నేరడిగొండలో సోయాబీన్ కొనుగోలు కేంద్రం ప్రారంభం
రైతులకు మద్దతు ధర అందేలా చర్యలు: ఎమ్మెల్యే అనిల్ జాదవ్
మన భారత్, నేరడిగొండ: అక్టోబర్ 16, నేరడిగొండ మండల కేంద్రంలో సోయాబీన్ కొనుగోలు కేంద్రం శుక్రవారం ప్రారంభమైంది. నాబార్డ్, తెలంగాణ రాష్ట్ర మార్క్‌ఫెడ్ ఆధ్వర్యంలో ప్రాథమిక వ్యవసాయ సహకార సంఘం ద్వారా ఏర్పాటు చేసిన ఈ కొనుగోలు కేంద్రాన్ని బోథ్ ఎమ్మెల్యే అనిల్ జాదవ్ ప్రారంభించారు. ఈ సందర్భంగా కొనుగోలు కేంద్రంలో చేపట్టిన ఏర్పాట్లను పరిశీలించి, రైతులకు అందించే సేవలపై సంబంధిత అధికారులను అడిగి తెలుసుకున్నారు.
ఈ సందర్భంగా ఎమ్మెల్యే అనిల్ జాదవ్ మాట్లాడుతూ.. రైతులు కష్టపడి సాగు చేసిన సోయాబీన్ పంటకు ప్రభుత్వం నిర్ణయించిన మద్దతు ధర లభించేలా కొనుగోలు కేంద్రాలు ఉపయోగపడతాయని అన్నారు. రైతులు దళారులను ఆశ్రయించకుండా ప్రభుత్వం ఏర్పాటు చేసిన కొనుగోలు కేంద్రాల్లోనే పంటను విక్రయించి తగిన ధర పొందాలని సూచించారు.
రైతులు పండించిన ప్రతి గింజను ప్రభుత్వ కొనుగోలు వ్యవస్థ ద్వారా సేకరించేలా కృషి చేస్తానని ఎమ్మెల్యే పేర్కొన్నారు. కొనుగోలు ప్రక్రియలో రైతులకు ఎలాంటి ఇబ్బందులు తలెత్తకుండా చూడాలని, పంట తూకం, నాణ్యత పరిశీలన, చెల్లింపుల ప్రక్రియలో పారదర్శకత పాటించాలని సంబంధిత అధికారులకు సూచించారు.
సోయాబీన్ విక్రయానికి వచ్చే రైతులకు అవసరమైన సమాచారం, సహకారం అందించాలని, కొనుగోలు కేంద్రం వద్ద రైతులకు అనుకూలమైన వాతావరణం కల్పించాలని అధికారులను కోరారు. వ్యవసాయ ఉత్పత్తులకు మద్దతు ధర కల్పించడం ద్వారా రైతులకు మార్కెట్‌లో భరోసా కల్పించాల్సిన అవసరం ఉందన్నారు.
ప్రస్తుత సీజన్‌లో సోయాబీన్ పంటను విక్రయించేందుకు రైతులు కొనుగోలు కేంద్రాలను వినియోగించుకోవాలని సూచించారు. పంట విక్రయ సమయంలో అవసరమైన పత్రాలు, నాణ్యత ప్రమాణాలు, తూకం తదితర అంశాలపై రైతులకు స్పష్టమైన సమాచారం అందించాలని పేర్కొన్నారు.
ఈ కార్యక్రమంలో ప్రాథమిక వ్యవసాయ సహకార సంఘం చైర్మన్ సాబ్లే కిషోర్, స్థానిక సర్పంచ్ నీలిమ రవీందర్ రెడ్డి, మాజీ చైర్మన్ నానక్ సింగ్, మాజీ ఎంపీపీ రాథోడ్ సజన్, రాథోడ్ సురేందర్, సర్పంచులు మహేందర్ రెడ్డి, నవీన్, గంగాధర్, స్వామి, సుజీల్, ప్రతాప్, శోభన్ రెడ్డి, శ్రీకాంత్ రెడ్డి, పద్మనాభ రెడ్డి, సంబంధిత అధికారులు, స్థానిక ప్రజాప్రతినిధులు, రైతులు తదితరులు పాల్గొన్నారు.
Cell Number : cell_number : 9573391945
User Name : user_name : Gontimukkula prasad
