గ్రామాభివృద్ధే ధ్యేయం.. కజ్జర్ల సర్పంచ్గా ఎల్మ నారాయణరెడ్డి ప్రమాణ స్వీకారం
మన భారత్, తలమడుగు: తలమడుగు మండలంలోని కజ్జర్ల గ్రామానికి నూతన సర్పంచ్గా ఎల్మ నారాయణరెడ్డి అధికారికంగా ప్రమాణ స్వీకారం చేశారు. ఈ సందర్భంగా నిర్వహించిన కార్యక్రమం గ్రామంలో పండుగ వాతావరణాన్ని తలపించింది. గ్రామస్తులు, స్థానిక నాయకులు, ప్రజాప్రతినిధులు పెద్ద సంఖ్యలో హాజరై నూతన పాలకవర్గానికి శుభాకాంక్షలు తెలిపారు.
ఈ సందర్భంగా సర్పంచ్ ఎల్మ నారాయణరెడ్డి మాట్లాడుతూ, గ్రామాభివృద్ధే తన ప్రధాన లక్ష్యమని స్పష్టం చేశారు. కజ్జర్ల గ్రామం ఎదుర్కొంటున్న మౌలిక సమస్యల పరిష్కారానికి తొలి ప్రాధాన్యం ఇస్తానని తెలిపారు. ముఖ్యంగా తాగునీరు, రహదారులు, పారిశుద్ధ్యం, విద్యుత్, పాఠశాలల అభివృద్ధిపై దృష్టి సారిస్తానని పేర్కొన్నారు. ప్రభుత్వ పథకాలు అర్హులైన ప్రతి కుటుంబానికి చేరేలా పారదర్శకంగా అమలు చేస్తానని హామీ ఇచ్చారు.
అలాగే గ్రామ పాలనలో ప్రజల భాగస్వామ్యాన్ని పెంచుతూ, ప్రతి నిర్ణయం గ్రామసభల ద్వారా తీసుకుంటానని తెలిపారు. గ్రామ పెద్దలు, యువత, మహిళల సహకారంతో కజ్జర్లను అభివృద్ధి బాటలో ముందుకు తీసుకెళ్లేందుకు నిరంతరం శ్రమిస్తానని అన్నారు.
ఈ సందర్భంగా పాఠశాల ఉపాధ్యాయులు సర్పంచ్ ఎల్మ నారాయణరెడ్డిని శాలువాలతో ఘనంగా సత్కరించారు. అనంతరం గ్రామ ప్రజల సౌకర్యార్థం మహా అన్నదాన కార్యక్రమాన్ని నిర్వహించారు. ఈ కార్యక్రమంలో సర్పంచ్తో పాటు ఉప సర్పంచ్ అగ్గిమల్ల గంగన్న, వార్డు సభ్యులు, స్థానిక నాయకులు, గ్రామ పెద్దలు, కార్యకర్తలు తదితరులు పాల్గొని కార్యక్రమాన్ని విజయవంతం చేశారు.