మన భారత్, తెలంగాణ:
ఆర్టీసీ కార్మికుడు శంకర్ గౌడ్ మృతి రాష్ట్రవ్యాప్తంగా చర్చనీయాంశంగా మారింది. ఈ నేపథ్యంలో బీఆర్ఎస్ నేతలు కేటీఆర్, హరీష్ రావు శంకర్ గౌడ్ మృతిపై తీవ్ర ఆవేదన వ్యక్తం చేస్తూ ఆయనకు నివాళులు అర్పించారు.
ఈ సందర్భంగా కేటీఆర్ మాట్లాడుతూ, శంకర్ గౌడ్ మృతి సాధారణ ఆత్మహత్య కాదని, ప్రభుత్వ నిర్లక్ష్యం కారణంగా జరిగిన సంఘటనగా అభివర్ణించారు. రెండున్నరేళ్లుగా ఆర్టీసీ కార్మికులకు ఇచ్చిన హామీలను అమలు చేయకపోవడం వల్లే ఈ పరిస్థితి ఏర్పడిందని ఆరోపించారు. మృతదేహాన్ని నర్సంపేట డిపో వద్దకు తీసుకెళ్లి నివాళులు అర్పించేందుకు అనుమతి ఇవ్వకపోవడం దురదృష్టకరమని విమర్శించారు.
అదేవిధంగా శంకర్ గౌడ్ కుటుంబానికి రూ.1 కోటి పరిహారం అందించడంతో పాటు కుటుంబ సభ్యుల్లో ఒకరికి ప్రభుత్వ ఉద్యోగం కల్పించాలని డిమాండ్ చేశారు. బాధిత కుటుంబానికి అన్ని విధాలా సహాయం అందించాలని ప్రభుత్వాన్ని కోరారు.
హరీష్ రావు కూడా ఈ ఘటనపై స్పందిస్తూ, శంకర్ గౌడ్ మృతికి ప్రభుత్వ విధానాలే కారణమని విమర్శించారు. అధికారంలోకి వచ్చినప్పుడు ఆర్టీసీ విలీన ప్రక్రియ పూర్తి చేస్తామని ఇచ్చిన హామీని అమలు చేయకపోవడం వల్ల కార్మికులు తీవ్ర నిరాశకు గురవుతున్నారని అన్నారు. ఆర్టీసీ కార్మికుల సమస్యలను వెంటనే పరిష్కరించాలని డిమాండ్ చేశారు.
శంకర్ గౌడ్ త్యాగాన్ని గుర్తిస్తూ ఆయన మరణించిన రోజును “అప్పాయింటెడ్ డే”గా ప్రకటించాలని కూడా ప్రభుత్వాన్ని కోరారు. ఈ ఘటనతో రాష్ట్ర రాజకీయాల్లో ఆర్టీసీ కార్మికుల సమస్యలు మరోసారి ప్రధాన అంశంగా మారాయి.
మీ చుట్టుపక్కల వార్తలు పంపేందుకు క్రింద ఉన్న వాట్సాప్ నెంబర్ పై క్లిక్ చేయండి..
