మూడు గంటలు ఎండలో నిలబడి ట్రాఫిక్ సమస్యను పర్యవేక్షించిన ఎమ్మెల్యే అనిల్ జాదవ్
ప్రజల ఇబ్బందులే ప్రాధాన్యం.. శాశ్వత పరిష్కారం కోసం పోరాడుతామని వెల్లడి
నేరడిగొండ,మన భారత్: కుప్టి బ్రిడ్జి వద్ద ఏర్పడిన సమస్య కారణంగా భారీగా నిలిచిపోయిన వాహనాలతో తీవ్ర ఇబ్బందులు ఎదుర్కొంటున్న వాహనదారులకు ఎమ్మెల్యే అనిల్ జాదవ్ చొరవతో తాత్కాలికంగా ఊరట లభించింది. నెరడిగొండ మండలంలోని కుప్టి బ్రిడ్జి వద్ద పరిస్థితిని తెలుసుకున్న ఎమ్మెల్యే స్వయంగా అక్కడికి చేరుకుని ట్రాఫిక్ సమస్యను పరిశీలించారు.
కుప్టి బ్రిడ్జి సమస్య కారణంగా రాత్రి నుంచి బోథ్ ఎక్స్ రోడ్డు నుంచి ఇచ్చోడ వైపు సుమారు 10 కిలోమీటర్ల మేర భారీ వాహనాలు నిలిచిపోయినట్లు సమాచారం. దీంతో ప్రయాణికులు, లారీలు, ఇతర వాహనాల డ్రైవర్లు తీవ్ర ఇబ్బందులు ఎదుర్కొన్నారు. వాహనాలు గంటల తరబడి కదలకపోవడంతో రహదారిపై ట్రాఫిక్ రద్దీ మరింత పెరిగింది.
ఎండలో మూడు గంటల పాటు పర్యవేక్షణ
వాహనదారుల ఇబ్బందులను స్వయంగా పరిశీలించిన ఎమ్మెల్యే అనిల్ జాదవ్ సుమారు మూడు గంటల పాటు ఎండలోనే ఉండి ట్రాఫిక్ పరిస్థితిని పర్యవేక్షించారు. వాహనాల రాకపోకలకు తాత్కాలికంగా మార్గం కల్పించే చర్యలను దగ్గరుండి పరిశీలించారు. ఎమ్మెల్యే చొరవతో తాత్కాలిక మార్గాన్ని ప్రారంభించడంతో నిలిచిపోయిన వాహనాల రాకపోకలకు కొంతమేర అవకాశం ఏర్పడి వాహనదారులకు ఉపశమనం లభించింది.
ప్రజలు గంటల తరబడి రోడ్డుపై ఇబ్బందులు పడుతున్న సమయంలో సమస్యను పట్టించుకుని స్వయంగా ఘటనాస్థలికి రావడం పట్ల స్థానికులు, వాహనదారులు ఎమ్మెల్యేను అభినందించారు. ప్రజలకు రవాణా సౌకర్యాలు అందుబాటులో ఉండేలా అవసరమైన చర్యలు తీసుకోవాలని వారు కోరారు.
ప్రజల సౌకర్యాలే ముఖ్యం
ఈ సందర్భంగా ఎమ్మెల్యే అనిల్ జాదవ్ మాట్లాడుతూ, తన ఆరోగ్యం కంటే ప్రజల సౌకర్యాలు, వారి ఇబ్బందుల పరిష్కారమే ముఖ్యమని అన్నారు. రహదారులపై వాహనదారులు తీవ్ర ఇబ్బందులు పడుతున్న పరిస్థితిని చూసి తక్షణమే కుప్టి బ్రిడ్జి వద్దకు వచ్చినట్లు తెలిపారు.
హైవేలపై పలు టోల్ ప్లాజాలను ఏర్పాటు చేసి వాహనదారుల నుంచి భారీగా రుసుములు వసూలు చేస్తున్నప్పటికీ, రహదారుల మౌలిక సదుపాయాలను అదే స్థాయిలో మెరుగుపరచడం లేదని ఎమ్మెల్యే విమర్శించారు. ప్రజల నుంచి టోల్ రూపంలో డబ్బులు వసూలు చేస్తున్నప్పుడు వారికి మెరుగైన రహదారులు, సురక్షితమైన ప్రయాణం కల్పించాల్సిన బాధ్యత కూడా సంబంధిత ప్రభుత్వాలపై ఉందన్నారు.
కేంద్రం చొరవ తీసుకోవాలి
రాష్ట్రంలోని రహదారుల అభివృద్ధికి కేంద్ర ప్రభుత్వం నిధులు కేటాయిస్తున్నప్పటికీ, క్షేత్రస్థాయిలో ప్రజలు ఎదుర్కొంటున్న సమస్యలకు తగిన పరిష్కారం లభించడం లేదని ఎమ్మెల్యే అనిల్ జాదవ్ అన్నారు. తెలంగాణకు సమీపంలోని నాగ్పూర్లో కేంద్ర మంత్రి ఉన్నప్పటికీ, ఈ ప్రాంతంలోని రహదారి సమస్యలపై తగిన దృష్టి సారించడం లేదని ఆరోపించారు.
కుప్టి బ్రిడ్జి, రహదారి సమస్యకు కేవలం తాత్కాలిక పరిష్కారం కాకుండా శాశ్వత పరిష్కారం చూపాలని ఆయన డిమాండ్ చేశారు. సమస్యకు శాశ్వత పరిష్కారం లభించకపోతే ప్రజల ప్రయోజనాల కోసం రహదారి దిగ్బంధం చేపట్టడానికి కూడా వెనుకాడబోమని ఎమ్మెల్యే అనిల్ జాదవ్ హెచ్చరించారు.
కుప్టి బ్రిడ్జి సమస్యకు శాశ్వత పరిష్కారం చూపి, భవిష్యత్తులో ఇలాంటి పరిస్థితుల్లో వాహనాలు కిలోమీటర్ల మేర నిలిచిపోకుండా చర్యలు తీసుకోవాలని స్థానిక ప్రజలు, వాహనదారులు కోరుతున్నారు.
మీ గొంటిముక్కుల ప్రసాద్ మన భారత్ జిల్లా ఆర్సీ ఇన్చార్జి
ఆదిలాబాద్ జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.
