ఉచిత నట శిక్షణ శిబిరం.. కళాకారులకు సువర్ణావకాశం

మార్చి 1, 2 తేదీల్లో ఆదిలాబాద్‌లో ఆడిషన్స్..

20 మంది నటులతో పాటు వాద్యకారుల ఎంపిక

మన భారత్, ఆదిలాబాద్:

రంగస్థల కళాకారులకు అరుదైన అవకాశం లభించనుంది. పద్మశ్రీ అవార్డు నామిని–2026గా గుర్తింపు పొందిన ప్రముఖ నాటక దర్శకుడు, రంగస్థల ప్రముఖుడు శ్రీ దెంచనాల శ్రీనివాస్ (హైదరాబాద్) ఆధ్వర్యంలో ఉచిత నట శిక్షణ శిబిరం నిర్వహించనున్నారు. తెలుగు రాష్ట్రాలతో పాటు దేశవ్యాప్తంగా అనేక నాటకాలను విజయవంతంగా ప్రదర్శింపజేసిన ఆయన, ఈసారి ఆదిలాబాద్ జిల్లా కళాకారులతో ప్రత్యేక నాటకం రూపొందించాలని సంకల్పించారు.

రెండు రోజుల ఆడిషన్స్

ఈ నేపథ్యంలో మార్చి 1 మరియు 2 తేదీల్లో ఆదిలాబాద్‌లో ఆడిషన్స్ నిర్వహించి కళాకారుల ఎంపిక చేయనున్నారు. మొత్తం 15 మంది పురుషులు, 5 మంది మహిళా నటులను ఎంపిక చేయనున్నట్లు నిర్వాహకులు తెలిపారు. అదనంగా కీబోర్డ్ ప్లేయర్, హార్మోనిస్ట్, తబలా మరియు డోలక్ వాద్యకారులు కూడా అవసరమని వెల్లడించారు.

ఉచిత శిక్షణ – వసతి, భోజన సౌకర్యం

ఎంపికైన కళాకారులకు పూర్తిగా ఉచితంగా శిక్షణ అందించబడుతుంది. ప్రాక్టీస్ మరియు ప్రదర్శన సమయంలో భోజనం, వసతి సౌకర్యాలు కల్పించబడతాయి. అనుభవం ఉన్న కళాకారులకు రెమ్యూనరేషన్ కూడా ఇవ్వబడుతుందని నిర్వాహకులు స్పష్టం చేశారు. రంగస్థలంపై ఆసక్తి, అనుభవం ఉన్నవారు ఈ అవకాశాన్ని వినియోగించుకోవాలని సూచించారు.

వెంటనే సంప్రదించండి

ఆసక్తి గల కళాకారులు మరిన్ని వివరాల కోసం వెంటనే సంప్రదించవచ్చు:

శ్రీనివాస్ దెంచనాల: 98483 26517

సుకుమార్ పెట్కులే : 91827 26300

రంగస్థల కళను ప్రేమించే వారికి ఇది నిజంగా సువర్ణావకాశమని కళా వర్గాలు అభిప్రాయపడుతున్నాయి.