రిమ్స్ అగ్నిప్రమాదంపై ప్రభుత్వ తీరుపై రాథోడ్ బాపురావు ఆగ్రహం
చిన్నారుల ప్రాణాలకు ప్రభుత్వం బాధ్యత వహించాలి
రిమ్స్ భద్రతా లోపాలపై సమగ్ర విచారణ జరిపి చర్యలు తీసుకోవాలి
బాధిత చిన్నారుల వైద్య ఖర్చులను ప్రభుత్వమే భరించాలి
మన భారత్, సెప్టెంబర్22, ఆదిలాబాద్: ఆదిలాబాద్ రిమ్స్ ఆసుపత్రిలో చోటుచేసుకున్న అగ్నిప్రమాద ఘటనపై తెలంగాణ రక్షణ సేన (TRS) పార్టీ జిల్లా అధ్యక్షుడు, బోథ్ మాజీ ఎమ్మెల్యే రాథోడ్ బాపురావు ఆగ్రహం వ్యక్తం చేశారు. అగ్నిప్రమాదంలో గాయపడిన చిన్నారులను ఆయన పరామర్శించారు. రిమ్స్‌తో పాటు ప్రైవేట్ ఆసుపత్రుల్లో చికిత్స పొందుతున్న చిన్నారులను కలిసి వారి ఆరోగ్య పరిస్థితిని అడిగి తెలుసుకున్నారు. బాధిత చిన్నారుల తల్లిదండ్రులతో మాట్లాడి ధైర్యం చెప్పారు.
రిమ్స్‌లో భద్రతా ఏర్పాట్లు ఏమయ్యాయి?
ఈ సందర్భంగా రాథోడ్ బాపురావు మాట్లాడుతూ.. ప్రజల ప్రాణాలను కాపాడాల్సిన ప్రభుత్వ ఆసుపత్రిలోనే చిన్నారులు అగ్నిప్రమాదానికి గురికావడం అత్యంత బాధాకరమన్నారు. రిమ్స్‌లో భద్రతా ఏర్పాట్లు, అగ్నిప్రమాద నివారణ చర్యలు, అధికారుల పర్యవేక్షణపై సమగ్రంగా సమీక్షించాల్సిన అవసరం ఉందన్నారు.
ఆసుపత్రి నిర్వహణలో నిర్లక్ష్యం కారణంగానే ఇలాంటి ఘటనలు చోటుచేసుకున్నాయని ఆయన ఆరోపించారు. అయితే ప్రమాదానికి అసలు కారణాలు, భద్రతా ప్రమాణాల అమలు, ఘటన సమయంలో తీసుకున్న చర్యలపై పూర్తి స్థాయి విచారణ జరిపి వాస్తవాలను వెలుగులోకి తీసుకురావాలని డిమాండ్ చేశారు.
కేవలం విచారణ ప్రకటించి వదిలేయకుండా రిమ్స్‌లో ఉన్న భద్రతా లోపాలను తక్షణమే గుర్తించి సరిచేయాలని కోరారు. అగ్నిమాపక పరికరాలు, విద్యుత్ వ్యవస్థ, అత్యవసర మార్గాలు, రోగుల తరలింపు ఏర్పాట్లు తదితర అంశాలను అధికారులు పూర్తిస్థాయిలో తనిఖీ చేయాలని సూచించారు.
బాధితుల వైద్య ఖర్చులను ప్రభుత్వమే భరించాలి
అగ్నిప్రమాదంలో గాయపడిన చిన్నారులకు మెరుగైన వైద్యం అందించడం ప్రభుత్వ బాధ్యత అని రాథోడ్ బాపురావు అన్నారు. రిమ్స్‌తో పాటు ప్రైవేట్ ఆసుపత్రుల్లో చికిత్స పొందుతున్న చిన్నారుల వైద్య ఖర్చులను కూడా ప్రభుత్వమే భరించాలని డిమాండ్ చేశారు.
అగ్నిప్రమాదంలో మృతి చెందిన చిన్నారి కుటుంబాన్ని ప్రభుత్వం అన్ని విధాలుగా ఆదుకోవాలని, తగిన ఆర్థిక సహాయం అందించాలని కోరారు. బాధిత కుటుంబాలకు అవసరమైన సహాయ సహకారాలను అందించేందుకు ప్రభుత్వం ప్రత్యేక చర్యలు చేపట్టాలని అన్నారు.
భవిష్యత్తులో ప్రభుత్వ ఆసుపత్రుల్లో ఇలాంటి ఘటనలు పునరావృతం కాకుండా భద్రతా ప్రమాణాలను కఠినంగా అమలు చేయాలని, ఆసుపత్రుల్లో నిరంతర పర్యవేక్షణ వ్యవస్థను ఏర్పాటు చేయాలని రాథోడ్ బాపురావు డిమాండ్ చేశారు.
ఈ కార్యక్రమంలో ఆదిలాబాద్ పార్లమెంట్ ఇంచార్జ్ మాడవి బాపురావు, ఆదిలాబాద్ అసెంబ్లీ ఇంచార్జ్ వేణు గోపాల్ యాదవ్, తలమడుగు మండల్ కన్వీనర్ నిమ్మల గజానంద్‌తో పాటు TRS పార్టీ జిల్లా నాయకులు, మండల నాయకులు, కార్యకర్తలు తదితరులు పాల్గొన్నారు.
మీ గొంటిముక్కుల ప్రసాద్ మన భారత్ జిల్లా ఆర్సీ ఇన్చార్జి
ఆదిలాబాద్ జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.
