కాంగ్రెస్ మహిళా మంత్రులకు కేసీఆర్ ఆత్మీయ పలకరింపు
మన భారత్ హైదరాబాద్:
మేడారం సమ్మక్క–సారలమ్మ మహా జాతర నేపథ్యంలో తెలంగాణ రాజకీయ వేదికపై ఆత్మీయ వాతావరణం నెలకొంది. గురువారం ఎర్రవెల్లి నివాసంలో ప్రధాన ప్రతిపక్ష నేత, మాజీ ముఖ్యమంత్రి కల్వకుంట్ల చంద్రశేఖర్ రావును కాంగ్రెస్ మహిళా మంత్రులు కొండా సురేఖ, దనసరి సీతక్క మర్యాదపూర్వకంగా కలిశారు. ఈ సందర్భంగా కేసీఆర్ గారు వారికి సంప్రదాయ అతిథి మర్యాదలతో ఘన స్వాగతం పలికారు.
ఇంటికి వచ్చిన ఆడబిడ్డలుగా భావించిన కేసీఆర్, పసుపు–కుంకుమలు, చీరలు, తాంబూలాలు అందజేసి సంప్రదాయ సత్కారం నిర్వహించారు. తెలంగాణ సంస్కృతి, సంప్రదాయాలకు ప్రతీకగా నిలిచే ఈ సత్కారం రాజకీయ భేదాలను దాటి ఆత్మీయతకు నిదర్శనంగా కనిపించింది.
మరికొద్ది రోజుల్లో ప్రారంభం కానున్న మేడారం సమ్మక్క–సారలమ్మ మహా జాతరను కేసీఆర్ గారు సందర్శించాల్సిందిగా మంత్రులు ప్రభుత్వ తరఫున ఆహ్వానించారు. రాష్ట్రంలో అతిపెద్ద గిరిజన జాతరగా పేరుగాంచిన మేడారం జాతరకు అన్ని వర్గాల ప్రజలు హాజరవుతారని, ఈ పర్వదినాన్ని మరింత ఘనంగా నిర్వహించేందుకు ప్రభుత్వం చర్యలు చేపట్టిందని వారు వివరించారు.
ఈ భేటీలో జాతర ఏర్పాట్లు, భక్తులకు కల్పించాల్సిన సౌకర్యాలు, సంప్రదాయాల పరిరక్షణ వంటి అంశాలపై స్నేహపూర్వకంగా చర్చ జరిగినట్లు సమాచారం. రాజకీయాల్లో పరస్పర గౌరవం, సామాజిక సంప్రదాయాల విలువను చాటేలా ఈ సమావేశం సాగిందని పలువురు అభిప్రాయపడుతున్నారు.