హత్య కేసు నిందితుడిని కఠినంగా శిక్షించాలి

భీంసరిలో దళితుడి హత్య కేసు నిందితుడిని కఠినంగా శిక్షించాలి

బాధిత కుటుంబానికి ప్రభుత్వ ఉద్యోగం, మూడు ఎకరాల భూమి ఇవ్వాలి

ఎమ్మెల్యే, అధికార పార్టీ నాయకులు పరామర్శించకపోవడం వివక్షే: వామపక్షాల ఆరోపణ

ఆదిలాబాద్, జూలై 27: భీంసరి గ్రామంలో దళితుడి మృతికి కారణమైన కేసులో నిందితుడిగా ఉన్న బీజేపీ మాజీ సర్పంచ్ మయూర్ చంద్రను కఠినంగా శిక్షించాలని వామపక్ష నాయకులు డిమాండ్ చేశారు. బాధిత కుటుంబానికి న్యాయం చేయడంతో పాటు కుటుంబంలో ఒకరికి ప్రభుత్వ ఉద్యోగం, మూడు ఎకరాల వ్యవసాయ భూమి మంజూరు చేయాలని కోరారు.

సీపీఎం జిల్లా కార్యదర్శి దర్శనాల మల్లేష్, సీపీఐ(ఎంఎల్) న్యూడెమోక్రసీ జిల్లా కార్యదర్శివర్గ సభ్యుడు వెంకట్ నారాయణ, ప్రజాసంఘాల నాయకులు అన్నమొల్ల కిరణ్, ఆర్. మంజుల, ఆర్. సురేందర్ రెడ్డి, కే. ఆశన్న తదితరులు భీంసరి గ్రామానికి వెళ్లి బాధిత కుటుంబాన్ని పరామర్శించారు. మృతుడి భార్య, కుమారుడిని కలిసి ఘటనకు సంబంధించిన వివరాలను అడిగి తెలుసుకున్నారు.

బాధిత కుటుంబ సభ్యులు తెలిపిన వివరాల ప్రకారం.. మాజీ సర్పంచ్ ఇంటికి వెళ్లిన సమయంలో వివాదం తలెత్తగా, ఆగ్రహించిన నిందితుడు ఇనుప రాడ్డుతో తీవ్రంగా దాడి చేసినట్లు ఆరోపించారు. దాడిలో తీవ్రంగా గాయపడి అపస్మారక స్థితికి చేరుకున్న బాధితుడు చికిత్స కోసం రిమ్స్‌లో చేరగా, చికిత్స పొందుతూ మృతి చెందినట్లు కుటుంబ సభ్యులు నాయకులకు వివరించారు.

రాజకీయ పలుకుబడితో కేసును నీరుగార్చే ప్రయత్నం చేయవద్దని డిమాండ్

బాధిత కుటుంబం పేద దళిత కుటుంబం కావడంతోనే తమకు న్యాయం ఆలస్యమవుతోందని మృతుడి కుమారుడు ఆవేదన వ్యక్తం చేసినట్లు వామపక్ష నాయకులు తెలిపారు. నిందితుడికి రాజకీయ పలుకుబడి ఉండటంతో కేసును నీరుగార్చే ప్రయత్నాలు జరగకుండా అధికారులు ప్రత్యేక దృష్టి సారించాలని వారు డిమాండ్ చేశారు.

బాధిత కుటుంబానికి ప్రభుత్వం అండగా నిలవాలని, రాష్ట్ర ప్రభుత్వం మరియు జిల్లా కలెక్టర్ చొరవ తీసుకుని కుటుంబంలో ఒకరికి ప్రభుత్వ ఉద్యోగంతో పాటు మూడు ఎకరాల సాగుభూమిని మంజూరు చేయాలని కోరారు. పేద, దళిత కుటుంబాలకు కూడా చట్టం సమానంగా పనిచేస్తుందనే నమ్మకాన్ని కల్పించాల్సిన బాధ్యత ప్రభుత్వంపై ఉందన్నారు.

ఎమ్మెల్యే, అధికార పార్టీ నాయకులు పరామర్శించలేదని ఆరోపణ

బాధిత కుటుంబాన్ని స్థానిక ఎమ్మెల్యే, అధికార కాంగ్రెస్ పార్టీ నాయకులు ఇప్పటివరకు పరామర్శించకపోవడం వివక్షలో భాగమేనని వామపక్ష నాయకులు ఆరోపించారు. బాధిత కుటుంబానికి తక్షణ న్యాయం చేయాలని, నిందితుడిపై చట్టపరంగా కఠిన చర్యలు తీసుకోవాలని డిమాండ్ చేశారు.

బాధిత కుటుంబానికి న్యాయం చేయాలని కోరుతూ త్వరలో జిల్లా కలెక్టర్ కార్యాలయం ఎదుట ధర్నా నిర్వహించనున్నట్లు వామపక్ష నాయకులు ప్రకటించారు.

మీ గొంటి ముక్కుల ప్రసాద్ రిపోర్టర్ మన భారత్ ఆదిలాబాద్ జిల్లా ఆర్సీ ఇన్చార్జి.

జిల్లా స్టాప్ రిపోర్టర్ తో పాటు నియోజకవర్గాలు మండలాల వారీగా రిపోర్టర్స్ కావలెను ఆసక్తి ఉన్న వారు క్రింద ఉన్న వాట్సాప్ నెంబర్ పై క్లిక్ చేయండి