తలమడుగులో మరో రైతు ఆత్మ హత్య.. అప్పుల భారం, పంట దిగుబడిపై ఆందోళనతో విషాదం
మన భారత్, తలమడుగు, అక్టోబర్ 7: తలమడుగు మండల కేంద్రంలో రైతు మృతి చెందిన ఘటన విషాదాన్ని నింపింది. కుటుంబ సభ్యుల ఫిర్యాదు మేరకు పోలీసులు కేసు నమోదు చేసి దర్యాప్తు చేపట్టారు.
తలమడుగు గ్రామానికి చెందిన గుర్రాల ప్రతాపరెడ్డి గత సుమారు 20 సంవత్సరాలుగా కౌలు భూములను తీసుకుని వ్యవసాయం చేస్తున్నట్లు కుటుంబ సభ్యులు తెలిపారు. ఈ ఏడాది కూడా సుమారు 23 ఎకరాల భూమిని కౌలుకు తీసుకుని పంటలు సాగు చేసినట్లు పేర్కొన్నారు. అయితే పంట దిగుబడి ఆశించిన స్థాయిలో వస్తుందో లేదోనన్న ఆందోళనతో పాటు అప్పుల భారం కారణంగా తీవ్ర మనస్తాపానికి గురైనట్లు కుటుంబ సభ్యులు తెలిపారు.
ఈ క్రమంలో అక్టోబర్ 6న సాయంత్రం ఇంటి వద్ద ప్రతాపరెడ్డి అపస్మారక స్థితిలో కనిపించగా కుటుంబ సభ్యులు వెంటనే ఆదిలాబాద్ రిమ్స్‌కు తరలించే ప్రయత్నం చేశారు. అయితే ఆసుపత్రికి తీసుకెళ్లేలోపే ఆయన మృతి చెందినట్లు కుటుంబ సభ్యులు తెలిపారు.
మృతుడి కుమారుడు గుర్రాల సురేందర్ రెడ్డి ఇచ్చిన ఫిర్యాదు మేరకు తలమడుగు పోలీసులు కేసు నమోదు చేసి ఘటనకు సంబంధించిన వివరాలను సేకరిస్తున్నారు. మృతికి సంబంధించిన పూర్తి కారణాలు పోలీసుల దర్యాప్తులో తేలాల్సి ఉంది.
రైతు మృతితో కుటుంబ సభ్యులు, బంధువులు తీవ్ర విషాదంలో మునిగిపోయారు. కౌలు వ్యవసాయంలో పెట్టుబడి వ్యయాలు, పంట దిగుబడిపై అనిశ్చితి, అప్పుల భారం వంటి సమస్యలు రైతు కుటుంబాలపై ప్రభావం చూపుతున్న నేపథ్యంలో ఘటన స్థానికంగా చర్చనీయాంశంగా మారింది.
సూచన: ఎవరైనా తీవ్రమైన మానసిక ఒత్తిడిలో ఉన్నట్లయితే ఒంటరిగా ఉండకుండా కుటుంబ సభ్యులు లేదా విశ్వసనీయ వ్యక్తులతో మాట్లాడటం, తక్షణ సహాయం కోసం సమీప వైద్యసేవలను సంప్రదించడం మంచిది.
మీ గొంటిముక్కుల ప్రసాద్ మన భారత్ జిల్లా ఆర్సీ ఇన్‌చార్జి
జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.
