పబ్లిక్ పరీక్షల సందర్భంగా విద్యార్థులకు ఆర్టీసీ బస్సుల్లో ఉచిత ప్రయాణం
మన భారత్, ఆంధ్ర ప్రదేశ్:
రాష్ట్రంలోని విద్యార్థులకు ప్రభుత్వం శుభవార్త అందించింది. పబ్లిక్ పరీక్షల సమయంలో హాల్ టికెట్ చూపిస్తే ఆర్టీసీ బస్సుల్లో ఉచితంగా ప్రయాణించే సౌకర్యం కల్పిస్తున్నట్లు రాష్ట్ర మంత్రి మండిపల్లి రాంప్రసాద్ రెడ్డి అసెంబ్లీలో వెల్లడించారు.
ఇంటర్ విద్యార్థులకు ఇప్పటికే అమలు
ప్రస్తుతం జరుగుతున్న ఇంటర్మీడియట్ పరీక్షల సందర్భంగా విద్యార్థులు తమ హాల్ టికెట్ను చూపించి ఆర్టీసీ బస్సుల్లో ఉచితంగా ప్రయాణించవచ్చని ప్రభుత్వం స్పష్టం చేసింది. పరీక్షా కేంద్రాలకు సమయానికి చేరుకునేలా ఈ నిర్ణయం తీసుకున్నట్లు తెలిపారు.
టెన్త్ విద్యార్థులకు కూడా అవకాశం?
ఇంటర్ విద్యార్థులకు అందిస్తున్న ఈ సౌకర్యాన్ని టెన్త్ విద్యార్థులకు కూడా కొనసాగించే అవకాశాన్ని ప్రభుత్వం పరిశీలిస్తోంది. గతేడాది కూడా ఇదే విధంగా ఫ్రీ జర్నీ అమలు చేసి వేలాది మంది విద్యార్థులకు లాభం చేకూర్చిన విషయం గుర్తు చేశారు.
పరీక్షల సమయంలో ఉపశమనం
పరీక్షల సమయంలో ప్రయాణ ఖర్చుల భారం తగ్గించడం, గ్రామీణ ప్రాంతాల నుంచి వచ్చే విద్యార్థులకు సౌలభ్యం కల్పించడం ఈ నిర్ణయానికి ముఖ్య ఉద్దేశ్యమని అధికారులు తెలిపారు. విద్యార్థులు హాల్ టికెట్ తప్పనిసరిగా వెంట తీసుకెళ్లాలని సూచించారు.
పరీక్షల ఒత్తిడి మధ్య ప్రభుత్వం తీసుకున్న ఈ నిర్ణయం విద్యార్థులకు కొంత ఉపశమనం కలిగించనుంది.
