మన భారత్, తెలంగాణ:
రాష్ట్రంలోని అంగన్వాడీ చిన్నారుల పోషణకు ప్రాధాన్యత ఇస్తూ ప్రభుత్వం కీలక నిర్ణయం తీసుకుంది. అసెంబ్లీ ప్రాంగణంలో ముఖ్యమంత్రి రేవంత్ రెడ్డి ‘తొలి ముద్ద’ అనే బ్రేక్‌ఫాస్ట్ పథకాన్ని ప్రారంభించారు. ఈ పథకం ద్వారా ఆరేళ్లలోపు చిన్నారులకు ప్రతిరోజూ ఉదయం పౌష్టికాహారం అందించనున్నారు.
ఈ సందర్భంగా ముఖ్యమంత్రి మాట్లాడుతూ, చిన్నారుల మానసిక, శారీరక అభివృద్ధికి పౌష్టికాహారం ఎంతో అవసరమని తెలిపారు. బాల్యంలో సరైన ఆహారం అందకపోవడం వల్లే అనేక అనారోగ్య సమస్యలు వస్తున్నాయని ఆయన పేర్కొన్నారు. ఈ సమస్యలను దృష్టిలో ఉంచుకుని ప్రభుత్వం ‘తొలి ముద్ద’ పథకాన్ని అమలు చేస్తున్నట్లు వెల్లడించారు.
ఈ పథకం కింద అంగన్వాడీ కేంద్రాల్లో చిన్నారులకు రెడీ టూ కుక్ ఆహార పదార్థాలను అందించనున్నారు. ముఖ్యంగా ఉప్మా, కిచిడీ మిక్స్ వంటి పోషక విలువలు కలిగిన ఆహారాన్ని బ్రేక్‌ఫాస్ట్‌గా అందిస్తారు. దీని ద్వారా పిల్లల ఆరోగ్యం మెరుగుపడటంతో పాటు వారి ఎదుగుదలకు తోడ్పడుతుందని అధికారులు భావిస్తున్నారు.
ప్రభుత్వం చేపట్టిన ఈ చర్య చిన్నారుల ఆరోగ్యంపై సానుకూల ప్రభావం చూపుతుందని నిపుణులు అభిప్రాయపడుతున్నారు. గ్రామీణ, పట్టణ ప్రాంతాల్లోని అంగన్వాడీ కేంద్రాల ద్వారా ఈ పథకాన్ని అమలు చేయనున్నారు.
చిన్నారుల ఆరోగ్యం, భవిష్యత్తు దృష్ట్యా ‘తొలి ముద్ద’ పథకం కీలకంగా మారనుందని ప్రభుత్వం భావిస్తోంది.
