో చర్చలు జరిపి సమస్యలకు శాశ్వత పరిష్కారం చూపాలని కోరింది.
ఇటీవల రాష్ట్రంలో వరుసగా ఆర్టీసీ డ్రైవర్లు ఆత్మహత్యాయత్నాలకు పాల్పడిన ఘటనలను ప్రస్తావిస్తూ, ఇది తెలంగాణలో కార్మిక వర్గం ఎదుర్కొంటున్న పరిస్థితులకు నిదర్శనమని పేర్కొన్నారు. కార్మికులు మనోధైర్యాన్ని కోల్పోకుండా తమ హక్కుల కోసం సంఘటితంగా పోరాడాలని పిలుపునిచ్చారు.
ఈ పరిణామాలతో రాష్ట్రంలో ఆర్టీసీ కార్మికుల సమస్యలు మరోసారి ప్రధాన చర్చనీయాంశంగా మారాయి.
