మన భారత్, సెప్టెంబర్17, ఆదిలాబాద్: తెలంగాణ ప్రజా పాలన దినోత్సవాన్ని పురస్కరించుకుని ఆదిలాబాద్ మార్కెట్ కమిటీ కార్యాలయంలో నిర్వహించిన వేడుకల్లో మార్కెట్ కమిటీ చైర్మన్ బోరంచు శ్రీకాంత్ రెడ్డి పాల్గొన్నారు. ఈ సందర్భంగా జాతి నేతల చిత్రపటాలకు పూలమాలలు వేసి నివాళులర్పించిన అనంతరం జాతీయ జెండాను ఆవిష్కరించారు.
సెప్టెంబర్ 17 తెలంగాణ చరిత్రలో ప్రత్యేక ప్రాధాన్యత కలిగిన రోజని శ్రీకాంత్ రెడ్డి పేర్కొన్నారు. 1948 సెప్టెంబర్ 17న హైదరాబాద్ సంస్థానం భారత యూనియన్లో విలీనం కావడం ద్వారా తెలంగాణ ప్రాంతంలో ప్రజాస్వామ్య పాలనకు మార్గం సుగమమైందని తెలిపారు. సర్దార్ వల్లభభాయ్ పటేల్ నాయకత్వంలో చేపట్టిన ఆపరేషన్ పోలో అనంతరం హైదరాబాద్ సంస్థానం భారత యూనియన్లో విలీనమైనట్లు పేర్కొన్నారు.
నిజాం పాలన, రజాకార్ల అరాచకాలకు వ్యతిరేకంగా తెలంగాణ ప్రజలు సాగించిన పోరాటం, చేసిన త్యాగాలు చరిత్రలో చిరస్థాయిగా నిలిచిపోతాయని అన్నారు. సెప్టెంబర్ 17ను తెలంగాణ ప్రభుత్వం అధికారికంగా “ప్రజా పాలన దినోత్సవం”గా నిర్వహిస్తున్న విషయం తెలిసిందే.
ఈ చారిత్రక ఘట్టం కేవలం ఒక తేదీకి పరిమితం కాదని, ప్రజల పోరాటం, త్యాగం, స్వేచ్ఛ, ఆత్మగౌరవం, ప్రజాస్వామ్య విలువలకు ప్రతీకగా నిలిచిందని శ్రీకాంత్ రెడ్డి అన్నారు. తెలంగాణ చరిత్రలోని ఈ ముఖ్యమైన అంశాలను భావితరాలకు తెలియజేయడం ప్రతి ఒక్కరి బాధ్యత అని పేర్కొన్నారు.
ప్రజా సంక్షేమమే లక్ష్యంగా ప్రభుత్వం
రాష్ట్రంలో రెండేళ్ల ప్రజా పాలన ప్రస్థానంలో ముఖ్యమంత్రి రేవంత్ రెడ్డి నాయకత్వంలోని ప్రభుత్వం పలు అభివృద్ధి, సంక్షేమ కార్యక్రమాలను చేపడుతోందని శ్రీకాంత్ రెడ్డి తెలిపారు. ప్రజల సంక్షేమం, సామాజిక న్యాయం, సమానత్వం, ఆత్మగౌరవం వంటి అంశాలకు ప్రాధాన్యతనిస్తూ ప్రభుత్వం ముందుకు సాగుతోందని అన్నారు. ప్రజల జీవితాల్లో మెరుగైన మార్పులు తీసుకురావడమే ప్రజా ప్రభుత్వ లక్ష్యమని పేర్కొన్నారు.
కార్యక్రమంలో మార్కెట్ గ్రేడ్ సెక్షన్ ఆఫీసర్ విట్టల్, మార్కెట్ కమిటీ పాలకవర్గ సభ్యులు, డైరెక్టర్లు, అధికారులు, సిబ్బంది తదితరులు పాల్గొన్నారు.
మీ గొంటిముక్కుల ప్రసాద్ మన భారత్ జిల్లా ఆర్సీఇన్చార్జి
ఆదిలాబాద్ జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.
