మన భారత్, న్యూఢిల్లీ:
గ్రామీణ అభివృద్ధి కార్యక్రమాలకు కొత్త రూపం ఇవ్వాలనే లక్ష్యంతో కేంద్ర ప్రభుత్వం ప్రత్యేక చర్యలు చేపడుతోంది. ఇందులో భాగంగా కొత్తగా ప్రవేశపెట్టిన వీబీ జీ రామ్ జీ స్కీమ్ కు లోగో రూపొందించేందుకు కేంద్రం పోటీని ప్రకటించింది. ఈ పోటీలో విజేతగా నిలిచిన వారికి ₹50 వేల నగదు బహుమతి అందజేయనున్నట్లు అధికారులు వెల్లడించారు.
ఈ స్కీమ్ను ప్రస్తుతం అమల్లో ఉన్న మహాత్మా గాంధీ జాతీయ గ్రామీణ ఉపాధి హామీ పథకం స్థానంలో తీసుకొచ్చినట్లు కేంద్ర వర్గాలు పేర్కొంటున్నాయి. గ్రామీణ ప్రాంతాల్లో ఉపాధి అవకాశాలను మరింత విస్తరించడమే ఈ పథకం ప్రధాన లక్ష్యంగా ఉంది.
లోగో డిజైన్ పోటీలో పాల్గొనాలనుకునే వారు MyGov వెబ్సైట్లో మొబైల్ నంబర్ లేదా ఇమెయిల్ ఐడీతో లాగిన్ అయి తమ డిజైన్ను సమర్పించాల్సి ఉంటుంది. ఈ పోటీలో పాల్గొనడానికి మార్చి 20 చివరి తేదీగా నిర్ణయించారు. దేశవ్యాప్తంగా ఉన్న యువత, డిజైనర్లు, సృజనాత్మక ప్రతిభ కలిగిన వారు ఈ అవకాశాన్ని వినియోగించుకోవాలని కేంద్ర ప్రభుత్వం సూచించింది.
ఇక ‘వీబీ జీ రామ్ జీ’ స్కీమ్లో భాగంగా గ్రామీణ కార్మికులకు ఇచ్చే పని దినాలను 100 రోజుల నుంచి 125 రోజులకు పెంచినట్లు సమాచారం. దీని ద్వారా గ్రామీణ ప్రాంతాల్లో ఉపాధి అవకాశాలు పెరిగి, ప్రజల జీవనోపాధి మెరుగుపడుతుందని అధికారులు పేర్కొంటున్నారు.
ఈ పోటీ ద్వారా కొత్త సృజనాత్మక లోగోను ఎంపిక చేయడంతో పాటు యువత ప్రతిభకు ప్రోత్సాహం లభిస్తుందని ప్రభుత్వం భావిస్తోంది.
