ఆ మెసేజ్‌తో దొరికిపోయిన iBOMMA రవి

“మామా హైదరాబాద్ వచ్చా… కలిసి తాగుదాం” మెసేజ్‌తో దొరికిపోయిన iBOMMA రవి
మన భారత్, హైదరాబాద్:
పైరసీ నిరోధక చర్యల్లో భాగంగా ఇటీవల అరెస్టైన iBOMMA రవి ఎలా పోలీసుల చెంతకు చేరాడో వివరాలు వెలుగులోకి వచ్చాయి. పదునైన నిఘాతో అతడిని ట్రాక్ చేసిన సైబర్ క్రైమ్ అధికారులు, ఓ చిన్న మెసేజ్ ద్వారానే రవిని పట్టుకున్నట్లు తెలుస్తోంది.

డొమైన్ల కొనుగోలు – పోలీసులు వేసిన నిఘా

iBOMMA నిర్వహణలో కీలకపాత్ర పోషిస్తున్న రవి, ER Infotech పేరిట అనేక డొమైన్లు కొనుగోలు చేసినట్లు పోలీసులు దర్యాప్తులో బయటపెట్టారు. డొమైన్ రిజిస్ట్రేషన్ సమయంలో ఇచ్చిన ఫోన్ నంబర్‌పై సైబర్ క్రైమ్ జట్టు నిఘా పెట్టింది.

విదేశాల్లో నివసిస్తున్న రవి అప్పుడప్పుడు హైదరాబాద్‌కు వచ్చి ఓ స్నేహితుడితో పార్టీ చేసుకుంటాడని పోలీసులు గుర్తించారు. రవి వస్తే వెంటనే సమాచారం ఇవ్వాలని ఆ స్నేహితుడికి సూచించారు.

పట్టుబడటానికి కారణమైన మెసేజ్

ఇటీవల రవి ఫ్రాన్స్ నుంచి హైదరాబాద్‌కు చేరుకున్నాడు. నగరానికి వచ్చిన వెంటనే తన సన్నిహిత మిత్రుడికి—

“మామా హైదరాబాద్ వచ్చా.. కలుద్దాం”

అంటూ వాట్సాప్‌లో మెసేజ్ పంపించాడు. ఇదే మెసేజ్ రవికి పట్టుబడటానికి కారణమైంది. సమాచారం అందుకున్న పోలీసులు వెంటనే రవిని గుర్తించి అరెస్టు చేశారు.

iBOMMA పై కొనసాగుతున్న దర్యాప్తులో ఇది మరో కీలక మలుపుగా పోలీసులు భావిస్తున్నారు.