రథోత్సవం సందర్భంగా అప్రమత్తంగా ఉండాలి: జిల్లా ఎస్పీ మహేష్ బి. గితే
రాజన్న సిరిసిల్ల జిల్లా, అక్టోబర్ 26, మన భారత్ ప్రతినిధి ఒగ్గు మహేష్ చంద్ర:
(adsbygoogle = window.adsbygoogle || []).push({});
శ్రీ లక్ష్మీ వెంకటేశ్వర స్వామి బ్రహ్మోత్సవాలను పురస్కరించుకుని ఆలయానికి వచ్చే భక్తులకు ఎలాంటి ఇబ్బందులు కలగకుండా పటిష్టమైన భద్రతా ఏర్పాట్లు చేపట్టినట్లు రాజన్న సిరిసిల్ల జిల్లా ఎస్పీ మహేష్ బి. గితే తెలిపారు. సోమవారం బ్రహ్మోత్సవాల్లో భాగంగా ఆయన స్వామివారిని దర్శించుకుని ప్రత్యేక పూజలు నిర్వహించారు. ఈ సందర్భంగా ఆలయ అర్చకులు ఎస్పీకి తీర్థప్రసాదాలు అందజేశారు.
ఈ సందర్భంగా ఎస్పీ మాట్లాడుతూ బ్రహ్మోత్సవాలకు పెద్ద సంఖ్యలో భక్తులు హాజరయ్యే అవకాశం ఉన్నందున పోలీసు అధికారులు, సిబ్బంది సమన్వయంతో పనిచేయాలని సూచించారు. భక్తులు ప్రశాంత వాతావరణంలో స్వామివారిని దర్శించుకునేలా అవసరమైన భద్రతా చర్యలు చేపట్టాలని ఆదేశించారు.
సాయంత్రం నిర్వహించే రథోత్సవం సందర్భంగా ప్రత్యేక అప్రమత్తత పాటించాలని బందోబస్తు విధుల్లో ఉన్న పోలీసు అధికారులకు, సిబ్బందికి సూచించారు. రథోత్సవాన్ని తిలకించేందుకు వచ్చే భక్తుల రద్దీని నిరంతరం పర్యవేక్షించాలని, ఎక్కడా తొక్కిసలాటకు అవకాశం లేకుండా తగిన జాగ్రత్తలు తీసుకోవాలని తెలిపారు. ఆలయ పరిసరాల్లో ట్రాఫిక్‌కు అంతరాయం కలగకుండా వాహనాల రాకపోకలను క్రమబద్ధీకరించాలని పేర్కొన్నారు.
భక్తులకు అవసరమైన సహాయం అందించేందుకు పోలీసు సిబ్బంది అందుబాటులో ఉండాలని, అనుమానాస్పద పరిస్థితులు ఎదురైతే వెంటనే ఉన్నతాధికారుల దృష్టికి తీసుకురావాలని సూచించారు. భద్రతా విధుల్లో నిర్లక్ష్యం వహించకుండా బాధ్యతాయుతంగా పనిచేయాలని ఆదేశించారు.
బ్రహ్మోత్సవాలు ప్రశాంతంగా, భక్తిశ్రద్ధలతో నిర్వహించేందుకు పోలీసు శాఖ అన్ని చర్యలు తీసుకుంటుందని ఎస్పీ తెలిపారు. భక్తులు పోలీసులకు సహకరించి భద్రతా సూచనలు పాటించాలని కోరారు.
