మన భారత్, హైదరాబాద్:
తెలంగాణ ప్రభుత్వం ప్రవేశపెట్టిన తాజా బడ్జెట్లో సంక్షేమ పథకాల అమలుకు భారీగా నిధులు కేటాయించింది. ముఖ్యంగా ప్రజలకు ఇచ్చిన 6 గ్యారంటీల అమలుపై దృష్టి సారిస్తూ మొత్తం ₹50,713 కోట్లను ప్రభుత్వం కేటాయించడం విశేషం. రైతులు, మహిళలు, విద్యార్థులు, నిరుద్యోగులు వంటి అన్ని వర్గాల అభివృద్ధిని దృష్టిలో ఉంచుకుని ఈ బడ్జెట్ రూపుదిద్దుకుంది.
రైతుల సంక్షేమానికి కీలకమైన “రైతు భరోసా” పథకానికి ₹18,000 కోట్లు కేటాయించారు. అలాగే మహిళల సాధికారత కోసం “చేయుత” పథకానికి ₹14,861 కోట్లు కేటాయించారు. పేదల గృహ అవసరాలను తీర్చేందుకు “ఇందిరమ్మ ఇండ్లు” పథకానికి ₹5,500 కోట్లు ఇవ్వడం జరిగింది. మహిళలకు ఆర్థిక భరోసా కల్పించే “మహాలక్ష్మి” పథకానికి ₹4,305 కోట్లు కేటాయించారు. వ్యవసాయ రంగానికి ప్రోత్సాహం అందించే విధంగా సన్న వడ్ల బోనస్కు ₹3,500 కోట్లు, పంట బీమా పథకానికి ₹1,886 కోట్లు కేటాయించారు. ఉచిత విద్యుత్ సరఫరా కింద “గృహ జ్యోతి” పథకానికి ₹2,080 కోట్లు, విద్యుత్ సబ్సిడీకి మొత్తం ₹14,000 కోట్లు కేటాయించడం గమనార్హం.
ఆరోగ్య రంగంలో “రాజీవ్ ఆరోగ్య శ్రీ”కి ₹1,143 కోట్లు, ఎంప్లాయిస్ హెల్త్ స్కీంకు ₹1,056 కోట్లు కేటాయించారు. పేదలకు బియ్యం సబ్సిడీకి ₹3,000 కోట్లు, కల్యాణలక్ష్మి/షాది ముబారక్ పథకాలకు ₹3,683 కోట్లు కేటాయించారు. విద్యారంగంలో విద్యార్థుల డైట్ ఛార్జీలకు ₹2,170 కోట్లు, స్కాలర్షిప్లకు ₹4,343 కోట్లు కేటాయించడం ద్వారా విద్యార్థులకు పెద్దపీట వేశారు. యంగ్ ఇండియా ఇంటర్నేషనల్ స్కూల్ ఏర్పాటుకు ₹5,000 కోట్లు, ఉస్మానియా యూనివర్సిటీ అభివృద్ధికి ₹1,000 కోట్లు కేటాయించారు.
అభివృద్ధి కార్యక్రమాల్లో భాగంగా పంచాయతీరాజ్ రోడ్లకు ₹2,062 కోట్లు, రోడ్లు భవనాల శాఖకు ₹6,416 కోట్లు, హ్యాంమ్ రోడ్లకు ₹3,053 కోట్లు, రీజనల్ రింగ్ రోడ్డుకు ₹1,525 కోట్లు కేటాయించారు. మూసి రివర్ ఫ్రంట్ అభివృద్ధికి ₹1,500 కోట్లు, CURE ఏరియా అభివృద్ధికి ₹2,654 కోట్లు కేటాయించడం జరిగింది. ఇతర ముఖ్య పథకాలలో రాజీవ్ యువ వికాసానికి ₹5,800 కోట్లు, ఇందిరమ్మ కుటుంబ జీవిత బీమాకు ₹4,000 కోట్లు, LPG సబ్సిడీకి ₹723 కోట్లు, ఇందిరమ్మ ఆత్మీయ భరోసాకు ₹600 కోట్లు కేటాయించారు. ఎస్సీ కాలనీల్లో మౌలిక వసతుల కోసం ₹1,500 కోట్లు కేటాయించడం కూడా ప్రత్యేకతగా నిలిచింది.
మొత్తంగా ఈ బడ్జెట్లో సంక్షేమం మరియు అభివృద్ధి రెండింటికీ సమతుల్యత పాటిస్తూ ప్రభుత్వం ముందుకు వెళ్లే దిశగా చర్యలు తీసుకుంది.
