మన భారత్, హైదరాబాద్:
తెలంగాణ రాష్ట్ర క్యాబినెట్ కీలక నిర్ణయం తీసుకుంది. అసెంబ్లీలో ప్రవేశపెట్టనున్న ఏడు ముఖ్యమైన బిల్లులకు క్యాబినెట్ ఆమోదం తెలిపింది. ఈ బిల్లులు సామాజిక భద్రత, న్యాయ పరిరక్షణ, కార్మిక సంక్షేమం వంటి విభిన్న అంశాలను స్పృశిస్తున్నాయి.
క్యాబినెట్ ఆమోదించిన బిల్లుల్లో ముఖ్యంగా తల్లిదండ్రులను పట్టించుకోని ప్రభుత్వ, ప్రైవేటు ఉద్యోగుల జీతాల నుంచి 10-15 శాతం వరకు కోత విధించి ఆ మొత్తాన్ని నేరుగా వారి తల్లిదండ్రుల ఖాతాల్లో జమ చేసే ప్రతిపాదన ప్రత్యేకంగా నిలిచింది. వృద్ధుల సంక్షేమాన్ని దృష్టిలో ఉంచుకుని ఈ బిల్లు తీసుకురానున్నట్లు తెలుస్తోంది.
అదేవిధంగా విద్వేషపూరిత ప్రసంగాలు, నేరాల నియంత్రణకు సంబంధించి ప్రత్యేక బిల్లు, గిగ్ వర్కర్ల హక్కులను రక్షించే బిల్లు, న్యాయవాదుల భద్రత కోసం అడ్వకేట్ ప్రొటెక్షన్ బిల్లు వంటి కీలక చట్టాలకు కూడా ఆమోదం లభించింది. ఇవి అమల్లోకి వస్తే వివిధ వర్గాలకు రక్షణ, భద్రత మరింత బలోపేతం అవుతుందని ప్రభుత్వం భావిస్తోంది.
ఇక ప్రముఖ అంశమైన రోహిత్ వేముల చట్టం రూపకల్పనపై కూడా క్యాబినెట్ దృష్టి సారించింది. ఈ చట్టానికి సంబంధించిన విధివిధానాలను రూపొందించేందుకు డిప్యూటీ సీఎం భట్టి విక్రమార్క అధ్యక్షతన ప్రత్యేక క్యాబినెట్ సబ్ కమిటీని ఏర్పాటు చేసింది. ఈ కమిటీ సమగ్ర నివేదికను సిద్ధం చేసి ప్రభుత్వానికి సమర్పించనుంది.
ఈ బిల్లులు త్వరలో అసెంబ్లీలో ప్రవేశపెట్టి చర్చ అనంతరం ఆమోదం పొందే అవకాశముంది. రాష్ట్రంలో పాలన, సామాజిక న్యాయం, సంక్షేమం బలోపేతానికి ఈ చట్టాలు దోహదపడతాయని అధికార వర్గాలు భావిస్తున్నాయి.
