సిరిసిల్లలో విషాదం… తల్లి మృతదేహం చూసి అదే నదిలో దూకిన కానిస్టేబుల్

సిరిసిల్లలో విషాదం… తల్లి మృతదేహం చూసి అదే నదిలో దూకిన కానిస్టేబుల్; ఇద్దరి ఆత్మహత్యతో కుటుంబంలో శోకం

మన భారత్ ,సిరిసిల్ల : సిరిసిల్ల జిల్లా తంగళ్లపల్లి మండల కేంద్రంలో తల్లి–కొడుకుల ఆత్మహత్య ఘటనతో ప్రాంతం విషాదంలో మునిగిపోయింది. మానసిక ఆందోళనతో నదిలో దూకిన తల్లి మృతదేహాన్ని చూసిన కొడుకు తీవ్ర షాక్‌కు గురై అదే నదిలో దూకి ప్రాణాలు కోల్పోయాడు.

తల్లి కనిపించకపోవడంతో ఆందోళన చెందిన కొడుకు

తంగళ్లపల్లి పోలీస్ స్టేషన్‌లో కానిస్టేబుల్‌గా పనిచేస్తున్న అభిలాష్ (34), తన తల్లి మంచికట్ల లలిత (56)తో కలిసి నివాసం ఉంటున్నాడు. గురువారం రాత్రి విధులు ముగించుకుని ఇంటికి వచ్చిన అభిలాష్‌కు తల్లి కనిపించలేదు. తీవ్ర ఆందోళనకు గురైన ఆయన వెంటనే పోలీసులకు ఫిర్యాదు చేయగా, గాలింపు చర్యలు ప్రారంభమయ్యాయి.

మానేరు నదిలో లభించిన తల్లి మృతదేహం

శుక్రవారం ఉదయం ఎల్లమ్మ దేవాలయం సమీపంలోని మానేరు నదిలో లభించిన మహిళ మృతదేహం, లలితదేనని కుటుంబసభ్యులు గుర్తించారు. మానసిక సమస్యలతో బాధపడుతున్న తల్లి ఆవేదనతో నదిలో దూకి ఆత్మహత్యకు పాల్పడినట్లు పోలీసులు అనుమానిస్తున్నారు.

తల్లిని కోల్పోయిన షాక్‌… అదే నదిలో దూకిన అభిలాష్

తల్లి మృతదేహం కనిపించిందనే వార్త వినగానే అభిలాష్ తీవ్ర మానసిక షాక్‌కు గురయ్యాడు. బంధువులు, పోలీసులు ఉన్నప్పుడే ఆవేదనతో అదే నదిలోకి దూకి ప్రాణాలొదిలాడు. వెంటనే గాలింపు చర్యలు ప్రారంభించిన ఎస్డీఆర్ఎఫ్ బృందాలు దాదాపు రెండు గంటల కష్టపడి అభిలాష్ మృతదేహాన్ని వెలికితీశాయి.

ఈ ఘటనతో కుటుంబ సభ్యులు, సహచరులు, గ్రామస్థులు శోకసంద్రంలో మునిగిపోయారు. తల్లి–కొడుకు ఒకేసారి జీవితాలను కోల్పోవడం స్థానికంగా తీవ్ర వేదన కలిగిస్తోంది.