గ్రామాభివృద్ధి పేరుతో అక్రమ వసూళ్లకు పాల్పడితే కఠిన చర్యలు
బరంపూర్‌లో అక్రమ బెల్ట్‌షాప్‌పై కేసు.. ఆరుగురు వీడీసీ సభ్యులపై ఆరోపణల నేపథ్యంలో కేసు
రూ.12 లక్షలు డిమాండ్ చేశారన్న ఫిర్యాదు.. రూ.3.29 లక్షల విలువైన మద్యం స్వాధీనం: డీఎస్పీ జీవన్‌రెడ్డి
మన భారత్, తలమడుగు: గ్రామాభివృద్ధి పేరుతో బెల్ట్‌షాపులు, ఇసుక అక్రమ రవాణా, కల్లు దుకాణాలు తదితర చట్టవిరుద్ధ కార్యకలాపాలకు సంబంధించి ప్రజల నుంచి అక్రమంగా డబ్బులు వసూలు చేస్తే కఠిన చర్యలు తప్పవని ఆదిలాబాద్ డీఎస్పీ ఎల్. జీవన్‌రెడ్డి హెచ్చరించారు. వీడీసీల పేరుతో ఎవరైనా ప్రజలను బెదిరించి లేదా బలవంతంగా డబ్బులు వసూలు చేసినా చట్టపరంగా చర్యలు తీసుకుంటామని స్పష్టం చేశారు.
తలమడుగు పోలీస్ స్టేషన్ పరిధిలోని బరంపూర్ గ్రామంలో అక్రమంగా మద్యం విక్రయిస్తున్నారనే సమాచారం మేరకు ఎస్‌ఐ డి. రాధిక తన సిబ్బందితో కలిసి తనిఖీలు నిర్వహించారు. ఈ తనిఖీల్లో ఆర్లీ-కే గ్రామానికి చెందిన చిత్తల వెంకట్‌రెడ్డి (48)ని పోలీసులు అదుపులోకి తీసుకున్నారు. అతని వద్ద నుంచి వివిధ బ్రాండ్లకు చెందిన మద్యం బాటిళ్లను స్వాధీనం చేసుకున్నట్లు పోలీసులు తెలిపారు.
పోలీసుల వివరాల ప్రకారం మొత్తం 454 లీటర్ల 910 మిల్లీలీటర్ల మద్యం, సుమారు రూ.3,29,190 విలువైన మద్యం స్వాధీనం చేసుకున్నారు. అక్రమంగా మద్యం విక్రయిస్తున్నట్లు గుర్తించిన వ్యక్తిపై చట్ట ప్రకారం కేసు నమోదు చేసి తదుపరి దర్యాప్తు చేపట్టారు.
రూ.12 లక్షలు డిమాండ్ చేశారన్న ఆరోపణ
పోలీసులు తెలిపిన వివరాల ప్రకారం, బరంపూర్ గ్రామానికి చెందిన కొందరు వీడీసీ సభ్యులు బెల్ట్‌షాప్ నిర్వహించాలంటే రూ.12 లక్షలు చెల్లించాలని డిమాండ్ చేసినట్లు నిందితుడు వెల్లడించాడు. ఇందులో భాగంగా రూ.10 వేలు అడ్వాన్స్‌గా చెల్లించినట్లు కూడా పోలీసుల దర్యాప్తులో పేర్కొన్నట్లు అధికారులు తెలిపారు.
ఈ ఆరోపణల నేపథ్యంలో బరంపూర్ గ్రామానికి చెందిన ఆరుగురు వీడీసీ సభ్యులపై పోలీసులు కేసు నమోదు చేసి దర్యాప్తు చేస్తున్నారు. కేసు నమోదైన వారిలో కస్లాల ప్రతాప్, మెర్గు రంజిత్‌రెడ్డి, పట్ల నర్సయ్య, మేకల బాపురావు, గణేష్‌గౌడ్, మాధురి మల్లేష్ ఉన్నట్లు పోలీసులు తెలిపారు. ఆరోపణలు దర్యాప్తులో ఉన్నాయని పోలీసులు పేర్కొన్నారు.
అక్రమ వసూళ్లకు పాల్పడితే చర్యలు
గ్రామాభివృద్ధి పేరుతో చట్టవిరుద్ధ కార్యకలాపాలకు పాల్పడటం, ప్రజల నుంచి బలవంతంగా డబ్బులు వసూలు చేయడం ఎట్టి పరిస్థితుల్లోనూ సహించబోమని డీఎస్పీ జీవన్‌రెడ్డి తెలిపారు. గతంలోనూ అక్రమ వసూళ్లకు పాల్పడినట్లు ఆరోపణలు ఎదుర్కొన్న వీడీసీలపై కేసులు నమోదు చేసి అరెస్టులు చేసినట్లు వెల్లడించారు.
గ్రామాల్లో వీడీసీల పేరుతో బెల్ట్‌షాపులు, ఇసుక అక్రమ రవాణా, కల్లు దుకాణాలు లేదా ఇతర చట్టవిరుద్ధ కార్యకలాపాలకు సంబంధించి ఎవరైనా వసూళ్లకు పాల్పడితే వెంటనే పోలీసులకు సమాచారం అందించాలని సూచించారు. అక్రమ మద్యం విక్రయాలు, అక్రమ వసూళ్లు, ఇతర నేరాలకు పాల్పడే వారిపై చట్ట ప్రకారం చర్యలు తీసుకుంటామని హెచ్చరించారు.
ఈ ఘటనపై తలమడుగు పోలీస్ స్టేషన్‌లో సెక్షన్ 34(A) తెలంగాణ ఎక్సైజ్ యాక్ట్, సెక్షన్ 308(2) r/w 3(5) BNS కింద కేసు నమోదు చేసినట్లు పోలీసులు తెలిపారు. కేసు దర్యాప్తు కొనసాగుతోందని, దర్యాప్తులో వెలుగుచూసే అంశాల ఆధారంగా తదుపరి చర్యలు తీసుకుంటామని పేర్కొన్నారు.
మీ గొంటిముక్కుల ప్రసాద్ మన భారత్ జిల్లా ఆర్సీ ఇన్‌చార్జి.
జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.
