మన్మోహన్ సింగ్ సేవలు చిరస్మరణీయం: డీసీసీ అధ్యక్షుడు నరేష్ జాదవ్
మన భారత్, సెప్టెంబర్ 25, ఆదిలాబాద్: భారత మాజీ ప్రధానమంత్రి, ప్రముఖ ఆర్థికవేత్త డాక్టర్ మన్మోహన్ సింగ్ జయంతి సందర్భంగా ఆదిలాబాద్ జిల్లా కాంగ్రెస్ పార్టీ కార్యాలయంలో ఆయనకు ఘన నివాళులు అర్పించారు. జిల్లా కాంగ్రెస్ అధ్యక్షుడు డాక్టర్ నరేష్ జాదవ్ ఆధ్వర్యంలో నిర్వహించిన ఈ కార్యక్రమంలో ఆదిలాబాద్ మార్కెట్ కమిటీ (ఏఎంసీ) చైర్మన్ బోరంచు శ్రీకాంత్ రెడ్డి, కాంగ్రెస్ నాయకులు, కార్యకర్తలు పాల్గొన్నారు.
ఈ సందర్భంగా బోరంచు శ్రీకాంత్ రెడ్డి, డీసీసీ అధ్యక్షుడు నరేష్ జాదవ్‌తో కలిసి డాక్టర్ మన్మోహన్ సింగ్ చిత్రపటానికి పూలమాలలు వేసి నివాళులర్పించారు. అనంతరం ఆయన దేశానికి అందించిన సేవలను కాంగ్రెస్ నాయకులు స్మరించుకున్నారు.
నాయకులు మాట్లాడుతూ.. డాక్టర్ మన్మోహన్ సింగ్ భారత ఆర్థిక వ్యవస్థపై విశేష ప్రభావం చూపిన ఆర్థికవేత్తగా, మాజీ ప్రధానమంత్రిగా దేశ ప్రజలకు సేవలందించారని పేర్కొన్నారు. 1991 నుంచి 1996 వరకు కేంద్ర ఆర్థిక మంత్రిగా పనిచేసిన ఆయన ఆ కాలంలో చేపట్టిన విస్తృత ఆర్థిక సంస్కరణల్లో కీలక పాత్ర పోషించారని తెలిపారు. అనంతరం 2004 నుంచి 2014 వరకు రెండు పర్యాయాలు భారత ప్రధానమంత్రిగా బాధ్యతలు నిర్వర్తించారు.
దేశ ఆర్థిక వ్యవస్థలో మార్పులకు దారితీసిన 1991 ఆర్థిక సంస్కరణల సమయంలో ఆయన పోషించిన పాత్రను నాయకులు గుర్తుచేశారు. ఆర్థిక రంగంలో ఆయన చేసిన కృషి, సుదీర్ఘ ప్రజా సేవ, నిరాడంబరత, మేధోపరమైన దృక్పథం ప్రజాజీవితంలో ప్రత్యేక గుర్తింపు పొందాయని పేర్కొన్నారు.
డీసీసీ అధ్యక్షుడు డాక్టర్ నరేష్ జాదవ్ మాట్లాడుతూ.. డాక్టర్ మన్మోహన్ సింగ్ దేశ ప్రయోజనాలను దృష్టిలో ఉంచుకుని ప్రజా జీవితంలో సుదీర్ఘకాలం సేవలందించారని తెలిపారు. ఆయన ఆలోచనా విధానం, ఆర్థిక రంగంపై ఉన్న అవగాహన, నిరాడంబర జీవనశైలి నేటి తరానికి స్ఫూర్తిదాయకమని అన్నారు. డాక్టర్ మన్మోహన్ సింగ్ 1932 సెప్టెంబర్ 26న జన్మించారు.
ఈ కార్యక్రమంలో మాజీ మార్కెట్ కమిటీ చైర్మన్ అల్లూరి సంజీవరెడ్డి, జిల్లా ఓబీసీ సెల్ అధ్యక్షుడు అంబకంటి అశోక్, జిల్లా కాంగ్రెస్ జనరల్ సెక్రటరీ బండి దేవదాస్ చారి, డీసీసీ కార్యాలయ ఇన్‌చార్జ్ గౌలి సంజీవ్ కుమార్, జిల్లా కాంగ్రెస్ ఆర్గనైజేషన్ ఇన్‌చార్జ్ బెజ్జంకి అనిల్ కుమార్, ఆదిలాబాద్ కాంగ్రెస్ సెక్రటరీలు ఇమ్రాన్ బేగ్, సిరాజుద్దీన్, ఆదిలాబాద్ అసెంబ్లీ యూత్ కాంగ్రెస్ అధ్యక్షుడు షేక్ నహిద్, యూత్ కాంగ్రెస్ అసెంబ్లీ వైస్ ప్రెసిడెంట్ సామా రూపేష్ రెడ్డి తదితర కాంగ్రెస్ నాయకులు, కార్యకర్తలు పాల్గొన్నారు.
మీ గొంటిముక్కుల ప్రసాద్ మన భారత్ జిల్లా ఆర్సీ ఇన్చార్జి
ఆదిలాబాద్ జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.
