వ్యవసాయం, సాగునీరు, యూరియా, రైతుబీమా రంగాలను నిర్వీర్యం చేశారు
షాపుల్లో లేని యూరియా యాపుల్లో ఉంటుందా? అని ప్రభుత్వాన్ని ప్రశ్నించిన ఎమ్మెల్యే
బజార్ హత్నూర్:మన భారత్ , సెప్టెంబర్ 3, కాంగ్రెస్ ప్రభుత్వం 1000 రోజుల పాలనలో రైతాంగం తీవ్ర ఇబ్బందులు ఎదుర్కొంటోందని బోథ్ ఎమ్మెల్యే అనిల్ జాదవ్ విమర్శించారు. బీఆర్ఎస్ పార్టీ ఆధ్వర్యంలో చేపట్టిన ఏడు రోజుల నిరసన కార్యక్రమాల్లో భాగంగా బజార్ హత్నూర్ మండల కేంద్రంలో వ్యవసాయం, సాగునీటి రంగం, యూరియా కొరత, రైతుబీమా అంశాలపై రైతు సదస్సు నిర్వహించారు. ఈ కార్యక్రమానికి ఎమ్మెల్యే అనిల్ జాదవ్ నాయకత్వం వహించారు.
ఈ సందర్భంగా ఎమ్మెల్యే మాట్లాడుతూ గత బీఆర్ఎస్ ప్రభుత్వం రైతుల సంక్షేమానికి ప్రాధాన్యం ఇచ్చిందని అన్నారు. రైతుబంధు, రైతుబీమా, సాగునీటి ప్రాజెక్టులు, 24 గంటల ఉచిత విద్యుత్ వంటి కార్యక్రమాల ద్వారా రైతాంగానికి అండగా నిలిచామని పేర్కొన్నారు. అయితే కాంగ్రెస్ ప్రభుత్వం అధికారంలోకి వచ్చిన తర్వాత రైతులు అనేక సమస్యలను ఎదుర్కొంటున్నారని ఆయన ఆరోపించారు.
రైతుబంధు సకాలంలో అందకపోవడం, రైతుబీమా అమలులో నిర్లక్ష్యం, సాగునీటి ప్రాజెక్టుల విషయంలో ప్రభుత్వ వైఖరి, ఎరువుల కొరత వంటి అంశాలు రైతులను ఇబ్బందులకు గురిచేస్తున్నాయని అనిల్ జాదవ్ విమర్శించారు. ముఖ్యంగా యూరియా కోసం రైతులు గంటల తరబడి, రోజుల తరబడి ఎదురుచూడాల్సిన పరిస్థితి ఏర్పడిందని అన్నారు.
“షాపుల్లో లేని యూరియా యాపుల్లో ఉంటుందా?” అంటూ ఎమ్మెల్యే ప్రభుత్వ తీరును ప్రశ్నించారు. రైతులకు అవసరమైన సమయంలో ఎరువులు అందుబాటులో ఉండేలా ప్రభుత్వం తక్షణ చర్యలు చేపట్టాలని డిమాండ్ చేశారు. రైతులు పంట సాగు కోసం తీవ్రంగా శ్రమిస్తున్న సమయంలో యూరియా కోసం ఇబ్బందులు పడటం ఆందోళనకరమని అన్నారు.
రైతులకు ఇచ్చిన హామీలను కాంగ్రెస్ ప్రభుత్వం అమలు చేయడం లేదని అనిల్ జాదవ్ ఆరోపించారు. రైతుల సమస్యలను ప్రభుత్వం వెంటనే పరిష్కరించాలని, యూరియా కొరతను నివారించి అవసరమైన ఎరువులను అందుబాటులోకి తీసుకురావాలని డిమాండ్ చేశారు.
“రైతు బాగుంటేనే రాష్ట్రం బాగుంటుంది”
రైతు సంక్షేమమే రాష్ట్ర అభివృద్ధికి పునాది అని ఎమ్మెల్యే అనిల్ జాదవ్ అన్నారు. రైతు కంట కన్నీరు రాకుండా ప్రభుత్వం చర్యలు తీసుకోవాలని సూచించారు. రైతుల సమస్యలను పరిష్కరించడంలో ప్రభుత్వం విఫలమైతే బీఆర్ఎస్ పార్టీ తరఫున మరింత బలంగా ప్రజల తరఫున పోరాటం చేస్తామని ఆయన స్పష్టం చేశారు.
రైతుల హక్కులు, సంక్షేమం కోసం బీఆర్ఎస్ పార్టీ ఎప్పటికీ రైతుల పక్షానే ఉంటుందని అనిల్ జాదవ్ తెలిపారు. ప్రభుత్వం రైతుల సమస్యలపై స్పందించి తక్షణ పరిష్కార చర్యలు చేపట్టాలని కోరారు.
ఈ రైతు సదస్సులో బీఆర్ఎస్ పార్టీ నాయకులు, ప్రజాప్రతినిధులు, కార్యకర్తలు, రైతులు పెద్ద సంఖ్యలో పాల్గొన్నారు. వ్యవసాయం, ఎరువుల లభ్యత, సాగునీటి సమస్యలు తదితర అంశాలపై కార్యక్రమంలో చర్చించారు.
మీ గొంటిముక్కుల ప్రసాద్ మన భారత్ జిల్లా ఆర్సీ ఇన్చార్జి
ఆదిలాబాద్ జిల్లా స్టాఫ్ రిపోర్టర్ తో పాటు నియోజకవర్గాలకు మండలాల వారీగా విలేకరులు కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి.
