మన భారత్, హైదరాబాద్:
తెలంగాణలో దివ్యాంగులకు కాంగ్రెస్ మేనిఫెస్టోలో ఇచ్చిన హామీలను తక్షణమే అమలు చేయాలని తెలంగాణ దివ్యాంగుల సంఘం నాయకులు ప్రభుత్వాన్ని డిమాండ్ చేశారు. ఈ మేరకు వారు హైదరాబాద్‌లో బీజేఎల్పీ డిప్యూటీ ఫ్లోర్ లీడర్, ఆదిలాబాద్ ఎమ్మెల్యే పాయల్ శంకర్‌ను మర్యాదపూర్వకంగా కలిసి తమ సమస్యలను వివరించారు.
ఈ సందర్భంగా దివ్యాంగులకు సంబంధించిన రిజర్వేషన్లను సమర్థవంతంగా అమలు చేయాలని, నెలవారీ పెన్షన్ మొత్తాన్ని పెంచాలని, అలాగే పెన్షన్ కోసం దరఖాస్తు చేసుకున్న అర్హులందరికీ వెంటనే మంజూరు చేయాలని నాయకులు కోరారు. ప్రస్తుతం అనేక మంది దివ్యాంగులు పెన్షన్ కోసం ఎదురుచూస్తున్నారని, వారి సమస్యలను అత్యవసరంగా పరిష్కరించాలని విజ్ఞప్తి చేశారు.
దివ్యాంగులు ఎదుర్కొంటున్న ఉపాధి, వైద్యం, విద్య వంటి ఇతర సమస్యలను కూడా ప్రభుత్వం దృష్టిలోకి తీసుకుని తక్షణ చర్యలు చేపట్టాలని వారు తెలిపారు. తమ హక్కుల కోసం ఎన్నో సంవత్సరాలుగా పోరాటం చేస్తున్నప్పటికీ ఇంకా పూర్తి స్థాయిలో న్యాయం జరగలేదని ఆవేదన వ్యక్తం చేశారు.
ఈ విషయాలన్నింటినీ తమ తరఫున శాసనసభలో ప్రస్తావించి, ప్రభుత్వం దృష్టికి తీసుకెళ్లి పరిష్కారం కోసం కృషి చేయాలని పాయల్ శంకర్‌ను వినతిపత్రం ద్వారా కోరారు. దివ్యాంగుల సంక్షేమం కోసం అన్ని విధాలుగా పోరాడుతామని ఆయన హామీ ఇచ్చినట్లు సమాచారం.
ప్రస్తుతం ఈ అంశం రాజకీయంగా కూడా ప్రాధాన్యత సంతరించుకుంటుండగా, ప్రభుత్వం దీనిపై ఎలా స్పందిస్తుందన్నది ఆసక్తికరంగా మారింది.
