తొలివిడతగా హౌస్ లిస్టింగ్ & హౌసింగ్ సెన్సెస్
మన భారత్ న్యూఢిల్లీ:
దేశవ్యాప్తంగా జరగనున్న జనగణన–2027 తొలి విడతకు సంబంధించిన ప్రశ్నావళికి రాష్ట్ర మంత్రివర్గం సోమవారం ఆమోదం తెలిపింది. మొత్తం 33 ప్రశ్నలతో హౌస్ లిస్టింగ్ అండ్ హౌసింగ్ సెన్సెస్ నిర్వహించేందుకు అధికార యంత్రాంగం సన్నద్ధమవుతోంది. సాధారణంగా వేసవి సెలవుల సమయంలో ఈ ప్రక్రియను చేపడతారు.
జనగణన ప్రక్రియను కేంద్ర హోం మంత్రిత్వ శాఖ పరిధిలోని Registrar General of India పర్యవేక్షిస్తుంది. రాష్ట్రాల వారీగా జనగణన విభాగం సంచాలకులు అమలు చర్యలను సమన్వయం చేస్తారు.
ప్రతి ఇంటికీ సిబ్బంది…
తొలి విడతలో భాగంగా జనగణన సిబ్బంది ప్రతి ఇంటిని సందర్శించి నిర్దేశిత ఫార్మాట్ ప్రకారం సమాచారం సేకరిస్తారు. మొత్తం 33 రకాల ప్రశ్నలకు సమాధానాలు తీసుకోవాలని కేంద్ర ప్రభుత్వం స్పష్టమైన మార్గదర్శకాలు జారీ చేసింది. యజమానితో పాటు ఇంటి నిర్మాణ విధానం, గదుల సంఖ్య, తాగునీరు–మరుగుదొడ్లు వంటి సదుపాయాలు, వాహనాల వివరాలు (కార్లు, మోటార్ సైకిళ్లు) వంటి అంశాలపై సమాచారం ఇవ్వాల్సి ఉంటుంది.
ఈ వివరాలు ఎందుకు కీలకం?
జనగణన గణాంకాల ఆధారంగానే కేంద్ర, రాష్ట్ర ప్రభుత్వాలు అభివృద్ధి–సంక్షేమ పథకాల అమలు వ్యూహాలు రూపొందిస్తాయి. రిజర్వేషన్ల అమలు, నియోజకవర్గాల పునర్విభజన (డీలిమిటేషన్), మౌలిక వసతుల ప్రణాళిక వంటి కీలక నిర్ణయాలకు జనగణన సమాచారం ప్రామాణికంగా ఉపయోగపడుతుంది.
దేశంలో చివరిసారిగా జనగణన 2011లో జరిగింది. 2021లో జరగాల్సిన ప్రక్రియ కోవిడ్–19 కారణంగా వాయిదా పడింది. తాజాగా ప్రారంభమైన సెన్సెస్–2027లో ఎన్యూమరేటర్లు మొబైల్ ఫోన్ల ద్వారా ప్రత్యేక యాప్/పోర్టల్ సాయంతో వివరాలు సేకరించనున్నారు. డిజిటల్ విధానంలో డేటా సేకరణకు ప్రాధాన్యం ఇవ్వడం విశేషం.
జనగణన–2027 దేశ అభివృద్ధి దిశను నిర్దేశించే కీలక దశగా మారనుంది.
