రియల్ ఎస్టేట్ వ్యాపారి కిడ్నాప్

నకిలీ కరెన్సీ ముఠా చేతిలో రూ.5 లక్షలు పోగొట్టుకుని.. రియల్ ఎస్టేట్ వ్యాపారి కిడ్నాప్

రెండు కేసుల్లో ఆరుగురు అరెస్ట్.. కారు, మొబైల్ ఫోన్లు, నగదు స్వాధీనం

మన భారత్, సెప్టెంబర్15, ఆదిలాబాద్: నకిలీ కరెన్సీ ద్వారా తక్కువ సమయంలో భారీగా డబ్బు సంపాదించాలనే ఆశతో రూ.5 లక్షలు చెల్లించి మోసపోయిన ఓ ముఠా.. తమ డబ్బును తిరిగి రాబట్టేందుకు మరో వ్యక్తిని కిడ్నాప్ చేసిన ఘటన ఆదిలాబాద్ జిల్లాలో వెలుగులోకి వచ్చింది. ఈ వ్యవహారంలో నమోదైన కిడ్నాప్, నకిలీ కరెన్సీ కేసుల్లో మొత్తం ఆరుగురు నిందితులను మావల పోలీసులు అరెస్ట్ చేసినట్లు ఆదిలాబాద్ డీఎస్పీ ఎల్. జీవన్ రెడ్డి తెలిపారు.

పోలీసుల వివరాల ప్రకారం.. పంధర్‌కవాడకు చెందిన ప్రతీక్ ద్వారా దీపక్ పవార్, అలోక్, సురేందర్ తదితరులకు నాగ్‌పూర్‌కు చెందిన నకిలీ కరెన్సీ ముఠాతో పరిచయం ఏర్పడింది. రూ.1 లక్షకు రూ.4 లక్షల నకిలీ కరెన్సీ ఇస్తామని, వాటిని చలామణి చేయడం ద్వారా భారీగా లాభాలు పొందవచ్చని ఆ ముఠా నమ్మించినట్లు పోలీసులు తెలిపారు.

రూ.5 లక్షలు ఇచ్చి రూ.20 లక్షల నకిలీ కరెన్సీకి ఒప్పందం

నకిలీ కరెన్సీ ద్వారా భారీగా లాభాలు వస్తాయనే ఆశతో మొత్తం రూ.5 లక్షలు చెల్లించి రూ.20 లక్షల నకిలీ కరెన్సీ పొందాలని నిందితులు నిర్ణయించుకున్నట్లు దర్యాప్తులో వెల్లడైంది. ఈ క్రమంలో సురేందర్, మహారాష్ట్రకు చెందిన షేక్ షకీబ్ తదితరులు డబ్బును సమకూర్చి నకిలీ కరెన్సీ ముఠాకు అందజేసేందుకు ప్రణాళిక రూపొందించినట్లు పోలీసులు తెలిపారు.

సెప్టెంబర్ 10న మావల బైపాస్ వద్ద నకిలీ కరెన్సీ ముఠా సభ్యులకు రూ.5 లక్షలు అందజేశారు. నగదు తీసుకున్న అనంతరం వారు నకిలీ కరెన్సీ ఉన్నట్లు చూపిస్తూ ఓ బాక్స్‌ను తీసుకొచ్చారు. అదే సమయంలో ముందస్తు ప్రణాళికలో భాగంగా మరికొందరు వ్యక్తులు అక్కడికి చేరుకుని తాము పోలీసులమని చెప్పి బెదిరించినట్లు పోలీసులు తెలిపారు.

అనంతరం అసలు రూ.5 లక్షలు తిరిగి ఇవ్వకుండా రెండు కార్లలో నాగ్‌పూర్ వైపు పరారైనట్లు వెల్లడించారు. దీంతో తాము మోసపోయామని గుర్తించిన షేక్ షకీబ్ మరో ఇద్దరితో కలిసి తమ డబ్బును తిరిగి రాబట్టేందుకు సురేందర్, అలోక్, దీపక్‌లను అదుపులోకి తీసుకున్నట్లు పోలీసులు తెలిపారు.

భార్యతో ఫోన్ చేయించి కిడ్నాప్ కథ

తమ వద్ద ఉన్న సురేందర్‌తో అతని భార్యకు ఫోన్ చేయించి, తనను కిడ్నాప్ చేశారని, రూ.5 లక్షలు చెల్లిస్తేనే విడుదల చేస్తామని చెప్పించినట్లు పోలీసులు తెలిపారు. దీంతో ఆందోళనకు గురైన సురేందర్ భార్య మావల పోలీసులను ఆశ్రయించారు.

ఆమె ఫిర్యాదు మేరకు మావల పోలీసులు Cr.No.624/2026 U/S 140(3) BNS కింద కిడ్నాప్ కేసు నమోదు చేసి దర్యాప్తు ప్రారంభించారు. మరోవైపు నకిలీ కరెన్సీ వ్యవహారంపై Cr.No.631/2026 U/S 318(4), 308(5) r/w 3(5) BNS కింద కేసు నమోదు చేసి దర్యాప్తు చేపట్టారు.

వాహన తనిఖీల్లో చిక్కిన నిందితులు

దర్యాప్తులో భాగంగా సెప్టెంబర్ 13న దస్నాపూర్ పెట్రోల్ బంక్ వద్ద పోలీసులు వాహన తనిఖీలు నిర్వహించారు. ఈ సమయంలో నిందితులు ప్రయాణిస్తున్న కారును గుర్తించి అదుపులోకి తీసుకున్నారు. విచారణ చేపట్టగా కిడ్నాప్, నకిలీ కరెన్సీ వ్యవహారాలకు సంబంధించిన పూర్తి వివరాలు వెలుగులోకి వచ్చినట్లు డీఎస్పీ తెలిపారు.

కిడ్నాప్ కేసులో ముగ్గురి అరెస్ట్

కిడ్నాప్ కేసులో షేక్ షకీబ్ @ ఎం.డి. షకీబ్ (24), బీహార్ రాష్ట్రానికి చెందిన వ్యక్తి, ప్రస్తుతం గడ్చందూర్‌లో నివాసం; మహ్మద్ సితార్ (20), బీహార్‌కు చెందిన వ్యక్తి, ప్రస్తుతం గడ్చందూర్‌లో నివాసం; ప్రథమ్ రవీంద్ర గురుకుందల్వార్ (20), గడ్చందూర్, చంద్రపూర్ జిల్లా, మహారాష్ట్రకు చెందిన వ్యక్తిని అరెస్ట్ చేసినట్లు పోలీసులు తెలిపారు.

షేక్ షకీబ్ వద్ద నుంచి Hyundai i20 కారు, iPhone 17 Pro మొబైల్ ఫోన్, రూ.20,000 నగదు స్వాధీనం చేసుకున్నారు.

నకిలీ కరెన్సీ కేసులో మరో ముగ్గురు అరెస్ట్

నకిలీ కరెన్సీ కేసులో దీపక్ శ్రీరామ్ పవార్ (33), రాధేనగరి, పంధర్‌కవాడ, యవత్మాల్ జిల్లా; సర్కార్ అలోక్ (46), దహేగావ్ గ్రామం, బేలా మండలం, ఆదిలాబాద్ జిల్లా; ఎల్చల్వార్ సురేందర్ (38), కేఆర్‌కే కాలనీ, ఆదిలాబాద్‌కు చెందిన వారిని అరెస్ట్ చేశారు.

దీపక్ వద్ద నుంచి రూ.10,000 నగదు, Vivo మొబైల్ ఫోన్, అలోక్ వద్ద నుంచి Oppo మొబైల్ ఫోన్ స్వాధీనం చేసుకున్నట్లు పోలీసులు తెలిపారు.

పరారీలో ఉన్న వారి కోసం గాలింపు

ఈ రెండు కేసుల్లో పంధర్‌కవాడకు చెందిన ప్రతీక్, అలాగే నాగ్‌పూర్‌కు చెందిన నకిలీ కరెన్సీ ముఠాకు చెందిన మరో నలుగురు సభ్యులు పరారీలో ఉన్నట్లు పోలీసులు తెలిపారు. వారి ఆచూకీ కోసం ప్రత్యేక పోలీసు బృందాలతో గాలింపు చర్యలు కొనసాగుతున్నాయని డీఎస్పీ ఎల్. జీవన్ రెడ్డి వెల్లడించారు.

నకిలీ కరెన్సీ ద్వారా సులభంగా భారీ మొత్తంలో డబ్బు సంపాదించవచ్చనే అత్యాశకు గురికావడం చివరకు నేరాలకు దారితీస్తుందని డీఎస్పీ హెచ్చరించారు. ఇలాంటి అక్రమ ఆర్థిక లావాదేవీలకు దూరంగా ఉండాలని, అనుమానాస్పద వ్యవహారాలపై వెంటనే పోలీసులకు సమాచారం అందించాలని ప్రజలకు సూచించారు.

ఈ కేసుల దర్యాప్తులో మావల సీఐ బీడీ ప్రేమ్ కుమార్, ఎస్ఐ రాజశేఖర్ తో పాటు పోలీసు సిబ్బంది పాల్గొన్నారు.

మీ గొంటిముక్కుల ప్రసాద్ మన భారత్ జిల్లా ఆర్సీ ఇన్చార్జి

ఆదిలాబాద్ జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి