పండుగ సాయన్న జయంతి సందర్భంగా గ్రామాలకు ఫొటోల పంపిణీ.. గవినోళ్ల శ్రీనివాస్ పిలుపు
మన భారత్, దామరగిద్ద, అక్టోబర్ 18: ముదిరాజ్ సామాజిక వర్గం ఐక్యతతో ముందుకు సాగుతూ విద్య, విజ్ఞానం, సామాజిక చైతన్యానికి ప్రాధాన్యం ఇవ్వాలని తెలంగాణ రక్షణ సేన నారాయణపేట నియోజకవర్గ ఇన్‌చార్జి, ముదిరాజ్ రాష్ట్ర నాయకులు, బాపన్‌పల్లి సర్పంచ్ గవినోళ్ల శ్రీనివాస్ పిలుపునిచ్చారు. పిల్లలకు నాణ్యమైన విద్య అందించి, ఉన్నత లక్ష్యాలను సాధించేలా తల్లిదండ్రులు ప్రోత్సహించాలని సూచించారు. నారాయణపేట జిల్లా దామరగిద్ద మండల కేంద్రంలో ముదిరాజ్ సంఘం ఆధ్వర్యంలో నిర్వహించిన సమావేశంలో ఆయన మాట్లాడారు.
ఈ నెల 22న పండుగ సాయన్న జయంతిని తెలంగాణ ప్రభుత్వం అధికారికంగా నిర్వహించనున్న నేపథ్యంలో, నారాయణపేట జిల్లాలోని అన్ని గ్రామాల్లో జయంతి వేడుకలను నిర్వహించేందుకు సన్నాహాలు చేస్తున్నారు. ఇందులో భాగంగా దామరగిద్ద మండలంలోని వివిధ గ్రామాలకు పండుగ సాయన్న ఫొటోలను పంపిణీ చేశారు. ముదిరాజ్ సంఘం జిల్లా కన్వీనర్, లింగారెడ్డిపల్లి సర్పంచ్ అధ్యక్షతన జరిగిన ఈ కార్యక్రమంలో పలువురు సంఘం నాయకులు, ప్రజాప్రతినిధులు పాల్గొన్నారు.
విద్యతోనే సమాజ అభివృద్ధి
ఈ సందర్భంగా గవినోళ్ల శ్రీనివాస్ మాట్లాడుతూ ముదిరాజ్ సామాజిక వర్గానికి చెందిన ప్రజలంతా ఐకమత్యంతో ఉండి, సమాజ అభివృద్ధికి సమష్టిగా కృషి చేయాలని అన్నారు. పిల్లలకు నాణ్యమైన విద్య అందించడం ప్రతి కుటుంబం బాధ్యతగా భావించాలని పేర్కొన్నారు. విద్య ద్వారా పిల్లలకు మంచి భవిష్యత్తు కల్పించడంతోపాటు సమాజంలో గౌరవప్రదమైన స్థానం పొందేలా ప్రోత్సహించాలని సూచించారు.
యువత చెడు అలవాట్లకు, ముఖ్యంగా మద్యానికి దూరంగా ఉండాలని ఆయన కోరారు. క్రమశిక్షణ, పట్టుదల, కష్టపడే తత్వంతో జీవితంలో ఉన్నత శిఖరాలను అధిరోహించాలని పిలుపునిచ్చారు. సమాజంలో విద్యా చైతన్యం పెరిగినప్పుడే అభివృద్ధికి బలమైన పునాది ఏర్పడుతుందని పేర్కొన్నారు.
సామాజిక, రాజకీయ చైతన్యం అవసరం
దామరగిద్ద సింగిల్ విండో అధ్యక్షుడు, ముదిరాజ్ రాష్ట్ర నాయకులు పుట్టి ఇదప్ప మాట్లాడుతూ ముదిరాజ్ సామాజిక వర్గం సామాజికంగా, రాజకీయంగా మరింత చైతన్యం పొందాలని అన్నారు. జాతి ఐక్యతను కాపాడుకుంటూ హక్కుల సాధనతోపాటు అభివృద్ధి కార్యక్రమాల్లో చురుకుగా పాల్గొనాలని సూచించారు.
పండుగ సాయన్న జయంతి, వర్ధంతి కార్యక్రమాలను అధికారికంగా నిర్వహించేందుకు నిర్ణయం తీసుకున్న తెలంగాణ ప్రభుత్వానికి, మంత్రి శ్రీహరికి ఆయన కృతజ్ఞతలు తెలిపారు. పండుగ సాయన్న జీవిత చరిత్ర, పోరాట స్ఫూర్తి, సమాజానికి ఆయన చేసిన సేవలను భావితరాలకు తెలియజేయాల్సిన అవసరం ఉందని పలువురు నాయకులు అభిప్రాయపడ్డారు.
కాందేన్‌పల్లి సర్పంచ్, సక్కలోనిపల్లి సర్పంచ్, ఉపాధ్యాయుడు సుదర్శన్ తదితరులు మాట్లాడుతూ ముదిరాజ్‌ల ఐక్యత, విద్యాభివృద్ధి, సామాజిక పురోగతి కోసం తమ వంతు కృషి చేస్తామని తెలిపారు. రాబోయే ఎమ్మెల్యే ఎన్నికల్లో ముదిరాజ్ సామాజిక వర్గానికి చెందిన నాయకుడిని అసెంబ్లీకి పంపే దిశగా సమాజమంతా ఐక్యంగా కృషి చేయాలని పలువురు వక్తలు తమ అభిప్రాయాలను వ్యక్తం చేశారు.
ఈ కార్యక్రమంలో క్యాతన్‌పల్లి సర్పంచ్ గోవిందు, బొడ్డు జల్లప్ప, మాణిక్యప్ప, నీలి వెంకట్రాములు, అంజితోపాటు వివిధ గ్రామాల సర్పంచులు, ఉపసర్పంచులు, ముదిరాజ్ సంఘం నాయకులు పాల్గొన్నారు. పండుగ సాయన్న జయంతిని గ్రామగ్రామాన నిర్వహించేందుకు అవసరమైన ఏర్పాట్లపై చర్చించారు.
